遺憾陳百祥(阿叻)絕後 黃杏秀(秀姑)親述不育慘況

忽然1周 第956期

周二( 19日)無綫慶祝 46周年台慶,本應上下一心普天同慶,但適逢發牌風波仍未收科,全城圍插無綫寡頭壟斷,令台慶蒙上陰影。
無綫本已多事之秋,但向來口不擇言的阿叻(陳百祥)卻火上加油,連日向網民挑機惹禍,有網友不單發起「萬千熄機賀台慶」,台慶當晚更到電視城門外撒溪錢「贈興」。
面對網友,阿叻口沒遮攔,但對住風雨同路近 40年的賢內助黃杏秀,阿叻卻一改臭口作風,人前人後不停讚秀姑。對於秀姑多年未有所出,阿叻戲言:「冇仔生仲好!」而多年來從未接受過訪問的秀姑,日前獨家向本刊透露,指自己不能為阿叻繼後而感到遺憾,更首度透露不育原因,是當年腹膜炎導致卵巢含膿,從此不能再懷孕。

遺憾阿叻絕後 秀姑親述不育慘況:發現卵巢含晒膿
患難見真情
黃杏秀罕有親述當年不育慘況,更道出阿叻在 82年無綫綵排台慶爆炸受傷,她又相繼出事,患難見真情,二人此後感情更堅固。

遺憾阿叻絕後 秀姑親述不育慘況:發現卵巢含晒膿
撐老公
黃杏秀護夫情切,在微博開火反駁網民,呼籲大家「開電視做善事」。

由於王維基的香港電視不獲發牌,觸發全城抵制無綫的電視霸權,有網民發起「 1119」台慶熄電視,以行動抗議一台獨大。面對網民來勢洶洶,每年有份做台慶司儀兼身為無綫大股東陳國強(殼王)老死的阿叻,連日臭口護主,一時說收視得兩、三點會跪返屋企,更表示自己寧願死咗去。其後又開出盤口,指若有三十點收視,便捐三百萬做善事,令台慶夜變駁火戰場。周三( 20日)中午,無綫公布台慶平均收視 29點,最高收視 31點,無綫亦承諾會捐 310萬到七間慈善機構。雖然兩個收視點都比去年台慶下跌 5點,阿叻總算輸唔晒。

婚前知不育

其實今年 62歲阿叻,經常牙擦認叻,但為人用情專一,身邊老伴,多年來只得黃杏秀一個。二人當年相識未夠兩年,於 79年便在菲律賓秀姑家鄉結婚,當時秀姑乃無綫當家花旦之一,阿叻卻是大茄一名。為免影響秀姑星途,二人決定秘密結婚。不過婚後不久,秀姑決定息影,樂做阿叻背後的女人。對此,阿叻直認:「佢咁靚咁叻,我第一眼見佢,已經覺得佢係天使下凡,當時我覺得佢襯得起我,咪俾佢同我喺埋一齊囉!佢眼光都好好,揀到我!」招積本色不變。
而不下一次講過自己不恨生仔的他,對於秀姑多年無所出,阿叻坦言結婚前一早知情。「我同佢結婚前都知啦(指女方不育)!冇所謂喎,我 12歲嗰年已經同自己講將來唔要細路?啦!咁鬼煩,我又唔識教,只會縱佢哋,冇細路咪仲好,依家我有六隻馬、五隻狗,我咪當佢哋係細路仔囉,佢哋聽教聽話,唔使我操心!」

遺憾陳百祥(阿叻)絕後 黃杏秀(秀姑)親述不育慘況
菲律賓擺酒
79年二人在菲律賓結婚,當時黃杏秀已切去輸卵管及卵巢,但阿叻表明不介意。
遺憾陳百祥(阿叻)絕後 黃杏秀(秀姑)親述不育慘況
遺憾陳百祥(阿叻)絕後 黃杏秀(秀姑)親述不育慘況
掛住食
周一( 18日)為台慶綵排,黃杏秀與工作人員很認真地傾談工作,阿叻卻坐開一邊掛住擘大口狂食。


跟得夫人
阿叻除了??爛塊面撐無綫,還在台慶當晚做領隊表演「花式足球」,去到邊都有跟得夫人秀姑幫手拖喼貼身服侍。有老婆幫手,踢住拖的阿叻樂得輕鬆。

hea踢
阿叻帶領葉翠翠、呂慧儀及龔嘉欣等近二十人在台慶表演「花式足球狂熱」,阿叻 hea住踢。

腹膜壞死

阿叻口說「冇所謂」,但身邊另一半卻對自己不育,未能為丈夫繼後而耿耿於懷。周二( 19日)台慶日,一直伴隨阿叻跟出跟入打點一切的秀姑,望見老公入了錄影廠做台慶司儀後,便向記者娓娓道出和阿叻相識經過,更爆出不育的慘痛經歷。

記者:記秀姑:秀
記:你最初點識阿叻?
秀:訓練班嗰陣同溫拿成班去玩,佢(阿叻)揸車送我哋返屋企,我係最後落車,佢同我傾偈同埋交換電話,之後就約會,大家有 feel嘛,好快就一齊。

記:當時覺得佢個人點?
秀(忍唔住甜笑):覺得佢認叻,成日話自己靚仔又有本事,我同班同學仔講呢個人咁囂士,嫁着佢就慘,哈哈,點知自打嘴巴!

記:冇小朋友,有冇覺得遺憾?
秀:其實後生嗰陣都想有,係有小小(遺憾)嘅,唔生一件事,但冇得生又係另一回事。

記:經過係點?
秀(抿一抿嘴):嗰陣拍劇好忙,盲腸穿咗都唔知,見肚痛去咗浸會(醫院)睇醫生,醫生幫我檢查嗰陣,覺得左腹好痛。當時醫生懷疑我腹膜炎同埋有婦科病,叫我入院 check,但我當時拍緊《十三妹》,見到唔再痛就冇理。一個月之後拍完劇,個肚又痛痛哋,再去睇婦科,醫生 check到我左腹有個大過雞蛋嘅瘤,驚係惡性要即刻開刀。

記:阿叻當時點?
秀:佢成個騰晒,我諗好多人未見過佢喊。我推入手術室嗰陣,佢喊到花面貓咁,好似做戲咁,叫我唔好有事。我見佢隻手都震晒,嗰刻雖然好驚,不過老實講,見到佢咁樣,自己都有啲感動!


聽老婆話
黃杏秀講到老公,話佢性情火爆口不擇言,今次台慶挑機,秀姑私下也有「教訓」老公。《蘋果日報》圖片

17/11遺失手機
上個賽馬日,阿叻夫婦專程到馬會捧郭富城場,但遭網友狂插,惹全城反感的阿叻神不守舍,竟然遺失手機,摷極搵唔番。身邊秀姑亦緊張摷埋一份,事後問阿叻會否怕流出與老婆蜜照,他笑笑口說:「有好多呀,不過最衰有着衫。」

記:點解會導致不孕?
秀:入手術室時醫生話兩個鐘搞掂,點知最後做咗六個鐘。佢同我講,話劏開咗至知成個下腹已經發炎含膿。醫生幫我攞(內臟)出嚟洗乾淨再收番入去,佢話我唔死得算大命。其實當時我下半身有好多個器官已經受感染含晒膿,當中包括一邊輸卵管同一邊卵巢,我唞咗足足三個月先出得院。醫生同我講過,有仔女嘅機會好微。其實我有問過阿叻,話如果佢想我生,有朋友可以介紹醫生俾我。不過阿叻話我做咗咁大手術,唔好再搵命搏。

記:因為呢件事,所以嫁俾阿叻?
秀:其實一半半啦。當時住喺菲律賓嘅爸爸媽媽話要同我一齊移民美國,咁我同佢(阿叻)拍緊拖嘛,咁點得啫。於是咪同佢結婚,等爸爸媽媽個心定啲囉!

記:阿叻叫你婚後退出娛圈?
秀:其實當時佢已經好多戲要拍,我又有劇拍緊,試過成個月都見唔到一次,我覺得咁樣好難維持關係。最後事業同家庭,我決定要家庭。

記:阿叻話過俾晒啲錢你,係咪真?
秀(哈哈大笑):一半半啦,佢鍾意玩股票唔鍾意買磚頭。咁我同佢有同一個股票戶口,咁算唔算俾晒我呢?早兩年因為舊居(九龍塘雅翠苑)住咗三十幾年要裝修,我哋商量買過層新樓,佢同我講話啲錢俾晒我啦,叫我出錢買。我話好呀,點知最後佢話淨係落我一個名得啦。其實間屋兩個都有份住,落邊個名有乜所謂!


秀姑硬撐
與秀姑相處 34年,阿叻曾傳出兩次緋聞,第一單是在 95年被偷拍到與明星足球賽在肇慶踢波時到夜總會 call女返酒店。第二單是與張慧儀拍戲時傳出撻着,但兩次事件,黃杏秀均表示對老公百份百信任。

自認有 13億精子

對於秀姑不育,阿叻對住記者最初依然不脫牙擦本色:「冇得生咪仲好,嗱!講明先呀,醫生話我有 13億活躍精子!」但當記者談到秀姑當年差點性命不保時,阿叻終於收起得戚表情,認真地說:「其實同佢一齊咁耐,佢好清楚我嘅缺點,狂妄自大、亂噏一通。反而咁耐以嚟,佢嘅缺點,我一啲都搵唔到,我真係好多謝佢包容我!」看來只有秀姑真的可以治得住阿叻。


寄情馬狗
阿叻和秀姑的家中沒有小朋友,多年來均視愛犬如親生仔女,閒時最愛與牠們遊車河散步。《蘋果日報》圖片

既是練馬師又是馬主,阿叻現時擁有「永樂」、「皇者風範」、「專贏」及「尊你贏」等六匹寶貝馬。

阿叻家中兄弟只得細佬陳百燊一人,而陳百燊和前妻只育有一個女兒,即使十年前再娶內地女星孟俏君,二人至今膝下仍冇仔女,變相陳氏一家至今仍未有慈姑椗繼後。

殼王密旨造勢


合組公司
阿叻與殼王陳國強關係千絲萬縷,有傳曾合資開經理人公司 Snazz,殼王入主無綫,曾有傳聞指阿叻會入無綫做高層,但他說:「我都唔鍾意做高層!」

至於阿叻今次異常高調地單挑全港網友,本刊收到消息,其實只是一場谷收視把戲。知情人透露:「其實殼王(陳國強)入主無綫後,已經覺得公司一池死水,所以就想喺啲綜藝節目搞多啲 noise出嚟。阿叻同佢識於微時,呢幾年又同阿叻合組經理人公司 Snazz。殼王當佢兄弟班?啦,咪度條橋出嚟谷台慶收視囉,諗住愈鬧愈多人睇!」周二( 18日),本刊記者就此事問阿叻,誰知他直認不諱:「一場戲嚟啫,宣傳效果幾好呀,過咗台慶就乜事都冇!(咁上次你同王晶喺港姐決賽鬧交,係咪都係宣傳嚟?)好明顯係啦,佢係我恩師嚟,點會同佢真係鬧交吖!」

電台聽眾狂插阿叻


老友鬼鬼
阿叻夫婦與殼王及其弟陳百燊等曾一同出席《左麟右李》慶功,私下十分老友,怪不得他為老友硬撐無綫。

周三( 20日),阿叻上陳志雲主持的商台節目《在晴朗的一天出發》,再次話自己今次囂張言論是為宣傳台慶,亦表示不介意自己被全城圍插,「為公司壯烈犧牲,係我使命!如果我唔係講到咁囂張,大家(指傳媒)係唔會寫。」其間亦有多位聽眾致電表達意見,有人更直言阿叻開出盤口,將收視與捐款掛鈎,利用市民善心去谷收視,是可恥行為。阿叻為此急忙解畫:「我提出啫,無綫唔知。我戲言啫,諗到咩就講咩。台慶係遊戲,慈善係唔關遊戲事。不過你哋成日話 TVB賺錢嘛,咪等 TVB回饋番市民啫!」雖然今次台慶收視力保 30點,但最終辣?全城,似乎失多過得,睇怕阿叻不過是死雞撐飯蓋。

阿叻不介意黃杏秀被指不育

對於有傳阿叻搞這場台慶「大龍鳳」是跟老闆陳國強夾計,目的是要搶收視,阿叻昨日否認傳聞,他並無跟陳國強通電話,他認為熄電視關無綫的事,發牌則是政府的事,不要全部拉埋一齊講。

至於有指黃杏秀卵巢含膿而不育,阿叻說:「這是30多年前的事,我不介意不育的標題,我真係冇仔生,有就大件事。我沒有遺憾,亦喜歡二人世界。」

秀姑不簡單

現年 57歲的秀姑(黃杏秀),卅多年前為無綫力捧三大花旦之一,與鄭裕玲、趙雅芝齊名。
秀姑出身無綫第四期藝員訓練班,拍過唔少劇集,演古裝俠女最為人熟悉,當時更有俠女之稱。數到最大膽演出,非 80年無綫劇《風雲》莫屬,當中一場秀姑被吳孟達強姦的戲份,哄動娛圈,反而當年的陳百祥只是無名小卒。直到 87年阿叻憑電影《精裝追女仔》才竄紅,見阿叻事業現曙光,秀姑計劃退出娛圈,翌年拍完無綫劇《南拳蔡李佛》後,她便全職幫阿叻打理大小事務,做阿叻背後的女人。


劇集《天龍八部》

劇集《風雲》

只愛股票不愛磚頭

樓市持續高企,人人爭買磚頭保值,但身家豐厚的阿叻卻直言愛投資股票多過磚頭。事實上他與秀姑手上只有 5個物業,比起很多有錢人真係算少。

鰂魚涌南豐新村低層單位(秀姑冇份)
買入價: 1,164萬( 9/95年)
現值:約 1,500萬

新蒲崗新時代工貿商廈低層單位
買入價: 310萬( 1/99年)
現值:約 500萬

九龍塘又一村花園低層單位(秀姑獨資持有)
買入價: 2,550萬( 3/11年)
現值:約 2,800萬

九龍塘又一村玉寶閣低層單位(與秀姑共同持有)
買入價: 340萬( 6/89年)
現值:約 1,400萬

九龍塘又一村玉寶閣低層單位
買入價: 1,221萬( 10/96年)
現值:約 2,000萬

物業市值合共 8,200萬

圈中夫婦恨生仔

娛圈中有不少夫婦結婚多年都未有所出,就算講明恨生仔,四出尋求秘方都未成功。雖然年紀愈大愈難有孕,但不少藝人仍然努力想標尾會。

劉嘉玲
恨生仔恨到出口的劉嘉玲, 47歲仍未有着落,與梁朝偉結婚 5年間,有傳多次向大寶法王求子,亦試過接受「人工受孕」兼戒煙酒、夜蒲,但都未能有孕。

伍詠薇
44歲的伍詠薇,與練海棠結婚 14年未有所出,有傳伍姑娘四出尋求生仔秘方,又搵中醫師方耀積極調理身體。伍姑娘亦承認希望做媽咪,「以我咁嘅年紀,想生 BB都無可厚非。」

周慧敏
46歲的周慧敏與倪震結婚 5年都未能為倪家開枝散葉,老爺倪匡極恨抱孫。前年有傳周慧敏為求生仔,到養和醫院接受「雪藏卵子」這醫學科技,可惜未能成功。

郭藹明
郭藹明與劉青雲是圈中的模範夫妻,結婚 15年都是二人世界。 07年劉青雲首度獲得金像獎影帝,喜極之下揚言會生仔慶祝,郭藹明亦表示會不設防,還會私下向好友關詠荷取生仔經,不過 6年來仍未有喜訊。

港視藝員做啲乜?

無綫台慶網友熄電視贈興,最終收視較去年跌 5點得 29點。雖然明知冇可能暴跌至 2點令阿叻下跪,但一班港視藝員亦齊齊響應熄機行動。

唐寧:我呢晚要幫老公(鄧偉傑)手,喺佢 studio為劇團佈置場地,場地冇電視,我亦唔得閒睇!

蒙嘉慧:我呢日要做嘢,(做乜?)……約咗人食飯,總之唔得閒啦!

艾威:無綫台慶呢幾日,我同啲圈外朋友到澳門玩,年年台慶都係咁,唔睇都冇所謂。

半澤(陸俊光):原本打算燒嘢食,但臨時要為新劇《 night shift》開工,冇時間睇!

網友狙擊贈?

多得阿叻連番謬論,為今年台慶提供在網上不少娛樂性。為狙擊阿叻,一眾網友絞盡腦汁呼籲熄機改圖,甚至台慶當晚踩場贈興,雖然未能令阿叻跪低,但亦迫到無綫不敢怠慢。


扮叻露兩點
有網友在電視城門外剝衫跪低扮阿叻,更遮胸前兩點,喻意收視得兩點。

灑溪錢「賀壽」
長毛和一眾網友台慶當晚在電視城門外大灑溪錢,認真大吉利是。

網友改圖
無限創意的網民,幫阿叻改圖,將佢個口改成狗口。

機頂盒戶熄機
有網友不屑阿叻挑戰,講明台慶當晚支持熄機。

评论回复