美女俊男 實力取勝 黃長興尋找商機 陳茵媺無悔封胸

美女俊男 實力取勝 黃長興尋找商機

陳茵媺與黃長興同是「選美」出身,雖然外在條件爆燈,但卻並未因此「恃靚行兇」,相反二人都避開「靠外貌搵食」這條捷徑,前者誓要封巨胸做實力派,後者則同樣不靠胸肌轉尋商機。雖然二人前景是好是壞還是未知數,但起碼將來回首前塵,絕不後悔,因為曾經努力付出過。

法國長大的男人,「殺傷力」極強,05年出道的黃長興小時候移居法國,由內至外滲出法式浪漫本質,一個眼神六舊腹肌已迷死不少女性。當年他參選「香港先生」,腹肌固然吸引,半鹹淡的廣東話更覺可愛,雖然最後敗給高鈞賢,但仍獲無綫簽約做合約藝人,工作機會接踵而來。不過在娛樂圈,大家都會將藝人的花邊新聞放大,近日長興與富婆徐美琪傳緋聞,成為新聞人物,最後他選擇公開「真命天女」,情節猶如電影般峰迴路轉。

黃長興露出六舊腹肌,為纖體中心擔任代言人
赤裸上身的長興露出六舊腹肌,為纖體中心擔任代言人。

黃長興
黃長興坦言沒有後悔參選港男。

否認花心情聖

入行五年,其實長興緋聞情史並不多,最為人熟悉是與曹敏莉的一段情,分手後,突然步弟弟長發後塵,被指是花心情聖,傳與徐美琪跳舞撻着。長興澄清說:「我哋真係冇嘢,只係排舞,雜誌影到都係我哋工作嘅環境相。」

突然被關注,長興只淡淡然地說:「呢排嘅是是非非,我明白傳媒要交功課,亦知道做得呢行遲早會輪到你,已經睇慣晒,不過寫嘢都要有限度,好似之前有本雜誌大字標題話我講自己唔係鴨,我根本冇咁講過,我係正經人家,雖然人哋覺得我外國返嚟,思想比較開放,但都唔會亂嚟,我屋企人好支持我,真定假觀眾亦可以分辨,所以我冇為呢啲嘢唔開心,但我覺得人應該有尊嚴,我係有文化嘅人。(成名要付出代價?)但亦可以正面啲。(有冇後悔入行?)我覺得做任何事都唔好後悔,05年我選港男,都係考慮咗好耐先由法國飛返嚟香港,所以冇覺得後悔。」


公開女友闢謠

為平息這場風波,長興選擇公開拍拖一年半,是他入行以來首次公開女友身份,他表示圈外女友Peggy今年25歲,二人感情穩定,不時拍拖及旅行。14歲已嘗初戀滋味的長興,當然懂得不少冧女招數,但他直言兩個人拍拖最重要是坦誠相對,而他更不會扮法國男在街頭表演法式濕吻,他說:「我一直對愛情都好專一,唔會到處留情,感情事唔想多講,希望留番畀自己同女友,我只可以講我每次拍拖都好認真,只係唔想成日掛喺口邊。」

談到事業,長興可算是下了不少苦功,畢竟無綫花旦小生眾多,要突圍而出必須加倍努力,長興一直勤力學中文,不想錯失眼前機會:「一返香港完全唔識睇中文,依家都係識睇簡單嘅字,識講六成廣東話,希望有進步。」拍過近三十套電視劇的他,直言對自己的成績表滿意:「雖然唔係每部都由頭帶到尾,好似最近播嘅《談情說案》,同埋未出街嘅《刑警》,我覺得做得唔差,尤其喺《刑》劇演變態攝影師,呢個角色之前未做過,但就好滿意,希望人哋可以睇到。」


講股眉飛色舞

經過五年居港生活,長興也漸漸地變成真正港男,從前獨家法式浪漫也漸漸失去:「香港生活好急促,好似食嘢咁,如果要有浪漫要用好多時間,可能同女友食飯,喺外國會慢慢食足三個鐘,大家情深對望談情,但喺香港就唔同,食餐飯都趕住走。」

從前在法國只談風月,講紅酒和女人,回港後「現實」了許多,講股票、買樓買車,講到股票更是眉飛色舞,他說:「呢個係好自然地改變,因為覺得要為將來鋪路,個人真係保守咗好多。我仲諗住考個地產經紀牌,等將來有個打算。」


斥資開舖養家

最近長興斥資五十萬元在天后開了法國餐廳,一嘗做老闆滋味,問他是否親自下廚招呼人客,他笑說:「我淨係識食,不過我請咗一位經驗老到嘅廚師,我會同佢研究地道法國餐,希望走大眾化路線。」長興更明白力不到不為財的道理,因而婉拒跟朋友合資開店:「其實之前好多人想同我一齊搞生意,但我想自己搞,覺得會好啲。」談到有傳該店是由徐美琪打本給他,他說:「聽到呢一樣都幾Hurt,我係將自己嘅積蓄瞓身落去搞,結果畀人寫成咁。自己唔係好大想頭,只不過想三餐無憂,唔係要賺大錢,只要可以養活家人,對我嚟講已經好足夠,人開心就得。」


後記:努力操Fit

今年港男選舉又到,長興寄語師弟努力操Fit,但他笑言因工作反而「鬆懈」不少:「呢排真係忙啲,以前喺法國好悠閒,每星期做四、五次Gym,所以參選時狀態最Fit,依家就好難Keep,拍劇日夜顛倒,已經肥番少少,加上一開心就鍾意食嘢同旅行,依家要Keep番。」其實,有愛情滋潤自然心廣體胖啦!

黃長興
黃長興斥資五十萬元開法國餐廳,一嘗做老闆滋味,更為將來鋪路。

入行5大事


港男亞軍

05年參選香港先生的長興被同屆對手高鈞賢K.O.,雖然落選,但他簽約無綫後獲力捧,入行以來參演多套劇集。

黃長興

黃長興、曹敏莉


騷肌冧女

不少花旦勁騷「事業線」上位,長興亦靠六舊胸肌冧女,07年他赤裸上身拍攝纖體中心廣告,證明男人「事業線」亦有價。


性向成疑

07年初,長興被拍得與法籍男士在街頭癡纏,甫見面即情不自禁Kiss,令性取向一度成疑。


舞出愛火

07年底,長興與曹敏莉因合作《舞動奇跡》舞出愛火,緋聞傳足兩年,當時二人食住上,以情侶檔齊齊搵銀。


忘年緋聞

去年與曹敏莉分手後,二人感情各自發展,長興戀上圈外女友,期間又傳出搭上徐美琪,兩人極力否認。至於曹敏莉坦承與圈外男友年底結婚。

高鈞賢、黃長興

陳茵媺無悔封胸

現今80後的少女為上位,人人搶住拋胸做o靚模,06年港姐冠軍陳茵媺(Aimee)卻反其道而行,成名後即將34D「枕頭胸」刻意收埋,又把秀髮剪短,轉走型女路線,雖然與「女神」和「咪神」等名字斷緣,但她仍樂在其中:「好多人同我講,話冇Noise唔好,但我做嘢係睇自己,希望能做一個真正演員,靠實力令自己進步,而唔係編作故事等人留意我。」

由初選港姐至今,Aimee屢被傳整容、隆胸,她直言已聽到厭倦,並決絕地說:「其實我係好介意畀人講身材,呢啲問題答咗好多次,好悶……唔答。」

陳茵媺
擁有34D「枕頭胸」的陳茵媺,參選港姐時令人眼前一亮。

陳茵媺
成名後刻意封胸的陳茵媺,把秀髮剪短,轉走型女路線。

抱不平強出頭

在加拿大土生土長的Aimee,性格開朗活潑、說話爽直,想不到「整容」和「隆胸」這些港姐必答題會考起她,令人覺得是受到某種壓力而被迫「封口」。Aimee說:「唔係,依家作為一個公眾人物,做嘢或講嘢都可能會影響其他人,我都有好多小朋友Fans,可能係別人嘅榜樣。」

她坦言在加拿大讀書時做事較激進,遇不平事件便會出聲:「細個好鍾意抱不平,見同學仔畀人蝦我會立即出頭。記得有次同同學去Coffee Shop溫書,見到一個着得好污糟、身上發出臭味嘅男人想買一杯咖啡,但畀職員拒絕,我就忍唔住上前同職員理論,佢解釋係擔心影響其他客人,喺做生意立場係啱,但當時外面落緊雪,點解可以咁不近人情?我覺得冇道理拗到底,好彩最後對方都有賣畀佢。但諗番轉頭可能做法太衝動,依家可能會私下講,或者用更和平方式去處理。」


唔介意冇星味

Aimee聽教聽話,難怪深得無綫高層歡心,有傳她是老闆娘方逸華的世姪女,成功揮抵「咪神」徐淑敏搶閘拍《同事三分親》,去年再憑《烈火雄心3》的出位女警,奪得台慶飛躍進步女演員獎,事業恍如坐穿梭機暢通無阻。最近她又接到「筍Job」,與李司棋和毛舜筠等好戲之人拍攝新處境劇《天天天晴》,有助鄰家女孩形象更入屋,她說:「依家做藝人最重要係親民,寫Blog、上微博都可以幫助同各地Fans Close啲,即使畀人話我冇星味都冇所謂,因為我就係我!」


感激家人支持

有今日的成績,Aimee自言多謝家人:「當初嚟香港只係第一站,打算每隔一、兩年就去另一個地方工作,好似日本、巴黎、意大利同德國,認識各地文化,估唔到表哥一句話就改變我一生,佢提名我參選港姐,Daddy唔贊成我留喺娛樂圈,怕呢行太複雜,後來知我鍾意演戲,因為唔識睇中文,我每日都E-mail劇本畀佢,佢就用電話逐個字翻譯畀我聽。」她更暱稱爸爸做「男朋友」:「佢每次嚟香港都好似男朋友咁跟出跟入,陪我入廠,等我收工。(你Daddy買咗層樓畀你?)我有份供o架!佢只係畀首期,依家想努力搵多啲錢換大屋,等Daddy、媽咪同細佬嚟香港有地方住。」

被視為掌上明珠的Aimee孤身來港三年,間中都會思鄉病發:「我係一個有好多正能量嘅人,但有時都會寂寞,初初唔適應新環境,之後去領養咗兩隻貓,唔使對住四幅牆。」


專一拒拍散拖

除了貓咪,難道Aimee從沒想過找個男友來慰藉自己?她笑說:「冇呀!依家以工作為重。(咁多年都冇人追?)咁又唔會,我係靚女嚟o架嘛!」她對感情事大賣關子,過去亦鮮有緋聞,僅傳過過氣歌手陳紀匡(原名陳建穎)、港男高鈞賢,而最近一次便是與《畢打自己人》的拍檔沈震軒(Sammy)一齊行街食飯,但她統統否認:「同Sammy傳緋聞覺得好好笑,我連佢電話號碼都冇。(又約出街?)日日拍劇都見到,做完嘢去食飯有幾難?」她自認是個專一的人,不希望太濫交:「我唔會亂嚟!唔想拍吓散拖就算,想搵一個長期發展嘅對象。(有咩條件?)感覺最重要,緣分嚟到冇得講,我唔鍾意啲成日換畫、口花花嘅公子,最好唔好揀圈中人啦!因為我返工時間亂,如果佢時間又亂就會好複雜。」


後記:最愛雀斑

早前Aimee返加拿大三個月探屋企人充電,不用開工的她,每日只顧吃喝玩樂,雖然人精神了,但卻被面上的雀斑出賣,連粉底都掩蓋不住,難得Aimee一點都不在乎:「冇所謂呀!其實我好鍾意雀斑,細個時會約埋成班同學去曬太陽,我哋專登唔搽防曬,仲將頭岳起面向太陽,覺得愈多雀斑愈靚。」

陳茵媺
陳茵媺希望靠實力令自己進步,當一個真正演員。

陳茵媺 入行5大事


雙料港姐

06年當選「香港小姐」冠軍兼奪「國際親善小姐」的陳茵媺,成功撼低「咪神」徐淑敏、呂慧儀、黃瑩等大熱,之後簽約成為無綫旗下合約藝人,獲公司力捧。

陳茵媺、馬德鐘

陳茵媺


哭訴被屈

07年第一次參與電視劇《原來愛上賊》演出,為飾演男仔頭女警,Aimee一改淑女形象將頭髮剪短,令人耳目一新。期間有傳遭陳法拉「明屈」,要向人哭訴。


猛人撐腰

Aimee被爆其父與邵氏製作總監黃家禧是世交,而黃家禧則是無綫主席方逸華的表弟,有猛人撐腰,即傳出踢走徐淑敏演出《同事三分親》。


隆胸傳聞

Aimee選港姐期間胸部時大時細,隆胸傳聞甚囂塵上,至去年又被指下巴離奇變短,但她一概否認。


奪飛躍獎

Aimee在《烈火雄心3》飾演剛烈女警,主動追求黃宗澤,演出入型入格令她一舉彈出,09年以一面倒姿態奪得「飛躍進步女藝員」獎,在台上激動落淚。

06年當選「香港小姐」冠軍兼奪「國際親善小姐」的陳茵媺,成功撼低「咪神」徐淑敏、呂慧儀、黃瑩等大熱

评论回复