浪費9年青春越做越霉 高鈞賢離無綫不再扮色魔

九年前只有21歲的高鈞賢,由加拿大返港參加首屆香港先生選舉,以大熱姿態勇奪冠軍,獲司儀鄭裕玲高度讚揚,並跟無綫簽下八年長命約。以為從此一帆風順的他,怎知越做越霉,由第二男主角淪落到二打六的角色,他慨嘆說:「我都唔知點解,做咗好多非禮女人角色,喺《寒山潛龍》要非禮阿婆添,甚至有節目講生痔瘡,我好唔想去做,但係覺得作為簽咗合約嘅藝員,做番應份嘅嘢,我都有去做。」多年來被無綫投閒置散,高鈞賢終於決定約滿後離巢,不再依靠TVB有名無實的遮蔭,孤身北上內地發展賺人仔。

浪費9年青春 越做越霉 高鈞賢離TVB 唔使再扮色魔

今日是高鈞賢在無綫的最後一天,約下午3時許,他駕駛二手波子返公司執包袱,紙皮箱載滿他九年的回憶,包括粉絲為他拍攝及多年來在無綫拍下的相片,還有外套、籃球等,同事知道他離去,送了一本TVB周刊給他留念,高鈞賢還特別買了一份下午茶,品嚐在無綫的最後一餐。

問到為甚麼離開TVB?高鈞賢說:「喺加拿大睇無綫劇覺得幾過癮,盲中中返嚟做咗香港先生,可以話夢想達成,嗰時好開心,好多人認識我,無綫都畀一份好吸引合約我,自己感覺好有衝勁,二話不說簽咗八年,即刻同家姐一齊供樓供車,當時$15,000人工,將軍澳層樓300幾萬,都有少少博。初時有好多唔同工作,拍劇、節目,之後拍古裝劇《幕後大老爺》做第二男主角,自己中文水平二年班,要攬住劇本瞓覺,雖然不斷努力,但達唔到監製理想,好多監製怕咗用我。」

知恥近乎勇的高鈞賢,花錢請教戲老師學演技,雖然自覺有進步,但工作卻越來越少,他說:「到第五年公司同我講,呢一年差咗啲,所以呢年合約要凍薪,但要加簽一年,當時人工去到$25,000,自己想喺呢行繼續做,同公司講唔要求做主角,希望慢慢進步嘗試,公司話OK,所以簽咗呢份約。」怎知之後幾年公司卻將他投閒置散,他說:「好多街坊問呢排做緊乜?我好想答佢哋,但答唔到!」

由於要供樓供車供保險,生活壓力令他透不過氣:「嗰時諗係咪真係要繼續呢?懷疑自己係咪有抑鬱,因為唔敢出去面對人,嗰段時間冇乜工作,每月咬住得三、四千蚊使,死撐冇同任何人講,我有睇醫生,但每次藥費$1,000太貴,最後決定自己解決。嗰排冇工開成日打籃球,有次腳傷入院,好深刻係父母嚟探我,阿爸問我攞銀行戶口睇,我即刻喊咗出嚟,點解畀唔到更好屋企人,當時戶口淨番五萬蚊。」

高鈞賢為堅持在這行發展,甚麼角色都肯做,問對無綫是否很失望?他說:「大家timing唔夾!自己畀咗九年時間,公司最尾一年先挽留同加人工,令我喺好唔開心同惆悵狀態下離開。呢九年雖然有啲時間浪費咗,但畀到我經驗同經歷,o依家30歲選擇呢一步,希望有新開始,之前去咗北京,有幾間經理人公司都想簽我,其中一間條件唔錯,呢兩個月自由身,享受鬆一口氣感覺,之後會上北京定居同做嘢,重新出發。」

高鈞賢
9年了…

高鈞賢
高鈞賢回望舊公司

高鈞賢
仲買咗個tea,做最後下午茶

高鈞賢
fans同佢影嘅相

高鈞賢

高鈞賢
9年前嘅高鈞賢

高鈞賢愈做愈霉離巢北上 其他港男去咗邊?

參加香港先生選舉入行嘅高鈞賢,喺無綫9年愈做愈霉,做到心灰離巢北上發展,而其他的港男發展亦大有不同,不過多數都係星途暗淡。

黃長發
06年港男冠軍,於09年搭上鞋王鄧劍群三奶李姿霆,同年離開娛樂圈,現職會計師。

黃長興
05年香港先生,奪得最突出表現組別大獎,近年鮮有拍劇,現於北角開設法國餐廳,12年與圈外女友在法國註冊結婚。

彭罡原(前名彭冠期)
05年奪得香港先生最突出表現個人大獎,拍過四部電視劇,09年全裸參與雲翔執導的《安非他命》,現已轉行做飲食業當日本菜師傅。

黃文迪
08年參加港男選舉,奪香港小姐眼中最具智慧的香港先生,與呂慧儀婚後,剛榮升做老竇。

白健恩
10年港男冠軍,於劇集《法網狙擊》中扮演強姦高海寧。曾涉在同志聊天室招攬賣淫生意,事後他發聲明澄清。

第二頁:高鈞賢轉行整車

评论回复