TVB重拍經典劇 楊怡變鯉魚精 馬明演流氓皇帝

FACE週刊 第328期

無綫近年劇集多被轟劇情老土兼犯駁,叫做有新諗頭的劇集如《天與地》、《神探高倫布》及《金枝貳》等,收視都未如理想,神劇唔啱師奶口味,冇市場。

為救收視,據知無綫已決定全面大懷舊,除了下令禁止再拍重口味cult劇外,更準備重拍兩套上世紀 80年代經典劇《無雙譜》和《流氓皇帝》,其中《無》劇更屬意找楊怡擔任女主角,而近期勁hit嘅馬國明則再演鄭少秋的《流氓皇帝》,兩套劇重新出土,擺明對準師奶胃口, 90後o靓仔當新劇睇算啦。

最近無綫多套重口味劇都收視慘淡,早前無綫助理總經理區偉林更公開稱:「要觀眾用腦去深究嘅劇,如《神探高倫布》、《金枝貳》等所謂沉重劇,明年會 out。」區偉林又稱來年會加重喜劇和武打劇比重,實行將 TVB劇集全面易明化。

橋唔怕舊 TVB戒cult減口味 楊怡變鯉魚精大懷舊
前週無綫吹雞在北京舉行晒冷儀式宣傳內地新公司 TVBC,楊怡被力捧當然要企喺前排。

一月開工

為了配合新玩法,無綫將於下年 1月率先重拍 81年由李司棋任女主角的《無雙譜》,據知新版《無》劇由高層曾勵珍發板,女主角亦屬意由楊怡演出,至於 4月則重拍另一套 81年由鄭少秋、李司棋孭飛的經典《流氓皇帝》,當年秋官朱錦春一角據知暫定由紅爆的馬國明擔任。

對於事隔 32年再重拍經典,當年在《無雙譜》扮鯉魚精而爆 hit的李司棋,據知亦已預留一角,她早前在電話中表示重拍係好事,但原來岑麗香先係司棋姐的女角心水選擇。司棋姐說:「應該一早重拍啦,o依家啲特技咁先進,可以拍得好好睇! TVB未搵我呀,不過我做乜角色都冇所謂嘅,楊怡好,我都同佢合作過,馬明都好好,當頭起呀,不過我覺得岑麗香適合啲,佢係全 TVB最可愛嘅花旦,又靚女又後生,我覺得佢做鯉魚精會好適合。」而馬明和楊怡則因身在內地拍劇,截稿前仍未回覆。第一代主角開到口,唔知珍姐會唔會考慮吓岑麗香呢?


TVB來年亦加強外援幫拖,據知下年 4月將開拍由梁家輝搭林峯的重頭劇《只爭朝夕》。

《無雙譜》鯉魚精最經典

1981年播出的《無雙譜》,當年由甘國亮監製,戚其義仲做緊編導仔。故事分為三部分,由李司棋飾演的鯉魚精則在首部〈易釵〉和尾部〈追魚〉中出現,為劇中最重要角色之一,由於劇中有不少神怪場面,特技在當年來說算好新奇。


當年 30歲司棋姐飾演的鯉魚精,唔會勾引男人,反而幫人伸張正義。

岑麗香適合啲!(真實對白)事隔 32年,當年索爆的司棋姐如今變甘草。

34歲珍姐指定雖然珍姐想由楊怡做鯉魚精,但司棋姐就話岑麗香啱啲,話佢係「全 TVB最可愛花旦」喎!

28歲司棋姐心水

《流氓皇帝》皇帝變乞兒

同樣於 81年出街的《流氓皇帝》,故事講朱錦春由皇帝到淪落為乞兒的一生,最後在港重逢愛人蓉蓉(李司棋飾),劇情勝在夠晒奇情。


經典重逢秋官在片末於香港重逢蓉蓉,被指為當年最感人劇情,主題曲〈愛在心內暖〉更是經典作。

馬明曾在《回到三國》中扮老人,演朱錦春應該冇難度。

秋官在《流》劇中扮演溥儀皇帝嘅「影武者」,最終醒覺唔再幫日本人,輾轉流落香港。

翻炒埋《獅子山下》

除咗已落實的《無雙譜》和《流氓皇帝》, TVB亦有意以仿照 70、 80年代的經典實況劇《獅子山下》的形式,環繞小市民生活拍成短劇,替代現在《愛.回家》式的處境輕喜劇。據知 TVB更有意招攬大量新面孔及外援加入,每輯故事均有不同主角,唔使晚晚對住同一班演員咁悶。


《獅子山下》有勁多星演出,如當年未紅的周潤發亦有份參演。

家陣《愛.回家》不停添食,不過同一班演員做足成年,劇情又婆媽,觀眾好易睇厭。

亞視重拍《天蠶變》

除了 TVB翻炒經典,最近連個個嗌佢執笠算嘅亞視,都打算重拍 70年代經典《天蠶變》,當年《天》劇由徐少強飾演的雲飛揚,令徐少強紅遍港台。據知亞視想邀請徐少強和雪梨所生的兒子徐偉棟和楊恭如演出,但所謂重拍,其實都係跟內地合作,分分鐘內地播完先到香港播。

评论回复