第二屆高登男神選舉結果 黃子華第一 何韻詩第四

第二屆高登男神喺上個月就公布咗入圍名單,仲開始咗投票,而喺今日,結果終於出嚟喇。

今屆有16個男神入圍,當中除咗有「削骨還父,孝感動天」嘅胡鴻鈞之外,仲有何韻詩,當然唔少得一班大熱門,好似有黃子華、馬國明、周潤發、吳鎮宇同埋林雪等等。

公布下今屆嘅結果先,得到冠軍嘅係萬眾期待嘅黃子華,其實子華一向喺網民心目中都好有份量,佢嘅金句仲不時都畀網民拎出嚟重溫,所以佢上一屆只係拎到第三,可以話係令好多巴打失望,而今屆可以得到第一,真係眾望所歸。

第2位,就係上屆嘅冠軍馬國明,第三名就係哥哥張國榮;而第一次入圍嘅何韻詩,就得到第四。男神喎!高登喎!何韻詩今次,可以話係有唔錯嘅成績喇。

其後嘅排名就分別:第5謝霆鋒、第6吳彥祖、第7吳鎮宇、第8胡鴻鈞,第9周潤發,第10周國賢、第11陳展鵬、第12張家輝、第13陳冠希。不少巴打心目中嘅男神「肥雪」——即係林雪,只排14;火舞耀揚排第15,Eric Kwok郭偉亮排第16。包尾。

其實呢一個選舉嘅結果,有啲都幾令網民失望,先唔講「削骨還父,孝感動天」嘅胡鴻鈞,佢嘅「削骨」賣點,拎唔到第一都好正常,但有網民話佢排第8都畀多佢。而有民間特首之稱嘅發哥(另一個係劉德華),只係得到第9,都好令網民失望。

第二屆高登男神
詳細票數一覽。

评论回复