忽然1周 第904期

台慶劇《大太監》高收,連帶好戲綠葉陳國邦和曹永廉鹹魚翻生外,當中飾演皇帝仔的童星區珀豪( Pako仔)亦 chok出刁蠻任性神髓,與視帝祥鬥戲毫不遜色。
今年十歲的 Pako仔,原來半個月大已經入行,換句話說出道已十年,資深過不少藝人,認真誇張。計埋《大》劇, Pako仔今年已替無綫拍了五部劇,勤力過唔少小生。
現時就讀小五,名副其實半工讀的 Pako仔,睜大雙眼淡定對記者說:「我唔怕辛苦。」人細鬼大,老積到暈。

上周六( 17日),區珀豪( Pako仔)於區母陪同下接受訪問,區母現時亦是 Pako仔的經理人,負責替他編排工作,以不影響學業為大前提。雖然 Pako仔年僅十歲,但記者發現他對答成熟,溫文有禮,仲 chok過林峯。

區珀豪

區珀豪
記者當日要求 Pako仔擺出得意表情,但他卻 chok擺打功夫甫士,甚具台型。訪問期間,區母陪伴在側代發言時, Pako仔就緊閉雙唇,非常聽話。

區珀豪
【米雪教催淚】
《大》劇中, Pako仔與米雪最多對手戲,米雪亦曾教他催淚, Pako仔說:「米雪姐姐話想喊,可以諗啲傷心事,於是我諗起之前隻狗仔死咗,咁我就喊出嚟。」

區珀豪
【梁烈唯陪入廠】
Pako仔飾演梁烈唯童年版,但二人早於拍攝《東西宮略》已認識。「唯唯哥哥好錫我,見我有啲對白讀唔好,就陪我讀,仲陪埋我入廠拍。」

受盡演員疼錫

Pako仔《大》劇中架勢十足,原來他在片場內亦受盡萬千寵愛。正當 Pako仔想開口大讚同劇演員時,身旁的區母就搶住說:「黎耀祥哥哥同米雪姐姐對佢( Pako仔)好好。」 Pako仔聽後即刻 get到母親意思,於是所有演員名字後面,他都自動波加上哥哥或姐姐,費事得失人。 Pako仔大讚陳國邦好人,他說:「有次好早開工,我同媽咪去到電視城,但保安話要收到通知至放我哋入去。記得嗰陣係冬天,又濕又凍,陳國邦哥哥聽見 PA姐姐見到我哋捱凍,於是即刻揸自己架車出嚟,仲開定少少暖氣送我同媽咪入去。有時我拍完戲,陳國邦哥哥都有送我哋去地鐵站。」
Pako仔對《大》劇所有前輩讚口不絕,但他亦向記者透露拍《真相》時,曾被馬海倫嚇到喊。他說:「嗰場戲馬海倫姨姨揸住條籐條大聲喝我,叫我跪喺度俾佢打,佢睩大雙眼個樣真係好得人驚,之後又俾佢成個抱起再掟落梳化,我嚇到走出廠喊。之後佢同媽咪都?我,話唔會真打。後來拍嗰陣原來係打我鞋底,一啲都唔痛。」

通知老師追劇

區珀豪哥哥區瑋麟
Pako仔哥哥區瑋麟( Angi)今年 19歲,一方面是 Jamcast合約經理人,另方面是心理學副學士,二人感情深厚。

半歲人仔已開始做童星,拍廣告為主的 Pako仔, 09年開始為無綫拍劇,由於他於各劇中均有對白,並非咖喱啡路人甲,而屬特約演員。據知特約演員日薪至少四百蚊,提到薪酬問題,母親搶住答:「哎!邊有咁多呀!不過佢做戲唔係為錢嘅!」
Pako在學校是風頭躉,現於港島區某小學就讀小五、擔任圖書館管理員和風紀,揚言從未試過為工作而曠課,區母再補充:「佢讀書成績都幾好,老師叫我知道邊集(《大》劇)有佢份,就通知佢捧場。而同學仔都有追問劇情。」
Pako仔晚晚上電視,難怪街上已有人認得他。他說:「平時去街着便服,俾人認得可以同人影相。但媽咪話如果我着住校服嗰陣,最好只係禮貌笑下,唔好影相!」
區母見 Pako仔思想成熟,心裏很安慰,她說:「其實阿仔拍劇試過朝早六點開工,放假又冇得玩,我都問過佢開唔開心。」此時 Pako仔終於識搶答:「咁樣反而開心,我唔怕辛苦,將來都想做歌手。」

視帝逐個數

幫無綫拍了四年劇的 Pako仔,已經試過與多個視帝切磋演技。對眾視帝有讚無彈!

區珀豪
【祥哥冇架子】
「黎耀祥哥哥好好人,佢試過踎喺地扮齊天大聖,教我做呢個動作將掃把踢高。本來導演話算,結果黎耀祥哥哥教咗之後真係做到。」

區珀豪
【陳豪夠主動】
「我拍《金枝慾孽 2》同陳豪哥哥冇對手戲,不過佢喺片場見到我,會主動同我傾偈,而且佢笑容好親切。」

區珀豪
【鄭嘉穎細心】
「我喺《拳王》做老吉(由另一位童星梁梓豪飾演)嘅朋友仔,嘉穎哥哥好細心教老吉做戲點樣投入,話只要當正係兩父子就乜都唔驚。」

出道十年

今年十歲的 Pako仔已經出道十年,皆因他六個月大,仍是手抱 BB時,便為金飾公司拍賀年金飾海報,之後一直未停過接 job,曾與圈中不少藝人合作,直至 99年才全力拍電視劇,經驗豐富。

區珀豪
【半歲賣金】
02年 Pako仔六個月大,在當年也是童星的哥哥穿針引線下,一身紅衫紅褲仔為謝瑞麟拍攝賀年海報廣告。

區珀豪
【四歲扮林曉峰個仔】
06年, Pako仔得四歲,便扮演林曉峰和康子妮兒子,為實惠家居拍廣告。

區珀豪""
【五歲拍住古巨基】
07年,五歲大的 Pako仔拍住古巨基,為兒童醫療基金拍攝宣傳片及海報。

區珀豪
【六歲做商場騷】
08年 6歲的 Pako仔已學識搞氣氛,當時他便與其他小朋友出席商場活動時,和街坊現場玩遊戲。

做童星忙過返工

根據勞工處條例,僱主事前向勞工處書面申請,則可以僱用不同年齡的兒童藝員。不過僱主要遵守規條,如兒童工作時間不可以在早上七時前或晚上十一時後,而一天亦不能工作超過八小時,上課時間亦不能工作等條件。 Pako仔亦有玩微博,有千五名粉絲。他不時將半工讀生活放上微博,都咪話唔忙。

區珀豪
埋位前做功課
Pako仔帶埋功課入電視城,換上戲服後,等埋位拍攝期間,就攞功課出來做。雖然勤力, Pako的「功」字卻寫錯「工」字。

區珀豪
放學即刨劇本
去年 10月, Pako仔放學後就搭車入將軍澳電視城拍《造王者》。為了埋位前熟讀劇本, Pako仔就趁搭車途中刨劇本。

區珀豪
十一點前放人
Pako仔拍攝《大太監》時,多數搭正晚上十點放工,雖然無綫冇犯規,但小朋友要捱到咁夜,都幾陰功。

無綫多童星

無綫劇集,向來舊橋無限複製,所以劇中不少主角都有少年版、童年版等,因此無綫近年孕育不少童星。

鍾紹圖
《天梯》鍾紹圖
今年 11歲的鍾紹圖, 10年憑攞獎戲《歲月神偷》提名「最佳新演員」,可惜最後輸俾同戲的李治廷。之後他幫無綫拍劇,今年《天梯》中,他與陳豪的父子戲,感動觀眾。

梁梓豪
《拳王》梁梓豪
現時就讀小六,今年 11歲的梁梓豪,於《拳王》中飾演鄭嘉穎兒子,眼淚話流就流的演技令他人氣急升。

陳詩慧
《法證 3》陳詩慧
11歲的陳詩慧,於 09年憑《宮心計》佘詩曼的童年版一角跑出。而去年《法證先鋒 3》她飾演黎耀祥女兒,佔戲最重。



友薦雲推薦