TVB新劇《再戰明天》闖懲教所禁區 徐子珊監獄俘虜吳啟華

向來以紀律部隊做題材嘅劇集收視都唔錯,加上呢輪電視風雲風頭火勢,無綫開劇都要搞突破,拍咗兩輯《飛虎》嘅監製林志華,明年1月會開20集新劇《再戰明天》,以懲教署人員每日面對甲級重犯嘅故事做題材,劇情會有香港重犯嘅真實個案,演員有吳啟華、徐子珊、黃德斌同高鈞賢等,王浩信、單立文同滕麗名演囚犯,至於黃心穎BB同趙希洛就做懲教署學員。而子珊就演懲教署職員,與吳啟華有感情線,監製林志華透露會到監獄作實景拍攝,直言過程相當嚴謹。

心穎BB做啟華個妹

個劇籌備經年,日前去咗赤柱同最新嘅羅湖女子懲教所實景拍攝節目巡禮,其中阿滕嘅故事,講佢喺女子懲教所湊大個仔,期間遇到啲問題。見阿滕抱住個小演員狂喊,子珊係咁相勸,真係好鬼入戲!而劇中本來係懲教人員嘅王浩信,因為犯咗法,最終自己都要坐監。監製林志華噚日喺電話度話:「我哋去咗監獄嘅實景禁區拍,懲教署安排囚犯唔喺監倉,劇組至入倉拍,唔會影響佢哋嘅運作,好少機會喺實景拍監獄暴動場面,我哋今次都拍到!」

無綫劇闖懲教所禁區 王浩信阿滕拍到喊
■滕麗名同徐子珊日前喺懲教所實景拍攝新劇《再戰明天》,睇嚟好逼真喎!

劇中子珊將與啟華有感情線,更會有咀嘴戲,林志華更謂:「戲中啟華大子珊十幾年,子珊出世時啟華抱過佢,子珊都當佢係uncle,後來慢慢發展成情侶,子珊仲幫啟華擋刀。」

王浩信喺監倉拍嗰時喊唔停,佢噚日喺電話度解釋:「因為喺監倉實景拍,裏面有囚犯嘅物品,入到去諗住如果出唔到嚟、見唔到啲親人就忍唔住喊唔停,扮囚犯嘅演員又話你入嚟就啱,有排玩呀,氣氛好似真監獄咁!」個劇睇落都幾新鮮,加埋有心穎BB飾演啟華個妹,應該吸引唔少宅男捧場。

《再戰明天》闖懲教所禁區 徐子珊監獄俘虜吳啟華
■心穎BB終於正式入劇組,宅男要留意喇。

《再戰明天》闖懲教所禁區 徐子珊監獄俘虜吳啟華
■吳啟華(左)同王浩信飾演懲教人員,有唔少對手戲。

《再戰明天》闖懲教所禁區 徐子珊監獄俘虜吳啟華
■劇中本來係懲教人員嘅王浩信,最後因為犯法而入獄。

评论列表(2)

评论回复