人人有nipple 袁嘉敏:我是挺直胸膛去提供服务

面𠮶浸,系太阳娱乐黄柏高旗下艺人,实情呢,袁嘉敏自己听电话、接访问,自己化妆吹头,独来独往自己来拍照,她说是供求问题,自己有自己的制作公司,只有在需要的时候,太阳娱乐提供“经理人服务”,帮她洽谈比较复杂的演艺工作。
30岁,香港大学文学士主修电影及文化研究, 13岁就在澳洲半工读,选港姐前已经在陈可辛吴君如旗下做过几年电影发行,对高学历、有主见、社会经验丰富的袁嘉敏来说,凡事离不开“供”与“求”,包括脱光衣服拍《鸭王》:“我天生眼大胸又大,连拍《杀破狼Ⅱ》着到密密实实,啲男人都净系见到我个胸浪下浪下。既然有咁嘅 quality可以被放大,王晶需要我俾钱我,我就提供服务,呢条路我唔系刻意行,系挺直胸膛去行啫。”
系好波嘅!我说的不是袁嘉敏的上围,而是她的态度。
可惜,什么年代了,男星脱掉会尖叫,女星脱掉却是原罪,袁嘉敏剥得再有道理,也不是人人懂欣赏。拍个专访,借场地间间酒店都 say no,服装也是问了好几个品牌才成功,一日三级女星,一世三级女星,搣得甩嘅,除了舒淇还有几个?
“有得搣,我觉得已经好好……有好多人除晒衫拍完都冇人知佢除过!呢个世界每日有咁多讯息攻击你,搭程地铁都可以见到几百个广告,你仲会记得我做过嘅嘢,已经 ok!有咩咁奇呢?大家都系人,都有两个 nipple,我唔觉得矜贵到唔俾得人望两眼囉!”
你有 nipple,我有 nipple,所以无乜所谓俾你望两眼……这种理论我还是第一次听,而听落,又确系有啲道理。

脱星不归路 人人有nipple 袁嘉敏:我系挺直胸膛去行

唔通我喊,又要 call晒记者?

同太阳娱乐已经完约?
其实我有自己制作公司,有出月薪俾自己同事,系 Paco帮我公司提供一个经理人嘅服务。我觉得艺人属于边个经理人公司,唔使大张旗鼓去讲。我唔系年纪轻,都就快 31,你估 18、 9岁咩,就话要经理人无时无刻带住啫!

被《鸭王》演员孤立,拍《豪情 3D》又俾杜汶泽话八婆,觉唔觉得系你太独立、无后台,所以特别惹是非,特别多人踩多两脚?
我觉得唔需要太过在意,有啲人需要发泄,香港最好就系有言论自由。佢想讲咪讲囉,收入有冇好咗先?不如你又计下,抽完我水,佢哋嘅下场如何?系咪广为人知呢?何浩文有冇多咗广告?杜汶泽……佢不嬲都系咁㗎啦,我唔同佢计喇。娱乐圈就系咁㗎啦……可能我细个钟意 Michael Jackson, The King of Pop都有碟卖唔出、都有人误解㗎。

你觉唔觉得自己太有谂法、太独立?作为观众,会觉得你太多棱角太多刺?
多谢……我喊嘅时候,唔通要 call晒记者嚟影咩?我成日话俾自己听,就算发生咗啲再大嘅丑闻,我都要化行妆、 set行头行出嚟……点解?我唔要好似啲人咁,着住件白恤衫,又要素颜又要喊又道歉,越系有挫折,我觉得越系要俾人见到你最光亮嘅一面。

所以出面咪对你好多误解囉!连影相,都好多传闻话你诸多要求、好麻烦!
我冇听过呢啲讲法,我唔会催眠人哋去钟意我,我接受自己有艺术家脾气,唔需要人人都接受我……声音就系声音,每个人都有见解,我唔介意你哋讲乜嘢,总之写我嘅名冇写错就得喇!好似杜汶泽咁,拍戏时叫我“阮嘉雯”、拍完套戏都仲系叫我“阮嘉雯”。

咁怕俾人讲,不如返去拍《爱·回家》

脱星不归路 人人有nipple 袁嘉敏:我系挺直胸膛去行

你识咁谂,都几睇得开。
唔系可以要求啲乜?我又唔识唱海豚音、又唔系做戏有几劲,亦都唔系天份一流不能错失,我都同大家一样去 casting,要等两个月等结果,导演觉得我提供到佢需要嘅嘢,所以拣我去做咋嘛……好似《杀破狼Ⅱ》个角色就系咁得返嚟。人哋投资一亿五千万,我喺现场若果表现唔到,都大可以换咗我啫。我份人钟意另类,唔想拍埋啲《爱·回家》𠮶啲,每次对白就系“阵间饮奶茶定咖啡”……拍《爱·回家》咪唔使怕俾人讲囉。我拍埋𠮶啲唔系血腥就裸露,点要求报纸杂志写我系个小妹妹呢?老实讲,就算去到荷里活,有几多个角色系慈母呢?呢个工业男性主导,《杀破狼Ⅱ》、《鸭王》都系男人写剧本,又系男人戏,有几多个男人眼中女性就系慈母贤妻呢?
其实有谂头、高学历(港大文学士)、选港姐前又已经有电影发行经验,行性感真系唯一出路?
我讲呢套你未必接受,我唔系想行性感……系我本身特质就系咁样:眼大胸大,啲男人望住我都觉得我有桃花,连拍《杀破狼Ⅱ》着到密密实实,啲人都话净系见到我浪下浪下(上围),制作人话不如放大我呢个特质。即系话,如果我天生一副好武功,去做打星,因为我有呢种 quality,又系供求问题,点解唔去放大呢?你有件衫俾我,我天生有胸,又唔系话要塞两嚿嘢落去垫大,咪着囉……件事自然而成,唔系我刻意去行,系我挺直胸膛去行啫。

可惜个社会无进步,廿年前同廿年后,三级女星都系会俾人藐,有冇谂过你挺直胸膛行呢条路系条不归路?有冇谂过要用几多时间搣甩个朵?
有得搣,我觉得已经好好……呢个世界有好多人,除晒衫拍完都冇人知佢除过。好似提名过香港电影新人奖嘅蔡洁,其实佢喺《香港仔》全裸过,又有几多人知?我做完有人讲已经好好,最惨系冇人讲啫。呢个世界有咁多讯息攻击你,搭程地铁都可以见到几百个广告嘅,你仲会记得我做过嘅嘢,我觉得已经 ok。

人人有nipple,我冇矜贵到唔俾得人望

父母、哥哥同妹妹,屋企人对你行呢条路又有冇意见?
我哋三兄妹,唔同样唔同路,但一睇就知系一个 collection。我哋三个香港出世、系中山老家。我好自豪话我哋系孙中山嘅同乡,中山人个个都有冒险精神、做嘅嘢够独特,就好似孙中山细细个就去咗夏威夷,都系一样,面前有条路佢就会行。至于父母,亦都有佢哋嘅大胆。

屋企人有冇入场睇《鸭王》?
冇!我屋企人冇人做呢行,亦唔会将呢行嘅嘢放得太大。尤其系爸爸妈妈,佢哋觉得打仗时最重要系医生, entertainer算得系咩?天下太平咪有得捞囉。但系《杀破狼Ⅱ》,我前晚带咗佢哋入戏院睇。

点解唔系入场睇《鸭王》?
因为爸爸妈妈六十几岁,我唔觉得佢哋会被娱乐到囉。我对父母嚟讲系一个演员,有角色就去演好佢,唔肯演咪坐喺屋企等囉……我谂我做过呢几套戏,之前都一定有演员推过先至轮到我演,无所谓㗎,我冇别人谂得自己咁矜贵。有啲女士觉得自己好矜贵,但我裸露嘅时候唔觉得我嘅身体同你嘅身体有咩分别,大家都系 human being,每个人都有两个 nipple㗎啦,我冇觉得我矜贵到唔可以俾人望下囉……我真系冇呢个咁尊贵嘅谂法。

讲到矜贵,之前卷入淫相风波。虽然相中唔系你,但你有冇试过?接唔接受到情侣拍呢种亲密照?
𠮶个摆明唔系我,我拍拖嘅时候完全沐浴于爱河之中,但一定唔会拍呢啲……完全冇美感可言,我呢啲艺术家脾气,冇可能!仲有,既然相爱中,系投入系 enjoy紧嘅,仲边会得闲影呢?我谂我同会影呢啲相嘅人有代沟,佢哋仲后生啩……食饭影我都觉得烦,俾人食先得唔得?

几耐冇拍拖?
好多年喇……你系唔系有好介绍先?对上𠮶个同呢行有小小关系,第一任男朋友就系我喺跑马地做三文治店嘅客,系呀,两个男朋友都大我好多,初恋我 21岁,佢 35岁。

最高纪录,一千万见个面

脱星不归路 人人有nipple 袁嘉敏:我系挺直胸膛去行

31岁净系拍过两次拖?
唔丰富㗎,因为屋企环境唔好,我五、六岁就帮阿妈黐胶花……真系唔停得手𠮶种,唔系啲人一路睇电视食住糖一路 hea住黐。跟住 13岁去澳州,由洗碗洗炉开始,够大就喺门面捧餐。 19岁时,父母话真系供唔起我去澳州,我返咗香港申请港大继续读书,课外兼两份职供自己读书……记忆中,我真系冇乜课外活动,选港姐时,个个有专长,钢琴、小提琴、跳舞𠮶啲,我好后悔,自己乜嘢专长都冇,从来放学就系返工,我谂我嘅专长就系捧餐。

第一个男朋友点识?
沙士之后我返香港读港大,日头做补习社,夜晚去 Hard Rock Cafe带位,一直带到凌晨三点。大学二年班我喺三文治店整沙律整包,当年卢觅雪住喺对面,都系我熟客,第一个男朋友都系返工识。

初恋几多年?点解会分手?
佢比我大十几年,一齐四年,分开就系因为佢想快啲结婚生仔,𠮶年我得廿一岁咋……谂落都有啲后悔!

Why not?早啲嫁唔好咩?自己养咗自己咁多年,有人供你读大学唔好咩?
第一次拍拖嘛,港大四万几蚊学费啫,我自己都揾到……我从来都冇呢啲谂法,佢都要生活㗎、佢都系打份工啫。

有冇试过别人问价?
有!呢啲每日都会发生。

最高纪录几多钱?
过千万……前两日咋嘛,话两三日,见个面、食个饭㖞……

摄影哥哥叫你帮手问下,男人有冇兴趣㖞?
人哋开呢个价,你都知啲人系咩人啦,就系觉得用钱可以买起你嘅人囉。

点解你唔去呢?因为佢讲明叫你做乜?
冇,冇人会讲得好明,呢啲人好精,唔会 set个框俾自己。呢啲钱易赚,但系我冇咁嘅需要,我系一个演员,唔系一个妓女。但系咁㖞,我觉得等于细个去捧餐,大家平等,呢一刻我 serve你,下一刻我都去咗第二间食店俾人 serve,佢提出要求,我未必会提供服务俾佢,但将来我唔排除去识下朋友,呢啲人咁多生意,不如倾下有咩合作啦!

说,还是不说

大家都说袁嘉敏拍起照来很麻烦,说实话,我觉得还好:一个女仔,一个人来影楼,自己的身体自己话事,说清楚了好办事,好过好多女星矫揉造作,借助手把口扭扭拧拧。
杜汶泽曾经在《鸭王》上映期加把口说袁嘉敏是八婆,说她拍《豪情3D》出尔反尔唔肯露,袁嘉敏说:“合约讲到明,系唔系要我攞出嚟?再讲套戏我实袋X万(袁说签了约不能写出实价),会唔会为咗咁小钱除呢?我唔想同呢啲人计,佢讲𠮶两个字(八婆),我讲唔出口,从来唔会咁样话人。”
有些话说还是不说,是选择。把丑话说在前头,和爱在事后踩多人一脚的人,我选择敬重前者。

撰文:朱小博
摄影:范仲良
形象: Bryan@the Flaming
形象: Blossom

评论已关闭