《星夢傳奇》只受親生仔玩 鄭世豪清唱《時代曲》挑機

捱咗12年先出頭嘅鄭俊弘,喺《星夢傳奇》一曲成名,嚟緊仲會做巫啟賢演唱會嘉賓。同樣想喺《星夢傳奇》圓夢嘅鄭世豪,唱足 10年東華「卡拉之星」,但《星夢》面試唱咗半首歌就被叮。

同人唔同命,早前鄭世豪一篇微博暗示《星夢》有潛規則,識貨網友即紛紛替佢不值,外貌有8成似NBA球星侯活的鄭世豪話:「我冇眼紅佢(鄭俊弘),佢係值得嘅,我冇得唱,只能認命。之前拍《法網狙擊》,有場戲交代我點死,我覺得係恩賜啦!」

鄭世豪
為咗呢次訪問,鄭世豪除咗自己化妝、髮型自己搞,仲租埋band房,更即席清唱鄭俊弘喺《星夢》唱過的〈時代曲〉,絕對有得鍊㗎!

我由細到大都好鍾意唱歌,細個有咩歌唱比賽都會走去參加。嗰陣冇咩渠道入行,所以咪入訓練班學做演員囉,做咗12年,初頭幾年得5、 6千蚊個月,但我都有畀1,000蚊屋企。o依家好少少啦,我好記得拍07年《金石良緣》,我估唔到自己有連戲角色,仲有得做鍾嘉欣嘅哥哥喎,到咗上年拍《法網狙擊》竟然有戲交代我點死,我覺得真係好恩賜啦!我唔覺自己條路辛酸,我由路人甲乙、死屍做到o依家有對白講,我係上得慢啲啫,喺街啲人認得我做戲已經好開心,就算噏唔出名都唔緊要。

《星夢》只受親生仔玩 鄭世豪:我只能認命
除咗唱歌,鄭世豪仲識打鼓,高登仔話鄭世豪有啲似啱啱轉咗會去火箭嘅 NBA第一中鋒 Dwight Howard(侯活),連佢自己都話:「我笑嗰陣真係幾似㗎!」
除咗唱歌,鄭世豪仲識打鼓,高登仔話鄭世豪有啲似啱啱轉咗會去火箭嘅 NBA第一中鋒 Dwight Howard(侯活)

嗰陣聽到《星夢》話公開招募喎,雖然年年都玩「卡拉之星」,不過《星夢》係歌唱比賽,感覺完全唔同。我準備咗 3首歌,但唱咗半首就俾人叮咗喇!我以為仲有機會覆試,到最後記招我先知夢碎。我好唔開心,係咪我唱得唔夠好呢?定係我唔係經理人約所以冇機會呢,我唔知,但我已經盡咗力,我只能認命,希望遲啲機會飄返嚟我身邊。

其實上年王維基都有搵我㗎,不過嗰時我仲有一年約,之後佢冇再聯絡我,我就同 TVB簽多 2年囉,始終呢行都要講啲際遇嘅,其實我寫真篇微博之後,多咗網友認識我,我已經覺得賺咗啦,你知我係做戲嘅,我已經好滿足。


微博呻爆
前週日( 7日)《星夢》第一集,鄭世豪喺微博發文引起網友注意,他在文中自嘲天真的說:「我唔係妒忌鄭俊弘,我只想同支持我嘅朋友講,我入唔到圍啫!」


每年《歡樂滿東華》都有卡拉之星,鄭世豪唔經唔覺玩咗十年。

採訪、撰文:林通賢
攝影:林迅景

(FACE週刊 第321期)

鄭世豪清唱《時代曲》挑機

友荐云推荐

歡迎關注微信

微信
官方微信號:hkchannel

微博評論

返回頂部