高俊文遭無綫冷待 被汪明荃罵完即失角色

55歲高俊文(圖),是1977年無綫藝員訓練班出身,他自稱年資高,履歷淺,78年因為被指拒接監製王天林的通告而無奈離開無綫。他說:「每個藝人都有辛酸史,當年因為資訊冇咁發達,我又冇錢出call機,話我拒接通告,之後重複解釋都冇用,2000年再返無綫,嗰張拒接通告memo紙仲係度,呢個對我打擊比較大。」

拍劇受傷告公司被罵

22年後他重返無綫,又再遇打擊,他說:「2005年拍《楚漢驕雄》我墮馬受傷,同公司有訴訟,因為公司只係賠勞工保險,我斷鎖骨又有好多後遺症,好難接通告,所以我有咁決定,結果我勝訴,但係當時個監製(《楚》劇監製為李添勝)話我告公司多餘,仲叫我諗清楚,之後佢都冇用過我。」

及後,高俊文接拍《我的野蠻奶奶》飾演皇帝一角,他本來歡天喜地,怎料第一日拍攝即遇着「阿姐」汪明荃,高俊文表示:「嗰日我自己唔爭氣,好多NG,阿姐就話我冇做功課,我唔係一個唔出聲嘅人,之前一日我仲上去搵監製問角色,我只係同阿姐拗咗幾句,第二日就換角,我覺得好冇面,好肉酸,呢個都幾大打擊,公司冇同我解釋就換角,我非常唔舒服,某人權力真係過大。」

噚日高俊文喺政總繼續扮蘇局長,仲提到當年喺TVB拍《我的野蠻奶奶》,因為俾阿姐鬧而易角。
噚日高俊文喺政總扮蘇局長,仲提到當年喺TVB拍《我的野蠻奶奶》,因為俾阿姐鬧而易角。

汪明荃:我邊有呢個權!

汪明荃同多名粵劇名伶今日喺鑽石山出席粵曲活動,對於前無綫藝員高俊文自稱當年同阿姐拍無綫劇集《我的野蠻奶奶》,佢當日飾演皇帝,首日開工就因為NG俾阿姐鬧,最終仲失去該角色,問到係咪有件咁嘅事?阿姐話:「我又唔係導演,邊有呢個權!咁耐以前嘅事亦唔記得。」問到有冇試過影響人生計畫?佢話:「嘩!咁講好嚴重喎,角色冇咗係導演安排!我只係演員,最多咪叫我一聲阿姐,冇叫過人唔好用佢。」

评论回复