《星夢傳奇》第四集錄影 陳明恩王君馨加入唱聖詩

鄭俊弘搵豹哥幫手 自彈自唱

TVB明捧自己人嘅歌唱比賽《星夢傳奇》,雖然爭議聲不絕,不過成功掀起話題,仲彈起名不經傳嘅藝員鄭俊弘。之前錄影都俾傳媒採訪,不過上星期3集就唔俾採訪,要保密賽果啦。

噚晚就要參加一對對咁比賽,要佢哋搵自己個朋友上去一齊唱,一眾參賽者賽前喺化妝間接受訪問,「高分王」鄭俊弘就搵嚟「豹哥」單立文幫手,今集就有鬼妹陳明恩同王君馨加入戰團,因為佢哋新加入未搵得切拍檔,呢晚就一齊唱。

鄭俊弘就同豹哥唱The Beatles嘅《If I Fell》,鄭俊弘就話豹哥好錫佢,係佢主動搵豹哥嘅,又話豹哥要搵兩套劇都捱眼瞓幫佢手,開06仲煮飯,真係好感激佢。問會唔會有獨唱?鄭俊弘話唔會,只係兩個人都會彈結他,咁自彈自唱會唔會有優勢?佢就話唔知,咁連續三集都高分,會唔會有壓力?佢同樣答唔知,話唔會去諗,只想用歌聲打動觀眾。咁想唔想去登台?佢就表示有當然好,但依家未適應面對傳媒,因為唔識講嘢。咁有冇信心贏?佢話:「對豹哥有信心,佢將披頭四首歌改咗少少,偏向靜,因為佢話我前幾集偏向激烈,自己彈感覺就靜啲,不過瑕疵就多啲。」又話用咗三四晚準備。

後來上一集被foul嘅梁烈唯拍完《飛虎》喺廠過嚟場撐鄭俊弘,仲互攬鼓勵一下。

鄭俊弘
呢排成日見到鄭俊弘。


仲係傻更更咁嘅樣。

鄭俊弘


唯唯過廠,都係鼓勵下老友。

陳明恩大露背 王君馨著「婚紗」唱聖詩

噚晚《星夢傳奇》第4集錄影,新加入嘅王君馨同陳明恩都係教徒,所以合唱咗《Amazing grace》呢首聖詩。

鬼妹陳明恩笑言王君馨仲外國人過佢,王君馨又笑返陳明恩仲中國人過自己。佢哋都話對手好強,又話之前都合作過福音演出,依家係好朋友互相扶持。不過,佢兩個贏咗嘅話,下集兩個人又會變成對手,咁有冇影響?佢哋就話:「唔會,朋友就係朋友,希望將來有更多合作。」

呢晚陳明恩罕有著咗條大露背裙,而王君馨條裙就十足婚紗一樣,佢哋話件衫係鄭兆良贊助,價值6萬。提到同君馨一齊拍《熟男有惑》嘅豹哥單立文幫鄭俊弘手,君馨話:「唔知大叔(單立文)想點。」搵大叔晦氣?佢話:「有呀,佢只叫我加油,今次放過佢,遲啲佢就知。」

問到評判郭偉亮會否收歛評語?佢就話:「無人會令我改變,會照講,演員攞真心走出嚟,比人話都要面對,不如講真話佢哋聽,唱得好要讚,唔好就要講。」問到傳出有復活戰?佢話:「有聽聞,但我返美國做唔到,24號就走,但返港後仍然會幫手。」佢又=笑言參賽者人仍然喺度,問到復活戰內定係唯唯贏?佢就話:「邊有得內定,全香港人睇住,唱得唔好過到關都比人鬧,但見到鄭俊弘依家發展好都好開心,佢捱咗好耐,見《師父》佢有份演出。」咁問到會唔會作歌比佢?Eric話:「自己唔會搲工作,佢搵就會。」咁會否過兩招比唯唯?Eric再話:「佢真係揀錯歌,冇運,佢忙拍劇好,想睇佢劇多啲,私下唔熟,佢份人有吉士,唔使參賽啦。」

陳潔靈
新評判陳潔靈。

郭偉亮
郭偉亮話唔會收歛評語。

陳明恩
前面睇冇乜嘢

陳明恩
原來係大露背!


王君馨條裙…..


好姊妹…


新評判

何傲兒敖嘉年著古裝演唱

上集先加入《星夢傳奇》嘅何傲兒,噚晚錄影就同拍檔敖嘉年著上古裝衫獻唱林子祥同葉倩文嘅《選擇》,感覺頗為古怪。

何傲兒話:「呢首係爸爸媽媽嘅主題曲,多謝晒敖嘉年,特登開工轉妝,首歌想講兵慌馬亂作一生選擇,希望觀眾除聽歌都有視覺享受。」記者話上次性感上陣都有啦,何傲兒話:「想有其他感覺。」咁有冇信心?佢話:「對手好強,有敖嘉年信心大增。」

問到豹哥單立文撐鄭俊弘同佢合唱,係高手出招?佢話:「音樂無分高低,係交流,比鄭俊弘自由發揮。」問到鄭俊弘唱功如何?佢話:「偏向真誠,如果假係發揮唔到,真誠唱歌觀眾可以感受到訊息。」咁有冇留意佢之前嘅演出?豹哥話:「之前有搵佢唱demo歌,係鄭中基嘅歌,鄭俊弘問我要唱乜嘢腔,我話鄭中基,效果幾好,真係似鄭中基。」

至於「翻版Bosco」張振朗就拉「巨星幫」陳鴻碩參賽,唱李聖傑同林隆璇嘅《你那麼愛他》,問有冇信心?張振朗話:「有陳鴻碩喺度,信心多咗,對手好勁,尤其鄭俊弘同豹哥。」

陳鴻碩話張振朗生日好旺,噚晚係佢廿六歲生日,希望可以打入第五集?張振朗話:「係,係我願望,如果做到意義好大,但因為拍劇少時間練,好彩陳鴻碩幫手,分享好多意見。」而張明偉同陳康健就唱陶喆嘅《王八蛋》。


豹哥撐爆鄭俊弘。


幾開心!

張振朗拉「巨星幫」陳鴻碩參賽
張振朗拉「巨星幫」陳鴻碩參賽。

何傲兒
去服裝間持衫就OK,造型都唔使諗。

羅鈞滿
羅鈞滿仲喺度o架!

張明偉同陳康健
張明偉同陳康健


唔知表現成點呢?