《星夢傳奇》鄭俊弘成雙料冠軍 亞軍鄭世豪

無綫藝員歌唱比賽節目《星夢傳奇》今晚在將軍澳電視廣播城舉行決賽,四強鄭俊弘(Fred)、鄭世豪、姚兵、陳明恩經一輪激戰後,由全港觀眾投票選出終極冠軍,最後有237930萬人次投票。

結果高分王鄭俊弘憑參賽歌《追》,以161046票大熱勝出,贏得價值港幣三十三萬八千元的鑽石金咪,還贏得由譚詠麟、巫啟賢等評判選出的「專業推介表現大獎」,獲得總值逾六十萬獎金獎品;至於鄭世豪就獲亞軍(42136票)、陳明恩獲季軍(20114票)、姚兵就奪殿軍(14634票)。

雙鄭大男孩獲獎後,均流下男兒淚,而負責頒獎的阿倫就向Fred說:「你由普通藝人,成為非常唔簡單歌手,希望你以後踏實地唱歌,做個簡單藝人。」Fred奪冠後哭着多謝媽咪﹑家姐﹑公公﹑婆婆﹑舅父﹑舅母﹑師傅及公司,場面感人。

《星夢傳奇》總決賽 鄭俊弘成雙料冠軍
鄭俊弘過關斬將,幾乎由頭帶到尾姿態,勇奪《星夢》冠軍。

鄭世豪以42136票得亞軍。(電視畫面)
鄭世豪以42136票得亞軍。

高分王兼冠軍鄭俊弘,賽後接受傳媒訪問,興奮心情仍未平伏,佢話:「自從新秀(2001全球華人新秀歌唱大賽亞軍),冇咗呢個夢想之後,我都唔知會再有機會,再次踏上舞台,可以參加歌唱比賽,可以再攞獎,真係好感激,真係好多謝。」

至於手下敗將、屈居亞軍嘅鄭世豪表示輸得好服氣,講到頭先比賽時已有人拎定「神奇紙巾」(因為噚晚鄭世豪喊嗰陣,明明手上冇紙巾,但下一秒已經「忽然有巾用」,令人嘖嘖稱奇,不過今晚主持之一嘟嘟姐已經解釋咗係佢俾嘅),鄭世豪話:「我冇用喇,我訂立咗、諗住唔喊o架喇,但頭先出場、個騷開始嘅時候,我哋四個人平排嘅時候,我已經頂唔順又喊喇。又係阿Fred平伏咗我嘅心情,我冇諗過…我好開心,多謝多謝。」此外,問到冠軍得主鄭俊弘,啲獎金會點用?鄭俊弘話會交俾媽咪處理,當然第一件事係請大家食餐飯先啦。

季軍陳明恩否認揀錯歌

季軍鬼妹陳明恩就表示,能夠入到四強,已經好開心,好榮幸。今晚陳明恩揀錯歌謝安琪首超高音嘅《我歌故我在》,結果被指揀錯歌,因為有啲高音位鬼妹根本應付唔到,因而影響表現。

之前陳潔靈都講過話呢首歌「唔係人唱」,陳明恩就話:「所以我好欣賞謝安琪,我好鍾意謝安琪,同埋我之前學唱歌嗰陣,主要都係唱高音嘅歌,我又好鍾意唱呢首歌,所以我都好滿意今晚可以唱到。」

問陳明恩如果再嚟多次,會否考慮唱另一首歌令自己成績更好?佢都未答,姚兵已多次想搶答,謂:「明恩嘅心情……其實我好了解,明恩嚟到最後一『浸』,唔使俾呢啲評審點評,我哋都可以攞自己最鍾愛嘅歌,同大家分享。」

明恩就話:「係喇,因為係最後一晚,我真係好想唱出我嘅心聲。呢個對我嚟講,比個獎更重要,呢個都係我嘅夢想,可以做到一個唱到自己個心出嚟歌手,我今晚都好用咗個心去唱,而且我多咗好多朋友、fans支持,我會努力,同埋我喺呢度學到好多好多功課,我會帶埋呢啲功課去準備我嘅演唱會同唱片。」

陳明恩總決賽夜唱得冇之前咁好,最終僅獲季軍。
陳明恩總決賽夜唱得冇之前咁好,最終僅獲季軍。

殿軍姚兵感性宣言補償太太

殿軍姚兵打趣謂:「o依家個個都有獎,剩係得我冇獎,不過我係心中有獎,因為…啲歌我覺得自己已經唱得好好0架喇,總之係做到我想要嘅呢樣嘢,咁可能係…可能係…新香港人嘅關係,喺呢方面可能有啲……少少唔著數嘅。但係可以去到最尾一剎,已經贏咗喇。」

之前姚兵喺台上領獎時,公開答謝老婆,仲話要補擺酒,慶祝結婚10周年,當時姚兵話:「當年結婚嗰陣,冇好好嘅婚禮,因為冇乜錢。所以我決定喺10周年嗰陣,一定會擺番一次好啲嘅酒,請晒所有朋友嚟。」令在場的太太感動不已。

事後問番姚兵幾時結婚10周年?佢話:「三年之後。」至於會否0依家就幫太太搞個盛大婚禮先?姚兵笑笑口話:「暫時未諗住,呢啲嘢。」上次子博就話欠太太一隻戒指,要履行諾言同補償,咁姚兵又點呢?佢話:「未諗過……到時……不過呢啲嘢一定要做嘅,我哋結婚嗰時,真係冇乜錢,簡簡單單,真係爭佢一次婚禮。同埋嗰時我希望可以幫佢搵最靚嘅化妝師、最靚嘅婚紗,因為佢當時成個樣出嚟都唔係好好,我真係要補償番佢呢樣嘢。」

姚兵與老婆
姚兵與老婆

评论回复