呂慧儀獲志偉賜食後上贏咪神

曾志偉監製賀歲片《72家租客》前晚午夜場首映，逾百藝人撐場，場面星光熠熠，不過近日被爆已婚的陳法拉，未知是否為避傳媒追訪而缺席，造就呂慧儀、高海寧、廖碧兒等「胸群而出」，以低V晚裝現心口事業線搶鏡，最後由呂慧儀勝出，獲志偉親自「賜食」，當眾餵食壽司。

邵氏賀歲片《72家租客》前晚舉行午夜場首映，多位有份演出《72》的藝人，如曾志偉、張學友、袁詠儀、王祖藍、謝天華、鍾嘉欣、黎耀祥等逾百位藝人均現身撐場，加上多位電影及唱片公司的高層及老闆亦有現身，場面星光熠熠。近日模特兒諸葛梓岐爆料暗指佔戲不少的陳法拉已婚，未知是否為避傳媒追訪，有「索拉」之稱的她全晚唔見影，結果呂慧儀、高海寧等一眾以低V晚裝示人的女星，順利成為全晚焦點。

高海寧以低Ｖ藍色晚裝，盡顯美好身段，新一代咪神果然名不虛傳！

呂慧儀手挽王晶合照，上位之日不遠矣。

打造五位數戰衣以前低V、後露背的呂慧儀，技術性擊倒師妹高海寧，成為首映儀式上有幸獲志偉親自餵食壽司的幸運兒，呂慧儀嗲聲嗲氣地解釋性感示人原因：「咁大會話要着得隆重啲吖嘛，我特登搵sponsor度身訂造呢套五位數字嘅衫㗎，（密謀搶鏡？）如果真係令大家注意到我，我好意外，高海寧、廖碧兒今晚都好靚。（但你有得畀志偉餵食喎！）志偉對我好啫，佢知我冇嘢食嘛！」雖敗猶榮的高海寧，雖然悉心打扮但仍輸給師姐，但仍大方讚對方漂亮。

歌手泳兒（左）和鍾舒漫亦有畀面撐場。

穿谷胸裝的廖碧兒，與樂易玲雞啄唔斷。

周家蔚的裝扮滿載青春活力。

楊秀惠露長腿示人。

鍾嘉欣的密實裝扮比其他女星略顯遜色。

朱慧敏輕托下巴的甫士嬌俏可人。

誇海口贏黃百鳴身為該片監製的志偉，全晚高興得拿啤酒滿場飛找人碰杯，對新片更是胸有成竹：「睇牌面就知我哋套戲贏硬，我預收二千五百萬左右，贏《花田囍事2010》三百萬啦！黃百鳴個傻佬去咗成都，佢怕咗我今晚唔敢嚟，哈哈。對方搞首映我實踩場，睇埋佢套戲，咁就贏得安心。」心情high爆的志偉，在台上突然向全體演員九十度鞠躬，並說：「呢次真係對大家『無言感激』。」散場後，眾星移師尖沙咀赫德道食店消夜醫肚。

呂慧儀露前又露後，成功獲志偉賜食，成為全晚的「大贏家」！

無綫有線同時訪問 學友創先河似發夢

張學友前晚在首映上接受無綫的黎芷珊訪問時，在旁的志偉見問題隔靴搔癢，遂搶咪扮主持，與學友一唱一和，並大唱賀年歌。及後有線的衞志豪以為無綫訪問已完，上前欲訪問學友，嚇得芷珊狼狽彈起，志偉遂叫兩台一齊訪問，被夾在中間的芷珊只好以笑遮醜。學友對着兩台的咪牌以廣東話說：「講國語好辛苦，兩支咪一齊冇界限好開心，係幾十年來嘅驚喜。（開創歷史？）係志偉先做到，我都唔知係咪發緊夢。我聽日都會接受亞視訪問。（點睇新城台長朱明銳寸港台扮大佬？）我建議統一頒獎係我錯，只要有共同準則，具代表性就得。」及後，志偉見衞志豪將咪遞向自己，他說：「你細台閃遠啲，ＴＶＢ係大台乜都講得。（怕得罪無綫？）冇嘢怕，開心就得。（做和事老？）乜問咁嘅嘢！」無綫高層樂易玲則稱：「早知有線出席，多謝幫手宣傳。今次係電影，以後點做遲啲再講。」

學友接受林曉峰的訪問將於年初一播出。

此外，學友接受林曉峰訪問的亞視節目《張學友的Private Corner》，將於14日晚上八時半，於本港台及亞洲高清台播出。

志偉（左起）、黎芷珊、學友和衞志豪齊做訪問，可謂開創歷史。