綠葉王:張松枝二世祖頂硬上

張松枝在無綫默默耕耘18載,在劇集《茶是故鄉濃》中飾演二世祖一角,從此走上奸角之道,幸運地,觀眾喜歡、受落,就算在街上見到松枝,對他只是笑笑口罵「你真係好衰!」皆因這一切都是松枝努力的成果。松枝透露曾經試過拍到險些休克,也要堅持頂硬上。撰文:黃曉妍

張松枝
■張松枝在無綫18年來,接連演二世祖角色,奠定其奸角地位。
攝影:仇志德
化妝:Mae Von
場地:MM/H(皇室堡)

張松枝
■初入行的張松枝曾與陳慧琳拍《對你太在乎》MV。

當年20歲出頭的張松枝,有日在石澳游水時,恰巧有人正在拍廣告,有個PA(助理編導)走來邀松枝拍廣告,他透露曾拍過牙膏、M& M、樓盤等廣告。90年代初,卡拉OK盛行,他轉拍卡拉OK的MV,短短四年間,曾與陳慧琳、彭羚等歌手合作,參與的作品至少有千多首,他說:「一星期開四日工,有時出埠拍。」提到與陳慧琳拍《對你太在乎》MV,松枝大讚陳慧琳沒架子,笑說:「佢淨係掛住食,開工就問一陣間食乜?下晝食乜?」

張松枝
■張松枝(左)於劇集《鑑證實錄》中,與剛奪無綫台慶最佳男配角的古明華,齊齊演警察。
電視圖片

12年冇加過人工

松枝拍MV是副業,正職是做機械,他說:「我讀過機械工程,我朋友間公司喺日本收購二手機,跟住喺香港翻新再賣去大陸,我就負責整機,所以有時間拍MV。」兩份薪金生活豈非無憂?松枝苦笑說:「乜嘢無憂?不知幾辛苦,跟住入咗某公司之後,過幾年冇晒。」

94年,松枝經一位相熟的幕後,認識當時無綫藝員科的蕭笑鳴(巴姐)而簽約無綫,展開與無綫18年賓主關係,松枝表示早期是最開心,他表示試過一年有290多個騷,參與過不少劇集,幾乎沒停手。不過拍《封神榜》時,無綫竟然hold他七個月,但只開三日工,唔夠騷,只好「咬」月薪過活,幸好有監製找他拍《酒是故鄉醇》追回騷錢。松枝試過12年沒加過人工,生活艱難,他說:「好彩keep住有工開,唔使用錢,食公司飯盒慳唔少。」

張松枝
■當年仍是新人的張松枝(右)在《酒是故鄉醇》奉旨糟躓林家棟。劇照

高溫捱打險休克

「台上一分鐘,台下十年功。」由加入無綫開始,松枝在陶大宇身上偷師,他說:「拍《刑事偵緝檔案II》,我每日同陶大宇開工,我睇佢劇本,背晒佢嘅對白,幻想自己做主角,開工時睇大宇點做,睇佢做法係咪同我一樣呢,自己從中偷師去學,之後幾乎每套劇都係咁做,自己慢慢去學,亦係訓練自己記憶,我記得拍《再生緣》,我同林峯單對單,我一個人講五頁紙,一take過;拍《酒是故鄉醇》,講我飲醉強姦佘詩曼,於是俾Paul哥(秦沛)捉我去祠堂,我嗰段戲都三頁幾紙滿晒字,由於我係新人,起初Paul哥冇乜點理我,我同導演對稿,我一口氣講晒對白,Paul哥留意到,佢幫我叫大家靜啲唔好嘈住我對稿,我心入面真係好開心。」

張松枝
■張松枝(右)於《秀才遇着兵》演賴仁與視帝黎耀祥做對手戲,奸到出汁。劇照

對於劇集《回到三國》趙子龍一角,甚受觀眾喜愛,松枝指該角色戲份不多,最重要是做好自己:「武指同我講,出街嗰個係你,練咗幾多功夫,觀眾會睇到,拍嗰兩日好辛苦,咁啱遇着臨時演員罷工,原本話有50個臨時演員,當我到現場,佢話冇臨時演員,臨時臨急call咗十個訓練班同學同五個武師,鏡頭又唔可以見得佢哋太多,所以鏡頭對住我,佢哋背住我打,即係全日都係得我打,於是我死咗四次,因為太熱,30幾度,又要着盔甲,打完一個鐘,我就瞓低,要飲水,就嚟休克,我就唞五至十分鐘,一共飲咗八支水。」雖然是辛苦,但松枝指這是開心回憶,與劇組一起專注拍好這場戲。

張松枝
■張松枝在《回到三國》演趙子龍,要在30幾度下捱打。劇照

在松枝作品中,大部份都是飾演二世祖、二五仔、奸角,松枝笑說:「我都想做搞笑角色,不過冇我份,其實監製潘嘉德有幫我,係佢叫我拍《離島特警》、《鑑證實錄》同《婚前昏後》,可能佢後來被人同化咗,後尾又叫我做奸角,哈哈。其實係劉仕裕叫我拍《茶是故鄉濃》做二世祖,由嗰度開始。」不過最重要是觀眾受落,有網友建議專演奸角的鄭子誠、張松枝、王俊棠、黃文標和鄭家生合演一部奸戲,松枝笑說:「如果send畀香港電視,可能有機會拍到,香港電視靈活性好大,可以拍五集、十集,五個人開五集戲出一個禮拜都可以?!」

過檔香港電視

張松枝今年中跳槽王維基旗下,正投入拍劇集《警界線》
■張松枝今年中跳槽王維基旗下,正投入拍劇集《警界線》。微博圖片

張松枝在90年代初主要拍攝卡拉OK的MV,作品至少有千多首,曾與陳慧琳、彭羚等歌手合作。94年加入無綫成為旗下藝人,接拍《刑事偵緝檔案II》、《鑑證實錄》、《烈火雄心》、《離島特警》及《寵物情緣》等,直至監製劉仕裕找他拍《茶是故鄉濃》,飾演「榮耀祖」一角,成為二世祖的典範。今年6月,松枝離開無綫過檔香港電視,現時參演兩套劇集《三面形醫》和《警界線》。

友荐云推荐

歡迎關注微信

微信
官方微信號:hkchannel

微博評論

返回頂部