記得不記得 陳展鵬

忽然1周 第832期

我有 Say

記得不記得 陳展鵬

2011年07月08日
我以為,晚晚在《真相》中雄辯滔滔的陳展鵬,出身亞視,今趟是搶灘成功。

「其實,我讀無綫藝員訓練班入行,劉愷威和『行姐』陳彥行都係同學……」而且,他們都一同淡出了。「後來,同朋友唱 K,遇到 Blue Jeans的蘇德華,佢話我唱歌『得喎!』,幫我錄 demo,簽了寶麗金。」這,又讓我記起他拍過陳曉東的〈心理遊戲〉 MV,大概……推出過一張唱片?

「我未出過碟,只出過一隻歌,收錄在雜錦碟。咁就開始患得患失,俾我發了個夢,呢個夢發了十年。」觀眾像我,都善忘。以為記得不少,原來忘記更多。

「唔緊要啦!做呢行愈耐愈明白一切都係一個過程,唔使太着緊。但自己一定要鍾意,先會做得好。當然,開頭你未必肯定係咪鍾意,但若果你硬係唔肯放棄,咁就已經係鍾意……」十年一覺,醒來,卅四歲了。風吹過雲在飄,是另一片天。

忽然1周 第832期:記得不記得 陳展鵬

想唱歌 想不到世事難料

我係獨生子,爸爸係消防員,媽媽做「車衣」,很普通的家庭。爸爸好惡,以前日日迫我睇社論,仲會考我。

不過,自己唔太鍾意讀書,覺得讀書好悶,鍾意打乒乓波,係「掹車邊」的香港隊。中五畢業,爸爸叫考消防員,但我由細到大住消防宿舍,日日見消防員,覺得好厭,寧願學自己鍾意的科目,同成班同學去考工業學院的電腦工程科,又去考「體藝」。然後,再去埋報「演藝」同藝員訓練班。最終,藝員訓練班收了我。

細細個,一定有貪慕虛榮 o架嘞!覺得娛樂圈好新奇,有好多機會,用小聰明已經可以處理得到,所有嘢太輕易,來得太快。訓練班畢業,好快又簽了寶麗金。原本想邊做藝員邊唱歌,但那時一日開三組,路人甲係我,士兵又係我,村民都係我,日日開零六至零三,在公司瞓,根本分配唔到時間做宣傳。最後 TVB說:「你先出去做自己嘢啦!」

誰不知九七回歸後,所有嘢冧晒,翻版好勁,唱片無得做,差唔多零收入。但我將自己擺到好高,唔想做低嘅嘢,跟住女朋友又走埋佬。兩、三年間,無錢,好傷,開始醒,長大了。問自己好多問題,發現自己識嘅嘢好少。而人始終要食飯,好彩自細有好多長輩幫我,有個一齊打乒乓波的判頭,叫我跟佢落地盤,學做工程,一日三百五十蚊,試過連踩兩個禮拜,返朝七晚五,做了半年,最後因為踩釘,隻腳腫晒先停。

但係自己條命好得意,點都死唔晒,有時會俾我拍到國內劇,又有電影拍吓。最記得有次北上拍《新唐山大兄》,要同甄子丹對打。你知佢係「宇宙最強」,我真係打到散晒,有朝直情轉唔到身!條腰同雙手痛到要嗌救命,但幾痛都一樣要揸棍再拍。

返到香港,即刻去學功夫、刀槍,跟冼灦英師傅學「大聖劈掛」。愈做呢行你會愈驚,愈欣賞明白其他人,希望學到佢嘅優點。無十足,學一半都好。

忽然1周 第832期:記得不記得 陳展鵬

忽然1周 第832期:記得不記得 陳展鵬
《真相》中,同黃浩然齊齊扮正義律師,終於唔使做奸角。而觀眾亦終於唔只得林峯、吳卓羲可以睇, thanks TVB!

忽然1周 第832期:記得不記得 陳展鵬
少年十五二十時,拍下不少「沙龍照」。難怪的,身高五呎十,運動好,校內「風頭躉」,入行大概是必然。

忽然1周 第832期:記得不記得 陳展鵬
96年的《衝鋒隊之怒火街頭》,「第一次拍戲就做陳小春細佬,最記得在機舖那一場戲,同劉青雲、陳小春、張達明做戲喎,驚到都唔知自己去咗邊。但無 NG,一 take過。拍完, Benny(陳木勝)仲對住我笑。」

忘了身份 忘不了冷語

這十年來,我覺得改自己性格係最難,細個做開運動員,個人好尖好多角,好似劉翔咁,行出嚟個樣就係要贏!但做我呢行,如果係咁,其他人就會衝住你嚟。以前年少氣盛,有時又好 cool,唔會迎合所有人,拍戲就話自己做自己嘢,去做宣傳都黑口黑面?點搞呀!

慢慢有人同我講:「你個樣好寸喎!唔敢接近你。」我先知原來自己有問題。不過學我阿爸話齋,「先知先覺,後知後覺。做到後覺,已經好好!」人大了,經歷過酸苦,就會慢慢成熟,開始識為人設想,有時間就睇戲,搵到方向。

後來入了 ATV,由頭做起,都好大鑊 o架!有個創作總監,一開聲就叫我去做自閉低能兒(《笨小孩》的演出),但自己無出聲,只係睇好多關於智障的書,又剪個冬菇頭先去演,那十場戲做足晒俾佢。依家諗番,要多謝那些鼓勵我或者俾挫折我的人。如果條路太平坦,就會無咗火。可能我係馬啦,有時係要俾人鞭先發力!

好記得最迷茫的時候,有次出去飲嘢,遇到一個寶麗金舊同事,佢竟然笑笑口同我講:「馬都會失蹄墮馬嘅!」我唔知佢點解要咁講,自己之前仲主動同佢 say hello o架。

不過,算啦。無論一個人有幾成功,人生一定有高有低,都會遇到好多唔開心嘅嘢。所以,○八年返 TVB,從來無特別期望,只係想對自己有交代。第一套劇《桌球天王》,扮鄭少秋後生版,得三場戲。慢慢拍落去,戲份先愈來愈多。其實做人就好似做運動員,一定要打比賽,咁大家先知呢個球員有無擺心機落去練波。

有人話:「你依家做主角喎!」呢啲唔使聽,多餘嘅。朋友話:「你都幾靚仔呀!」都覺得無嘢。反而聽到人讚我做反派做得好,就好開心。因為自己真係要演,唔係企 o架嘛。

每一個環境都係一個學習階段,啱啱拍完的《法政先鋒Ⅲ》,我都唔係做主角。做人就係要放下無謂的身段,洗晒唔好的思維。紅?我依家係「中學」咋。仲有「預科」、「大學」都未讀,條路仲有好遠……

忽然1周 第832期:記得不記得 陳展鵬
上網搵資料,看到不少網友大讚他去年在《讀心神探》的演出,那個人格分裂的趙文海,都說努力總會被看見。

忽然1周 第832期:記得不記得 陳展鵬
寶麗金年代的舊照,還真有點古天樂的影子。「其實好瘦 o架,好恐怖!反而依家 feel到好似 ok咗喎,似番個人。」

忽然1周 第832期:記得不記得 陳展鵬
06年,在亞視的年度大騷《十大電視廣告頒獎典禮》上演出,仲企前排,跟葉璇和林韋辰同台。這,是他不想多說的日子。

忽然1周 第832期:記得不記得 陳展鵬
別誤會,這不是情侶檔表演。梁雪湄原來也是陳展鵬的訓練班同學,曾一起登台搵真銀。真女友?「依家無拍拖,想工作行先。」哦,明晒。

忽然1周 第832期:記得不記得 陳展鵬

评论回复