拍《愛.回家》撻着1年 羅天宇湯洛雯首爾蜜遊

日久生情,拍劇最易撻着,尤其電視台咁多靚女出入,如果你屋企有貨時間又多,無綫都不失為溝女好地方。

喺《愛·回家》做怕醜仔嘅羅天宇,實情溝女技巧異常高超。 08年選港男後,身邊一直未愁過冇女。上年仲同劇中拍檔湯洛雯撻着,前週四( 11日)二人仲趁有 3日冇通告,即飛去首爾開心吓。不過羅天宇死撐話:「我哋係朋友啫,都唔知有冇得發展!」。吓?咁都唔係女友?唔係啩?

孖住離家 《愛.回家》撻着1年 羅天宇湯洛雯首爾蜜遊
機艙挨埋
飛機途中,湯洛雯成個頭挨咗落羅天宇膊頭,仲揸住本首爾旅遊書,點睇都唔似朋友咁簡單啦!

26歲羅天宇於 08年參加港男入行,終於喺《愛.回家》捱到個穩定角色撈吓。事業剛起步,女人緣更一直暢旺。

前週四( 11日),羅天宇和湯洛雯趁住《愛.回家》冇通告,一齊到首爾閃速旅行。所謂寧被人知莫被人見,佢兩個全程都相當避忌。上咗飛機後,湯洛雯先放低警戒心,挨咗落羅天宇膊頭小睡片刻。去到首爾兩個雖然前後腳行「扮單拖」,但出名細心嘅羅天宇仲幫湯洛雯拉喼,又負責問路 book車,相當 gentlemen。雖然佢哋做足晒男女朋友應該做嘅嘢,但係羅天宇上星期五( 19日),仍然死撐話:「我哋同行有 4個人去,(幾時正式公開女友?)我哋係朋友啫。(見過你媽咪未?)冇呀!都唔知有冇得發展?!但佢係一個好好好嘅女仔!」咦?唔通佢嗰兩個朋友係隱形俠?


輕裝上路
去首爾 3日,兩人行裝相當方便。羅天宇得一個背包跟身,湯洛雯就得 1個細喼,全程由羅天宇拖住。兩人同樣上身白下身黑,低調情侶裝啦!

黑超情侶
二人搭早機,兩人全程帶黑超,機上羅天宇食唔停,反而湯洛雯就冇咩胃口,發呆睇電視。

落機後,可能兩位怕有港人認得,所以刻意分開行,不過就冇羅口中嘅朋友同行喎!

慳坐巴士
二人今次旅行相當慳家,除咗搭經濟客位外,亦去詢問處問坐巴士路線。

羅天宇、湯洛雯二人上年因拍《愛?回家》撻着,二人喺劇中同林師傑(木偶哥)有三角關係。電視圖片

怕醜仔食女唔使用劍嘅!

怕醜仔羅天宇,除咗外形靚仔,家人喺蠔涌路成豐片場開燒烤場及茶餐廳生意,都算係太子仔。難怪佢溝女戰績亮麗,舊愛有華姐冠軍苟芸慧,現任亦係港姐湯洛雯。問到佢溝女有咩心得,羅天宇好怕醜地答:「唔好意思,我唔識答呢啲問題。」天生溝女王,識都唔教你啦!


嗒過o靚模
09年拍《南華夢飛翔》,開拍冇耐即同劇中對手 DaDa Lo(盧頌之)拍拖。

飲過咖啡
同o靚模DaDa Lo拍拖幾個月就甩拖。羅天宇又同《南華夢飛翔》另一拍檔 Coffee撻着,二人仲拍下唔少親蜜照。

食埋女神
11年羅天宇失驚冇神溝到宅男女神苟芸慧,可惜二人拍拖期間備受壓力,終係 12年中分手。

拖過細妹
同湯洛雯拍拖前,羅天宇亦同過劇中飾演其胞妹嘅蔣家旻拍拖,二人被拍得喺無綫飯堂撐枱腳。

评论回复