第二届高登男神选举结果 黄子华第一 何韵诗第四

第二届高登男神喺上个月就公布咗入围名单,仲开始咗投票,而喺今日,结果终于出嚟喇。

今届有16个男神入围,当中除咗有“削骨还父,孝感动天”嘅胡鸿钧之外,仲有何韵诗,当然唔少得一班大热门,好似有黄子华、马国明、周润发、吴镇宇同埋林雪等等。

公布下今届嘅结果先,得到冠军嘅系万众期待嘅黄子华,其实子华一向喺网民心目中都好有份量,佢嘅金句仲不时都畀网民拎出嚟重温,所以佢上一届只系拎到第三,可以话系令好多巴打失望,而今届可以得到第一,真系众望所归。

第2位,就系上届嘅冠军马国明,第三名就系哥哥张国荣;而第一次入围嘅何韵诗,就得到第四。男神㖞!高登㖞!何韵诗今次,可以话系有唔错嘅成绩喇。

其后嘅排名就分别:第5谢霆锋、第6吴彦祖、第7吴镇宇、第8胡鸿钧,第9周润发,第10周国贤、第11陈展鹏、第12张家辉、第13陈冠希。不少巴打心目中嘅男神“肥雪”——即系林雪,只排14;火舞耀扬排第15,Eric Kwok郭伟亮排第16。包尾。

其实呢一个选举嘅结果,有啲都几令网民失望,先唔讲“削骨还父,孝感动天”嘅胡鸿钧,佢嘅“削骨”卖点,拎唔到第一都好正常,但有网民话佢排第8都畀多佢。而有民间特首之称嘅发哥(另一个系刘德华),只系得到第9,都好令网民失望。

第二届高登男神
详细票数一览。

评论回复