王晶8月開劇卡士大縮水 蕭正楠頂馬明 汪明荃執葉德嫻二攤

FACE週刊 第322期

王晶監製的TVB時裝豪門恩仇劇,本來屬意影后葉德嫻及力谷上位的馬國明來演,可惜說好的影后唔拍,而馬明則因冇期而失埋蹤,如今搵來汪明荃和蕭正楠頂上!唔係話阿姐唔夠班,硬係睇落冇咁興奮咁囉!

王晶為TVB拍新劇當然唔衰得,首要選角夠煞食,籌備初期已爆響口指明有威尼斯影后葉德嫻(Deanie)助陣,男角則最想搵馬國明及近年威到去內地的劉愷威。雖然劇情都係大家族爭產,不過陣容有新鮮感算有期待。

蕭正楠
蕭正楠今年算狀態大勇,重頭劇《巾幗Ⅲ》和《巨輪》等住播。他對於頂替馬明拍王晶劇更表示好開心。《蘋果日報》圖片
好開心接到套劇呀!(真實對白)

人面全非 王晶 8月開劇卡士大縮水 蕭正楠頂馬明 阿姐執葉德嫻二攤
剛續約無綫的馬國明,有傳 TVB將力捧他做今年視帝,可惜冇檔期拍王晶新劇太嘆:「好失望好可惜呀!」
好失望好可惜!(真實對白)

珍姐薦楊怡

據知新劇本來下月初開鏡,將北上到天津、北京、上海等取景,但因籌備需時,現延至 8月尾開拍。演員方面更加令王晶頭痛,據知8年冇拍電視劇的 Deanie姐已推辭,而馬國明亦因要趕拍《寒山潛龍》冇檔期,晶哥惟有易角,改由汪明荃和蕭正楠頂替,跌晒watt難免令觀眾失望,而劉愷威本來也因為要拍攝內地劇《一念向北》而辭演,現在王晶推遲至8月尾開鏡,劉愷威可能接住開工。

其他演員則會有李詩韻演年輕版汪阿姐,老公是視帝黎耀祥,另外唔少得晶女郎童菲和唐嫣;而據知楊怡得到高層曾勵珍點名有機會參演,但她正忙於拍攝《守業者》,加上王晶唔太欣賞楊怡演技,令楊怡入劇成疑。

對於臨時換角令卡士縮水,王晶上週一在微博回應網民時,表示「那來的?早沒葉德嫻了」,但沒有解釋原因。上週記者致電晶哥,他更只說:「套劇好多嘢都未定!(係咪換角?)o依家唔講得畀你聽住。」便匆匆收線。


王晶拍劇懶神秘唔肯透露太多,卻在微博暗發功,表示 8月開鏡,有網民稱好期待葉德嫻拍劇時,又回應早就沒有她了。

馬明:好失望

而頂替馬國明的蕭正楠回覆時表現興奮:「好開心接到晶哥套劇呀!(聽講你頂咗馬明個角色喎?)唔知呀,公司安排嘅!」他又表示8月開工,將會拍30集,拍得晶哥新劇,蕭公子更不惜放棄參加《星夢傳奇》:「套劇要拍3個幾月,又要返大陸拍,一上一落都好麻煩啦。」

蕭正楠興奮,相反失落主角的馬國明週一(22日)在電話中始如夢初醒:「3、 4月時聽過晶哥開劇提起我,嗰時知道係有葉德嫻份,我好開心呀!後來又聽聞要年尾至開,未有人搵我呀!」當得知角色已換蕭正楠,他即好失望話:「係咩?我唔知喎!我未同過晶哥同汪阿姐合作,梗係好恨啦!可能我拍緊《寒山潛龍》要拍到10月,8月又要去象山所以公司度唔到期啦,好失望好可惜呀!希望以後有機會合作啦!」冇咗上位馬明同殿堂Deanie姐,削咗囉!

愈換愈削

王晶新劇講大家族情仇,由汪明荃飾演的揸 fit人,育有三子,劇情圍繞家族內鬥,而該劇將會到天津、上海和北京取景,劉愷威有機會 8月尾在上海會合劇組。

甩底
葉德嫻前年憑《桃姐》奪七料影后事業再創高峰,若然再拍電視劇當然有收視保證,可惜觀眾要再等吓喇!

取代
飾家族話事人
汪阿姐表示將會為王晶新劇上天津及北京拍攝兩個月,被問到酬金有冇林峯咁勁去到七位數字,阿姐說:「冇!林峯紅嘛!」

落實
飾少女汪明荃
李詩韻在劇中飾演年青版汪明荃,睇落面形有八成似。

落實
飾汪丈夫
黎耀祥有份做男主角,不過怕睇厭囉。

落實
飾兒子
新紮蕭正楠被公司力谷,今次有份做汪明荃3子之一。

落實
飾兒子女友
晶女郎童菲拍過幾齣電影都唔多起眼,今次博拍劇只怕佢廣東話仲衰過JJ。

待定
飾兒子
離開TVB已8年的劉愷威,被王晶點名回港拍劇,能否成事要遲啲至知。

待定
楊怡因晶哥唔多 like,未必可借此劇攻內地。

《賭神4》代志偉賀歲

除電視劇之外,王晶的《賭神》第4集《誰與爭鋒》原本5月開鏡,但因曾志偉以慶祝60大壽為理由唔拍賀歲片,《誰》接棒成為邵氏賀歲片延至11月開鏡。周潤發再演賭神,至於其他角色,據知製片公司邵氏曾要求晶哥加角色起用TVB演員,如徐子珊和胡杏兒等加入,但遭晶哥拒絕,嚴禁套戲有電視味,暫定由謝霆鋒飾演賭神徒弟刀仔,更會調轉槍頭與周潤發對決,非常吸引。

《Aerobic Girls》 張慧儀搭上陸永

除咗王晶,曾志偉亦為無綫拍劇救亡,打人情牌找來中女李若彤、葉蘊儀、李麗珍、袁潔瑩、陳慧珊、張慧儀和江欣燕等出山拍《 Aerobic Girls舞室保衞戰》,年輕版則有糖妹、陳嘉寶、王敏奕和組合 SuperGirls的 Cheronna及 Heidi。這齣似足韓片《陽光姊妹淘》的新劇還大搞忘年戀,除了李若彤做主角由頭帶到尾外,39歲張慧儀在劇中跟比她細 8年的陸永搞埋,繼續 TVB近來的重口味。

39歲張慧儀跟 31歲陸永玩忘年戀,觀眾受唔受?

评论回复