上天來的禮物 陳國邦

East Week 第481期

「今日係星期幾呀?」陳國邦記日期、年份很差,這個問題,在訪問期間他問過我們兩次了,但奇就奇在,他偏偏又會心水清地知道,訪問這天,是他女兒陳禛(音:真)出世的第八日。

十月三十日那天,他伴着太太羅敏莊(Mimi)到產房剖腹誕下女兒,然後又親手拿起剪刀剪臍帶。「陳禛出世嗰刻嘅喊聲,令我覺得『家』嗰個感覺深厚咗!我依家每日對住佢、望住佢,每日都咀佢,擺佢喺我嘅手上面……感覺唔知點形容,手上面呢嚿出到嚟呱呱叫嘅嘢,竟然係我同太太嘅一個愛情結晶品、一個生命嘅延續喎!嗰個感覺真係好奇妙、好窩心、好溫暖!

「之前我未有下一代時,成日聽到啲朋友講:『我個仔幾得意、幾得意……』到我依家有咗個女,原來都會講番呢啲嘢!哈哈哈!我依家會成日計算:到底我仲可以陪到個女幾多歲呢?」

有趣的是,陳禛原來並非陳國邦兩公婆當初的計劃。「我哋好多年前,係有計劃過唔要BB;過多幾年,我哋又覺得睇吓點;跟住我哋嘅心態已經變咗:有都OK嘅。」

結果,因為遲了幾天打避孕針,他們便無意地製造了這個小生命來。「佢嘅出現,對我哋嚟講係一份禮物!時間好好,因為我哋啱啱呢幾年啲工作多咗,生活環境改善咗,心態又改變咗,而且,仲啱啱好趕得切睇《大太監》!哈哈哈!」

此刻眼前四十四歲的陳國邦,笑容簡直可以用「甜美」來形容。

陳國邦

陳國邦

陳禛是個表情多多的BB女,出世時重七磅三,人奶和奶粉都喜歡吃。陳國邦每天也會咀她很多次,亦愛給她的小手仔緊握自己的手指。
陳禛是個表情多多的BB女,出世時重七磅三,人奶和奶粉都喜歡吃。陳國邦每天也會咀她很多次,亦愛給她的小手仔緊握自己的手指。

彭三順

陳禛這個名字,是陳國邦改的,那個「禛」字,意思是希望神給予女兒最大的幸福;而事實上,女兒才出世不久,便為爸爸帶來了很大的福氣,新劇《大太監》第一集收視,便已經有三十三點,連陳國邦飾演的「彭三順」也得到了很大的回響,除了獲網民大讚外,又吸引了很多傳媒主動找他做訪問。

「『彭三順』算唔算係我近年最爆嘅一個角色呢?起碼依家有咁多訪問,都叫做話咗畀我知個結果啦!哈哈哈!但呢個角色可以行到幾遠呢?又係咪虛火呢?你哋有個行家同我講:『阿邦,呢個角色好成功喎!』但我覺得,距離成功,仲有一段好長嘅距離!不過有個好嘅起步,梗係好啦!」

他說,其實早於去年播映的《紫禁驚雷》,他亦曾期望過自己演的「康熙」會得到大家注意。「一個咁多人演過嘅角色,我又嘗試用一啲唔同嘅手法去演繹,諗住帶畀觀眾以另一個角度去欣賞同認識,本來諗住會有好多人評論,但結果好少。呢次演『彭三順』,我花嘅心思同時間,可能比『康熙』冇咁多,不過我都會有期望,點知出到嚟,竟然係比我期望更加大!哈哈哈!」

陳國邦《大太監》首集,一幕「彭三順」被「李連英」(黎耀祥)掌摑的戲,看得人心花怒放!
《大太監》首集,一幕「彭三順」被「李連英」(黎耀祥)掌摑的戲,看得人心花怒放!

呃細路

他八九年畢業於演藝學院,同年他已經憑電影《壯志雄心》獲台灣金馬獎提名「最佳男配角」。「呢個提名,係金馬獎評審委員主動同電影公司提出,台灣嗰邊都用『黑馬』嚟形容我。」結果被台灣演員張世打敗。

畢業後,陳國邦選擇加入電視台。「我嗰陣得廿一、二歲,個樣又細個,入電影圈,我嘅發展會好局限;但入電視台,總會有啲細佬、學生角色啩!」

拍了四年劇,他又再重拍電影,九五年《飛虎雄心》再獲金像獎提名「最佳男配角」,「套戲收得,個角色又有提名,今次仲唔得?點知殺出個《晚九朝五》嘅陳小春!」

陳國邦去年播出的《紫禁驚雷》,他曾在「康熙」這個角色上下了不少苦功,可惜最後回響甚少
去年播出的《紫禁驚雷》,他曾在「康熙」這個角色上下了不少苦功,可惜最後回響甚少。

甫出道,演技已得到大眾認定,這不是很好嗎?「其實呢個係畀到我繼續喺呢行做落去嘅一個好大動力!不過一開始就畀人讚,讚咗十幾廿年之後,你就會覺得好似啲人同個細路講:『你做得好好,送份禮物畀你呀!』但份禮物呢?唔見喎,『嚟o架啦、嚟o架啦!』再過多一排又係咁,一直都見唔到份禮物!讚足十幾廿年後,真係會發晦氣:『依家我唔要啦!』

那所謂的「禮物」是甚麼?「其實唔可以具體咁去講,只可以話,喺呢個圈,有邊個藝人係唔紅,但又可以靠從事演藝工作賺到好多錢呢?我真係舉唔到個例子囉!

「我諗,任何人都會咁諗過:點解我做咗咁多年,邊個邊個都得,但我又唔得嘅?點解呢個呢個都得,我仲未得嘅?當咁多年以嚟,十個有九個都讚你,但仲係呢樣又冇,嗰樣又唔得嘅時候,嗰個不忿同不平,真係會好強烈!尤其係七年前。」

陳國邦○二年,他與胡杏兒在《流金歲月》裏演智障人士,監製因為他的「佳佳」一角,衍生了後來的《阿旺正傳》
○二年,他與胡杏兒在《流金歲月》裏演智障人士,監製因為他的「佳佳」一角,衍生了後來的《阿旺正傳》。

鍾景輝

七年前,就在陳國邦最沮喪,打算退出娛樂圈的時候,一次,他在化妝間化妝時,剛好鍾景輝(King Sir)坐在旁邊,沒想到如此巧遇的一個閒聊,卻成為了他的轉捩點。

「喺我讀演藝時期,King Sir教咗我好多嘢,畢咗業後,我同佢都有好多合作同見面嘅機會。嗰次我同King Sir傾我呢個氣餒嘅問題,成個傾偈嘅情景,令我諗起《相約星期二》(英文原名《Tuesdays with Morrie》)呢本書,同樣係一個學生,同一個相識多年嘅老先生巧遇,然後再去傾談人生、事業嘅話題。

陳國邦
舞台劇《相約星期二》年前重演,本來飾演「學生」的盧智燊撞了檔期,結果古天農找陳國邦演出。

「我問King Sir,有冇睇過呢本書,佢話冇,不過將會幫中英劇團演呢齣舞台劇!我當堂震撼到全身毛管戙!然後問佢,可唔可以幫我問中英嘅首腦古天農先生,畀我做『學生』呢個角色呢?」

當晚King Sir問過古天農後回覆他,答案是:唔得!

「我本來好大期望o架,覺得呢個仲唔係個天畀我嘅一個機會?鍾景輝地位咁高,又係娛樂圈人,加埋我呢個薄有名氣、演技得到大家認同嘅演員,呢個組合實buy啦啩!毛遂自薦喎!中英劇團仲唔開心?點知答案竟然係唔得!

「原因係成套戲得兩個演員,鍾景輝已經唔係中英劇團嘅人,如果另一個都唔係,咁應該用乜嘢名目去製作呢?我當時係好唔開心,但亦都好接受佢呢個原因,做戲就係要有呢啲堅持!」

陳國邦八九年演藝學院畢業
八九年演藝學院畢業。「我由細到大都好獨立,入讀演藝,屋企人完全冇反對。」

綠葉王

恨演出的舞台劇雖然只得空歡喜一場,但自此之後,陳國邦卻改變了「要禮物」的心態。「獎,我恨唔恨有呀?恨!正如我問你:你想唔想中六合彩呀?實想o架!想唔想做男主角呀?想!我成日都同啲熟嘅監製講,畀我做男主角呀,不過佢哋通常都係話:『你?綠葉王喎!』哈哈哈!」

紅不紅,多少也關乎到外在條件吧!「記得籮記(羅文)都講過,佢就算落一落街,只要見到人,都會以最靚嘅一面畀人睇!但我真係冇呢方面嘅心思,亦都唔係好願意!我都好想好似林峯咁,着得靚靚,擺個chok樣出嚟,但我真係做唔出呢啲嘢!

陳國邦小學時期
小學時期,陳父最愛帶孩子到咖啡灣游水,故這張沙灘照,他估計就是在那處取景。

「性格使然,我就算出尖沙咀,我都只係背心、短褲,着對涼鞋。嗰次有雜誌喺屋企影相,我本來都只係着條屋企短褲,但老婆叫我着番件衫,我先肯着。哈哈哈!今日呢啲影相嘅衫,我都係問我朋友借,我連西裝都冇一套!」

「我諗,如果問陳國邦點解唔紅,真係衰懶打扮囉!哈哈哈!其實係人都想將自己嘅生活條件得更好,但當我諗到,我嘅生存條件已經算唔錯,諗到我依家都算有車,住嘅環境叫唔錯,又有個好老婆,我又覺得好滿足!

「可以做一份自己興趣嘅工作,仲可以由工作得到依家唔錯嘅生活,我好幸福o架!」

知足常樂,確是人生最大的幸福!

陳國邦小時
陳國邦小時候居於土瓜灣十三街唐樓,上有兩個哥哥,下有兩個妹妹。這是幼稚園時期的他。

與Mimi同行

除了陳禛,另一個會令陳國邦笑得「甜美」的話題,就是太太羅敏莊。

他倆相識於○二年拍《雲海玉弓緣》,劇中飾演鬥氣冤家,日久生情,Mimi有日竟主動跟他說:「我鍾意咗你呀!」但陳國邦只是面紅紅回應:「你唔好咁啦!我好易鍾意人o架!」便行開了。直至下次再見面時,陳便主動拖她的手,一拖,便拖到今天。

兩人相處十年,經常都以「糖黐豆」出現,不避嫌公開晒恩愛。「係o架!我哋好鍾意黐住o架!身體接觸好重要,食飯、瞓覺點解唔錫一錫?就算大家冇望住對方,只係叠住隻手,都係有啲嘢交流緊o架,呢啲感情傳達好直接!既然我哋依家仲係咁愛對方,咁點解唔做多啲?唔享受多啲身體接觸呢?」

查實有時候,他們任何一方接受訪問時,亦會見到另一半相陪,不過,訪問這天Mimi還在坐月,所以陳國邦只能駕駛掛有「Mimi1230」(羅敏莊生日日期)車牌、內櫳布滿Mimi最愛的Hello Kitty的三菱座駕出來,再加上他iPhone的wallpaper兩母女合照,相信總算暫時紓緩他的相思之苦。

陳國邦

陳國邦家養有九隻貓咪,現在陳禛亦跟牠們和平共處一室。
陳家養有九隻貓咪,現在陳禛亦跟牠們和平共處一室。

陳國邦
陳國邦當天駕着太太Mimi的座駕來,車廂內四處見Hello Kitty的蹤影。

陳國邦羅敏莊(紅圈)於○二年《雲海玉弓緣》時認識,○九年十二月四日結為夫婦。
與Mimi(紅圈)於○二年《雲海玉弓緣》時認識,○九年十二月四日結為夫婦。

友荐云推荐

歡迎關注微信

微信
官方微信號:hkchannel

微博評論

返回頂部