江華克服情緒低谷 52歲轉行賣保險

現年52歲的江華,從影以來先後拍過不少劇集,其後因為在劇集《西遊記》中演唐三藏而走紅,不過最近十年他淡出幕前,原來當年因為腰患而影響生活,情緒一度出現壓力,反思過後,最後走出陰霾。為承諾而加入保險行業的他,直言每天努力學做人,「凡事謝恩,珍惜當下」更成為他做人的座右銘。

被喻為「比劉德華更加劉德華」的江華,06年有傳他因腰患導致抑鬱症而停工休養,在鏡頭前消失了近十年,江華最近被讀者發現他轉投保誠做保險。久違了的江華,昨日在沙田接受《蘋果》訪問,雖然他依然保存比「比劉德華更加劉德華」的感覺,不過言談間似乎少了一份執着。

江華克服情緒低谷 52歲轉行賣保險

對於當年被傳患抑鬱症,他笑着否認說:「傳聞嚟啫,當年拍完《紅拂女》喺北京宣傳,我發作得好嚴重,腰腿出現嘅問題,導致我精神好有壓力,以前諗都唔諗呢啲事,點解一個人行得走得食得瞓得,突然間會變成乜都唔得?嗰陣我習慣咗無論係坐呀、行呀、企呀,十項全能乜都係控制喺自己手度,但係突然做乜嘢都唔得,慢慢就有好多恐懼,跟住又開始諗,我係咪一世都係咁?我好驚,好擔心之後會唔會癱,咁我老婆同仔點?會唔會搵唔到食?」

江華強調自己從來都沒有放棄搞電影,一直有跟投資者傾談,今次加入保險行業,原來背後有一個故事,他說:「我相信每一件事嘅出現,都有佢嘅美意。我有一個好耐冇見嘅朋友,有一日突然搵我見面,食飯嗰晚我問佢做保險做得好唔好,佢話由我識佢嗰日做到o依家,連續十年都係頭五位,不過佢話佢嘅團隊只係得佢自己一個,於是問佢點解唔搵人加入,最後傾傾吓佢話如果我肯加入,就會搞團隊,所以咪因為呢個承諾而加入保險。」似乎感覺冥冥中有安排,他笑說:「梗係啦,如果唔係無端端會做保險,不過我諗嘢同其他人有啲出入,主要唔係叫人去買,反而係主動同人做朋友,想識多啲人,呢個係我自己睇法。」

當劉華劉江華劉江兄弟

江華向來與劉德華的名字連成一線,近年被網民再發揮創意,加入劉江和劉江華,變成一個四人新組合。昨日與江華談到此事,他哈哈大笑說:「我有聽過呀,咁好呀,我咪多咗幾個兄弟!做人真係冇所謂,最緊要好玩。」甚至提到當年他為節目做評判,嚴評參賽者之一的「娃娃舜」,有網民呼籲尋找娃娃舜,讓他們再聚,江華說:「世界就係咁,每個時代都有佢嘅玩意,有啲人會好介意同唔開心,其實只要明白個道理,笑吓咪算,我自己唔介意,要介意出道嗰陣已經介意咗,到今時今日仲介意,咪自己攞嚟辛苦,自己抵死!」

憑《九五至尊》贏獎攀高峯

經常被指「比劉德華更加劉德華」的江華,今年52歲,原名陳木華。86年參加亞視藝員訓練班入行,曾以《但願人長久》奪金像獎最佳新演員,95年離開亞視。

江華曾與鄧萃雯合作《我和春天有個約會》時傳緋聞,更有雜誌影到他於雯女家過夜,但江華與太太麥潔文及雯女齊聲否認。之後江華轉投無綫,於《西遊記》飾演唐三藏而廣為人識。03年他憑《九五至尊》皇帝雍正一角奪得我最喜愛角色獎,事業攀上高峯。05年完成劇集《鳳舞香羅》後離開無綫,之前因腰患致患上情緒病,三個月前轉任職保險從業員。

评论已关闭