《愛我請留言》黃翠如黃浩然招風雨開工

喺有線過咗嚟無綫嘅黃翠如,呢期熱到爆,雖然《師父˙明白了》收視唔算太理想,但得到巨星發哥周潤發點名話翠如BB幾好,即刻人氣再升啦!
呢排翠如BB忙緊為新劇《愛我請留言》開工,上星期五(2日)下晝四點幾,翠如BB同好拍檔黃浩然,仲有個約六歲嘅小妹妹一齊喺灣仔星街拍外景,場戲好簡單,只係講浩然抱住小妹妹喺街度行,搭緊的士嘅翠如BB經過見到。
不過由於當日天氣唔穩定,間中會落雨,所以佢哋趁冇雨時好快拍咗一次,拍完翠如BB、浩然等一齊睇帶,咁啱又開始落雨,原本佢哋想停雨再拍,點知越落越勁,最後被迫收工,翠如BB就坐公司車走,浩然則自己揸車走,浩然見記者都友善揮手。

《愛我請留言》黃翠如黃浩然
■翠如BB同黃浩然、小妹妹拍完一個鏡頭後,齊齊細心看重播片段。

《愛我請留言》黃翠如黃浩然
■已經有兩個囝囝嘅黃浩然,抱起小妹妹做戲可謂駕輕就熟。

《愛我請留言》黃翠如黃浩然
■拍攝時天氣麻麻,又雨又汗,浩然要麻煩工作人員幫佢補妝。

傳接拍新片

翠如BB除咗忙拍無綫劇外,有傳佢會接拍驕陽電影公司嘅電影,因為驕陽係有線嘅姊妹公司,所以惹嚟網民一陣討論、揣測,啲網友仲話唔通翠如BB要離開無綫?不過前日問過翠如BB,佢話冇聽過公司要佢接拍呢套戲,所以應該係流料,大家可以繼續喺無綫睇到翠如BB喇!

《愛我請留言》黃翠如黃浩然
■新劇出街有發哥讚好,翠如BB梗係笑得開心啦。

《愛我請留言》黃翠如黃浩然
■翠如BB噚日拍坐的士戲,點知拍咗一次就落雨,被迫收工。

《愛我請留言》黃翠如黃浩然
■翠如BB拍完戲落的士有工作人員幫佢擔遮,避免整花個妝。

评论回复