馬賽復工強忍淚水 拋佛偈贈舊愛汪子琦

受到艷舞片流出影響嘅馬賽,雖然俾TVB暫停所有工作,但今日一個時裝騷,因為係件事發生前接落,所以佢仍然有出席。

今日下午5點半,馬賽孖實姚子羚行Catwalk,既打頭陣亦有壓軸演出,頗受重視,不過佢似乎受到艷舞片流出困擾,個樣都幾緊張,表現有啲生硬,不過都有保持笑容。而佢塊面就有少少腫,又似唔太上妝,右邊面仲生咗粒瘡,而今日行騷嘅裝飾就唔性感,但都騷下佢一雙腿。

行騷之後佢就同大會老闆合照同祝酒,之後喺經理人陪同之下做訪問,因為現在有近百傳媒,所以場面一度混亂。

馬賽復工

避走內地強忍淚水 馬賽一提經濟狀況喊爆

馬賽今日在流出艷舞片之後首次開工,佢喺經理人陪同底下接受訪問,問佢心情如何,緊唔緊張,佢第一個反應就係雙手合什話:「對唔住,搞到你哋咁辛苦,多謝你哋關心,見到你哋大家咁辛苦,多謝經理人同Elaine(姚子羚)喺後台好鼓勵我,呢個工作一早接咗,有責任出席,係尊業態度。」有冇諗過唔出席?佢話:「呢個係藝人操守,提醒自己努力做好,感謝公司同客戶無因事取消,感恩畀機會我。」

問馬賽依家外面有冇工作?佢話暫時冇,講到樂易玲話佢返咗內地同家人住,佢承認話:「發生好多事,想盡量返屋企陪佢哋,一家人相處好啲。件事令家人好擔心,想陪多啲佢哋,好SORRY件事影響好多人,好似公司同事,家人,朋友,以及好尊重嘅前輩,真係好對唔住。」

問到佢口中前輩係咪劉松仁?又有冇send過短訊比佢?馬賽話:「連累好多人,唔止松哥,好多尊重嘅前輩俾我私事影響。」咁究竟有冇發過挑逗短訊?佢就唔回應話:「陳詞證供講得好清楚,自己冇擁有條片,亦無SEND過俾任何人,依家香港警方重案組,自己律師團隊,香港個人資料私隱專員公署都調查緊件事,香港係法治社會,相信公義法律保護到每個公民。」

訪問期間,馬賽一直都強忍淚水,一問到佢依家冇工開,經濟狀況係點,佢就流眼淚話:「呢一年我有大半年都係靠屋企,好感激佢哋,我唔可做任何嘢,令愛錫我人擔心。」至於被汪子琦指馬賽母女貪錢,要求6百萬同樓,馬賽就冇回應。問佢法庭落咗禁制令係咪冇咁驚?佢話:「感謝律師團隊不眠不休做呢件事,好彩香港係法治社會。」

>避走內地強忍淚水 馬賽一提經濟狀況喊爆

拋佛偈贈舊愛:萬法皆空,因果不空

問到佢係咪最介意私人性事被公開同最Hurt?佢話:「我自己根本唔敢睇啲訪問,叫人唔好俾我睇,人哋要講乜做乜我控制唔到,如果一段錯誤嘅感情,有一個咁災難性、毀滅性結果,我係成年人,自己要承擔,最Sorry係影響人為我擔心。」

講到之前富婆Laura指馬賽一早知佢同汪子琦已經結婚,但仍然叉隻腳入去做小三,馬賽就避談:「我自己唔敢睇呢啲新聞,無回應,因為控制唔到。」

有冇恨佢哋講咁多傷害嘅說話?馬賽此時就眼濕濕話:「呢一年發生好多嘢,我都想以我例子同所有女仔講,一定要識保護自己,自己得到好大教瞓,交朋友要慎重,喺重大選擇時要聽家人、長輩嘅說話,唔可以自以為事同任性。」

咁有冇後悔識咗佢哋?馬賽話:「我信咗佛,半年前信,相信好多嘢認命,惟一做好自己係面對,今日好緊張,面對大家。」問佢係咪發生咗事信佛?佢話:「今年2月機緣巧合之下信。」

汪子琦指係馬賽自己主動跳艷舞,馬賽話:「冇回應,我信佛,佛教有句說話『萬法皆空,因果不空』,好多嘢唔一定要追求,尋求結果同答案,因果會俾到答案,信佛係一個得着。」

家人出錢助打官司

問到自殺傳言,馬賽今日話:「呢段時間好難行,好難捱,最難嗰個星期自己乜都冇去睇,冇去想,好彩好多朋友,親戚,同事俾好多鼓勵同支持,無論發生咩事都唔可以傷害自己,係為咗佢哋(親友)同家人。」
咁有冇睇精神科醫生?馬賽話:「由今年一月開始睇醫生,之前有抑鬱,好難捱過去。」咁有冇加重食藥?佢話:「有食幫助平復心情嘅藥。」咁依家係咪仲係抑鬱?馬賽表示:「我有好多時都會,但無研究過病徵,醫生有藥物幫助,我信佛,有朋友支持。」

問到佢打官司嘅律師費係咪自已俾,佢主動話:「唔關無綫事,屋企人幫我俾。」咁依家係咪暫停所有工作?佢話:「係,等公司安排,未知休幾耐,打算利用呢段時間讀啲COURSE增值自己。」咁有冇聯絡汪子碉同Laura?,佢話已經冇聯絡。

問佢以後交朋友係咪有戒心?馬賽語重心長咁話:「交朋友要謹重,要聽人勸,以前好反叛,任性同自以為事。」家人反對過?佢話:「感謝一班人好錫我,自己任性要自己承膽返。」說罷就擰轉面抹眼淚,整個訪問長達13分鐘。

之後馬賽離開時行後門,冇自己揸車,坐七人租車離開,七點半返到清水灣半島寓所。

评论回复