愛君如夢 陳豪

FACE週刊 第338期

本人不是陳豪的粉絲,不過兩次與陳豪訪問,兩次都不小心被他迷惑了:笑容怎麼會這麼可掬?態度怎麼這樣誠懇?不論遇到好的壞的,為甚麼都能沉着都保持風度?
至於傳媒界的行家……上個月我在行家們的社交網絡上看到這麼一幅相片:二三十個記者在接機大堂熱情簇擁着他和他挺着大肚子的老婆陳茵媺,儘管為接陳太班機等到凌晨五點,可是大家臉上都沒有難色,與陳豪站在一起同樂,就像是老朋友。
然後是這天拍照,同樣的燈光和背景,陳豪坐下我們嘖嘖稱好:「十足《君子雜誌》!」換了攝影師坐下,連攝影師也忍不住耻笑自己:「我影係咪變咗《小人雜誌》?」……
這一刻,我想通了,我們不是定力低被迷惑,而是從心底被陳豪的氣度折服。當紅男星擺出君子駕勢拍封面的很多,但是行為說話真正讓人折服的,其實很少。
陳豪說,兒子雖然聖誕才出世,但是該怎麼教養他,早有想法:「本性決定每個反應同行為,扮都扮唔嚟。能力可以學習、智慧可以累積,但係 mind set,要由父母從小扶植確立。正如我嘅性格,真正嘅功勞,其實屬於我媽媽。」
這個世界,筍盤難求,君子更是罕見。

陳豪

君子不妄動

二千年正式從影圈跳進電視圈,效力無綫 13年的陳豪,今年離巢新聞傳個不停。正在播出的《法外風雲》本來有說是陳豪最後一部無綫劇,不過到了六月結婚、太太有喜,傳聞版本一變再變:有的說陳豪為妻兒豁出去,鐵定離巢向外闖,亦有說陳豪為妻兒打消念頭,穩打穩紮向電視台妥協「加監」。
自從我做咗丈夫、做咗父親,連人生觀都改變晒……「自己」唔見咗,有咩事都家人行先,發現自己曾經浪費好多時間,好想去追番啲時間,做更多嘢提供幸福畀佢哋。
所謂嘅浪費時間,係嫌自己過去唔夠進取。我父親早逝、媽媽忙住工作,三兄弟從小到大喺無父蔭庇佑下自由成長,做每件事,冇人同我講啱定錯,三兄弟於是都係自己做、向自己負責,自己錯再自己從中學習。再加上出嚟社會打滾,一路從錯誤中學習,智慧就喺當中一點一滴中浸番嚟……當你知道後果後,每一步每一個決定就唔會輕舉妄動,面前有兩個選擇, A同 B都冇錯,但係附帶條件同實行後嘅連鎖反應就會影響深遠,我自然要衡量清楚再去做。
呢個亦都係我最大嘅缺點,太多顧慮、太優柔寡斷,行每一步身邊每個人都喺度等我:「點嘛……你諗完未呀?」……哈哈。
結婚以後,我開始變得進取,同時亦想進取中求穩陣。生意要做、人民幣要賺,但係電視台嘅合作關係亦都繼續。的確係,我希望自己有個更好更大嘅發展空間。我仲未遇上一部我認為嘅真正代表作,呢幾年我行得順啫,花無百日紅,並唔代表將來觀眾都仲想見到我。以前一支公,我尚且三思而後行,o依家我仲有老婆仲有仔,行每一步要更加謹慎。

君子坦蕩蕩

上一次訪問陳豪,是剛與廖碧兒結束六年情、剛開始拍《心戰》與對手陳茵媺傳出緋聞時,這回則是與陳茵媺婚後首個劇集宣傳期,兩次都是熱門新聞人物,兩次約訪陳豪都沒有耍手擰頭。老老實實,新聞人物慣常的手法總是在風頭火勢時避見記者避做訪問,焗住蒲頭亦會黑口黑面甚至不設提問環節,所以我說,總是坦蕩蕩的陳豪盡得媒體歡心,並非無緣無故。
藝人都係一個完整嘅人,身上有優點、有缺點,所以我從來唔會怪娛樂版,因為你無權要求人哋淨係揀好嘢嚟寫。當然,有時報道總有加鹽加醋,有時劇情發展仲快過真實世界,我都從來唔會擺上心。如果人哋寫嘅係真事,人哋講真話,你有咩好嬲?如果係假,更加會不攻自破,又有咩好嬲呢?
我一直覺得成功受能力、機遇影響,但係真正做唔做到,取決於一個人嘅心態同修養。做人最重要喺唔同環境之下都可以保持住自己嘅質素同風度,呢個行業、呢一些報道,正好提供一個鍛煉機會,畀我學識應對各種境況。

陳豪
《法外風雲》本來話係陳豪、法拉雙陳告別電視台之作,現時法拉巢已離,陳豪自爆除了明年二月開拍的《陪着你走》後,還有劇開。
陳豪
去年初在大馬開張的咖啡店蝕本離場,陳豪的咖啡夢還未碎:「當係交學費,生意點都想做,我唔想到老仲係手停口停。」
陳豪
二千年加入無綫後即做男主角, 07年的《溏心風暴》更贏得台慶雙料視帝,不過陳豪說還沒遇上代表作。《蘋果日報》圖片
陳豪
20歲開始做 model、 23歲被許願發掘拍《晚 9朝 5》,陳豪話在電影圈上得快落得更快,曾經為開飯為還咭數做濾水器推銷員。

人嘅修養唔係天生就有,我都試過狂妄過、失禮過。小時候,我哋三兄弟好反叛,成日躝街,尖沙咀海傍、通宵麥當勞過一晚,幾日都唔返屋企;廿零歲打網球,最火爆,一打得唔好就掟拍,加加埋埋掟爛過十幾塊拍,最肉酸一次係球拍掟落網度再反彈,掟傷坐喺場邊嘅朋友……樣衰到呢……;跟住係 94年返香港拍《晚9朝5》,錢易搵就變得意氣風發洗腳唔抹腳,帶住男男女女大班朋友一餐晚飯分三個地方食,專去名店、專食貴嘢,結果到咗冇戲拍,咪爭落一身咭數、一百蚊要分幾日搣囉……o依家諗番,我當年浪費好多時間,但係每個人都有呢個階段,錯得愈多、學得愈多,下次就唔會重蹈覆轍,唔會再犯。

陳豪
與陳茵媺三年前拍劇撻着,迅速開花結果,今年 6月在巴黎完婚:「佢出現得好及時,而我好快亦都強烈覺得,就係佢喇!」
陳豪
陳豪父親是麻醉科醫生、母親則為中醫:「我十幾歲時爸爸去世,媽咪一個人湊大我哋三條化骨龍,好辛苦,所以我哋三兄弟最錫媽咪。」《忽然 1周》圖片

君子不徒言

前文中提到陳茵媺和預計聖誕出世的兒子雖然次數不多,其實整個訪問,陳豪常常把這兩位家庭新成員帶在嘴邊,並且每次提到,本來就友善親切的臉上堆起更多笑容。我問陳茵媺的特別之處在哪裏?陳豪衝口而出:「佢特別在令我心有所屬。」真係甜到漏。
佢係我嘅 sunshine,無論幾大壓力、幾唔開心,見到佢就可以拋在腦後。我覺得佢係上天冥冥中主宰,喺一個好恰當嘅時機出現,無論年紀、性格、狀態都剛好夾到。同佢開始無耐,我嗰個「係佢喇」嘅感覺就愈嚟愈強烈,到咗呢個年紀,我體會到人生最幸運,係遇到個對的人,最幸福,係覺得心有所屬。阿仔未出世,但係我成日都幻想未來教佢、同佢玩嘅情景。有時見到朋友被細路哥包圍,事無大小都喺度「媽咪!媽咪」嗌唔停,都幾驚……哈哈……我好多謝別人欣賞我嘅個性,呢個唔係我功勞,係我媽咪教得好。我認為,一個人個性係唔係好,同父母管教關係最大。小孩子長大,除咗自己學習, mind set、點對人、點對事,要睇父母點樣扶植。尤其係做男人,我對得住自己講嘅每一句說話,第時我都會咁教小朋友,男子漢,每字每句都唔好輕易講出口,既然講咗,就算硬住頭皮都要兌現。

陳豪
陳豪
7月在加拿大擺完酒,陳豪小別陳茵媺,先行回港監工裝修比華利山三千萬豪宅, 9月尾挺住五個月肚的陳茵媺正式回港安胎。

有緣無分

陳豪
與廖碧兒相戀六年,曾經亦是觀眾、廠商熱捧的一對碧人。《壹週刊》圖片

有關男子漢大丈夫,一言既出駟馬難追。這一句,陳豪一說,我第一個反應是:「好彩你當年同廖碧兒一齊,唔似其他男藝人咁講過『會照顧佢一生一世』啫……」
陳豪笑咗,不過是苦笑:「我想佢快樂、想佢過得好,外界對佢好多評論都唔公平,不過呢個世界就係尖酸刻薄,如何面對尖酸刻薄都係一種學習。」
記得當年相隔兩週分別訪問廖碧兒和陳豪,廖碧兒說:「我都係女仔,都想被承認,但係別人事業形象永遠重要過感情。」陳豪說:「唔係喎,我從來都擺感情喺第一位,從來排喺事業同形象之上!」
到事情過去了,更一目了然,其實兩個都沒錯,只是有緣無分。

撰文:朱小博
攝影:范仲良
形象: Bryan@the Flaming
服裝: DOLCE& GABBANA

评论回复