母女合體賀羊年 楊思琦心願:想找到另一半

羊年到又是新開始,單身港女勢必求搵到 Mr.Right。楊思琦當年誤信「空心老倌」吳帥是 Mr.Right,最後獨自在美國未婚生女,多年來母兼父職搵錢養家,轉眼囡囡楊卓穎快將 3歲喇!

上周五(13日),楊思琦和囡囡破天荒合體為雜誌拍攝賀年封面,卓穎可愛活潑,人見人愛。訪問時思琦透露羊年願望:「我都想搵到另一半嘅!希望呢個人等緊我啦!」而玄學家麥玲玲亦批楊思琦羊年有桃花,今年有望遇到合適對象。若能搵到個愛錫思琦母女的好男人,咁就真係「楊楊得意」喇!

母女合體賀羊年 楊思琦心願:想找到另一半
有女萬事足
楊思琦非常保護囡囡楊卓穎,今次難得合體影賀年照,母女甚有默契,坐在羊仔上玩到哈哈大笑,場面溫馨。

去年孭住未婚媽媽標籤離開大台的楊思琦,眼看失靠山前路茫茫,誰不知工作四面八方湧來, job接 job不停中港兩地跑,人氣亦漸漸提升。

楊思琦女兒楊卓穎
溫馨錫錫
非常乖巧的卓穎,好懂性地即場錫錫媽咪,冧到楊思琦甜入心。

楊思琦女兒楊卓穎
人財兩得
麥玲玲贈言:「楊思琦今年有桃花,財運亦相當之旺!」承師傅貴言,祝思琦今年人財兩得啦!

拍內地劇搵真銀

一直醉心幕前演出的楊思琦,坦言羊年想有新突破:「我好鍾意拍劇,傾緊今年可能參與內地一個新劇,但時間仲度緊,希望成功啦!冇法,我係屋企嘅經濟支柱,心口掛住個勇字,勇氣加啲冒險精神,冇嘢難到我嘅。其實我都想有新突破,始終人成熟咗經歷又多咗,好想發掘自己唔同嘅一面。」除拍劇外,去年在電影《辣警霸王花》和《哥基王子》客串過的思琦,感到拍電影十分新鮮好玩,故她已經接了一部電影,今年 6月開拍,實行影視同步發展。

麥玲玲師傅為思琦預測羊年運程,她表示思琦今年財運相當不錯,工作方面會更多機會走動,甚至赴外地發展。不過要小心一些動作片,因為會好容易受傷。

楊思琦女兒楊卓穎
活潑乖巧
將近 3歲的卓穎,對住鏡頭一點都不怯場,不時綻放可愛笑容,完全睇唔出她抱恙在身。

因為吳帥,楊思琦才會成為單身媽媽,故每當提及此人時,思琦都避而不談。
因為吳帥,楊思琦才會成為單身媽媽,故每當提及此人時,思琦都避而不談。

思琦:想找個人分擔

單親媽媽要獨力照顧孩子日子原本很難過,幸好楊思琦有個「得力助手」楊媽媽,由 BB開始已全力幫手照顧孫女卓穎,令思琦可以放心在外工作賺錢。始終女人都想有個依靠,思琦首次敞開心扉表示:「我都想有個伴嘅,不過呢個人未出現。但工作以外都要照顧個女,啲時間真係好唔夠用。我唔會刻意去諗嗰個人幾時出現,不過真係想有對手幫吓忙。我相信佢會喺適當嘅時候出現,希望呢個人等緊我。當佢出現咗,我先會知道將佢放喺咩位置,依家去諗都冇用。」
難得思琦開腔自白想搵個伴,對於上月有傳吳帥上門尋女,她聞言即顯得甚為避忌:「哎吔!唔答喇!已經講咗冇咁嘅事情發生。呢啲係舊聞,唔答喇!」看來吳帥的所有事情,始終是楊思琦的忌諱。
對於麥玲玲批思琦羊年姻緣運不錯,還會出現合適人選,楊思琦感到很好奇,想了解更多:「哈哈!真係??有冇話幾時呀?點適合法呢?(師傅話年中會出現。)突然間話有就有,我未準備好喎!既然師傅咁講,我就開始擘大啲對眼留意吓,睇真啲唔好走漏眼先。」

楊思琦女兒楊卓穎
堅持 say no
攝影師原本安排楊思琦母女分別坐在兩張羊仔毛毛櫈上拍照,但卓穎竟然 say no,仲堅持話「 I want to stand」!小小年紀,好有性格。

《Frozen》令囡囡聽話

今次特別邀請楊思琦及囡囡楊卓穎一同拍攝賀年封面,取其楊姓與羊同音。雖然明知拍攝小朋友是件十分困難的事,但拍攝初期,卓穎比想像中更難搞。

記者:穎穎換衫囉。
卓穎: No!
記者:你唔想化妝扮靚靚咩?
卓穎: No!
記者:等一陣扮完靚靚,同媽媽一齊影相喎。
卓穎:我唔要同媽媽影相!

快將 3歲的卓穎,由抵步到正式拍攝擾攘近半小時,其間試過尖叫、每事 say no及狂谷眼淚。但當記者使出撒手鐧,即場播放《魔雪奇緣》主題曲〈 Let it go〉時,她竟乖乖聽話,還識得跟着唱。

上契有利健康

對於母女檔拍攝,思琦感到十分開心,還讚卓穎表現不錯,給她 75分。「因為佢今日有少少唔舒服,加上佢咁細個,專注力一定唔及大人。佢又冇呢啲影相經驗,所以佢今日嘅表現算好好喇!」據知囡囡向來體質差,前年大病要入院及即時做切腸手術,近月亦間中感冒纏身。麥玲玲師傅表示楊卓穎今年身體會好番少少,但由於屬土都是弱,所以最好找個契爺或契媽就會轉好。

愛女心切的思琦眼見女兒受苦怎會不心痛,「囡囡健康係我一生嘅願望,佢就係我嘅生命。至於契媽呢,真係要諗吓有咩人會合適,始終一契就一世,唔可以即時答到你喎!(會唔會搵好姊妹鍾嘉欣做囡囡契媽?)都想嘅!不過都要問准人哋意見先得,我唔可以單方面做決定嘅。」卓穎人見人愛,思琦要幫佢搵契媽契爺,應該冇難度。


契媽人選
思琦與鍾嘉欣情同姊妹,相信嘉欣會是最合適的契媽人選。

楊思琦女兒楊卓穎
為了今次賀年封面,特意製作了兩幅大揮春「喜氣楊楊」和「楊楊得意」,楊思琦愛不釋手表示,「『楊楊』係我同 BB呢!」

狂谷寶貝女

楊思琦於 2012年狠飛吳帥後,獨自飛到美國產女,囡囡跟母姓,全名楊卓穎。之後思琦母兼父職,但她並沒有一絲後悔,反而投放更多愛給寶貝女。

思琦是個緊張媽咪,去年暑假已安排卓穎學英文、普通話及數學,加上 playgroup和游水班,生活極之充實。思琦避談女兒有否遺傳父親吳帥的跳水天份,只讚賞她有唱歌天份,及喜歡表演。卓穎現於紅磡名牌學校讀學前班,與陳慧琳的細仔劉琛是同學。

评论已关闭