電視有正嘢

《掌上明珠》　一屋都係奸人

770期 忽然1周 2010年04月30日

《掌上明珠》，驟耳聽起嚟，同去年嘅《珠光寶氣》相似，故事亦都係以珠寶為背景。其實，《珠》係三姊妹喺商場上嘅鬥爭；而《掌》則係三姊妹為爭奪家族珠寶生意鬥個你死我活。
今次《掌》劇最大嘅突破，就係入行十七年嘅宣萱第一次做奸角，仲要係奸到出汁嗰隻，除咗要同商天娥及陳美詩鬥之外，跟林保怡及陶大宇亦有連場惡鬥。一句講晒：《掌上明珠》成家冇個好人。

表面溫順敦厚嘅林保怡，實則狼子野心；而性格執着嘅商天娥，跟滿肚奸計嘅宣萱，為奪產、為爭林保怡而反目成仇。

對於《掌上明珠》同《珠光寶氣》類似，《掌》嘅監製林志華強調兩劇完全係兩回事。《掌》嘅劇情背景係六十年代，雖然都係以珠寶為主線，但《掌》其實係家庭倫理劇，係講三姊妹為咗爭奪老竇留低嘅家產而各出奇謀。
先撇除《掌》嘅故事內容，單講演員陣容，除商天娥、滕麗名出鏡率較多外，宣萱、陶大宇及林保怡都好耐冇喺熒幕出現。而宣萱更破格飾演奸角，誓要將老竇剩落財產手到拿來。
講到口水花噴噴，究竟古仔係講乜呢？

率直樂觀嘅陳山聰，跟隨老竇秦煌喺朱家打工；但卻不知不覺成為三小姐陳美詩反抗家族嘅擋箭牌。最後亦跌入林保怡奪產陷阱之中。

視財如命嘅滕麗名，喺陶大宇安排下，成為朱家老爺劉江情婦，卻鍾情林保怡，最後淪為林嘅報仇工具。

工心計嘅宣萱刻意拉滕麗名埋堆，目的係要壯大自己喺朱家嘅勢力。

林保怡利用商天娥對佢嘅信任，以權謀私，最後因俾商揭發其奪產陰謀，走上不歸路。

宣萱欲利用林保怡對付商天娥，卻不知自己正一步一步踏入林嘅圈套。

陶大宇外表似不事生產、貪威識食，實則有勇有謀，得悉宣萱背後目的之後，對宣由憐生愛。

奪產戰大爆發

角色關係表

故事開頭係咁嘅：宣萱飾演嘅朱家二小姐，因為老公死咗，帶埋個仔返外家，但就刻意要插手一向係大家姐商天娥打理開嘅珠寶生意。商天娥為免宣萱得勢，就要入贅嘅老公林保怡諗計。誰不知林竟然手指拗出唔拗入，反而暗中幫宣萱解困，商天娥仲要俾林，令佢染上毒癮，變成道姑。
正當商天娥陷於四面楚歌之時，突然又殺出個自稱係朱家老爺劉江情婦嘅滕麗名，滕仲話已經有咗劉江嘅骨肉。朱家三姊妹雖然覺得來者不善，但為尊重死鬼老竇，姑且暫時收留滕，睇吓佢會使出咩花樣。最後，宣萱發現，滕原來係表哥陶大宇放喺朱家預備爭產嘅一隻棋子。劇情發展，就係一屋奸人鬼打鬼！

播映日期： 5月 3日起周一至周五晚 8:30pm翡翠及高清翡翠台

撰文：姜培綺