互頂宣言累事 胡杏兒300萬見財化水

醋意大發

互頂宣言累事 胡杏兒 300萬見財化水

2011年12月22日

捱足十年,胡杏兒月初憑台慶劇《萬凰之王》贏得三料視后,在台上向黃宗澤公開「互頂」宣言,七年地下情終於浮面,準視后更話到明非君不嫁。原本事業愛情兩得意,不過一番愛的宣言,卻令她早前以超高價十萬一集接拍的三十集內地劇《董小宛》臨門撻 Q。

據了解,本身是胡杏兒超級狂迷的投資老闆,當知道女神被私有化後醋意大發,最後因愛成恨,借國內審批為藉口,決定將女神叮走,令胡杏兒白白損失三百萬。


我唔制呀!(設計對白)

粉絲愛女神

胡杏兒原定拍完《怒火街頭 2》,便會返內地拍劇賺人仔,雖然未及視帝每集二十五萬身價,不過接拍古裝劇《董小宛》,就由三萬蚊人仔一集跳升至十萬,可以袋走三百萬過肥年。
「杏兒內地知名度唔高,同阿佘(佘詩曼)仲爭幾班,佢之前拍內地劇《跑馬場》都係三萬蚊一集,《董小宛》係攞視后之前傾落,之所以叫到十萬一集,其實因為投資方兼製作人係杏兒超級粉絲,先至咁手鬆。」知情者說。
上週一(十二月十二日),《怒火街頭 2》在烏溪沙大草地拍煞科戲,胡杏兒當日三點通告,由於將近收工,一班演員表現輕鬆,曹永廉將坐在道具輪椅上的鄭嘉穎推來推去玩到翻車,在旁的胡杏兒亦笑到彎晒腰。


有我錫番補數。(設計對白)


上週一,《怒火 2》拍煞科戲,曹永廉玩推輪椅,被推的鄭嘉穎玩到跌落地。


拍完《怒火 2》,胡杏兒應在十二月中上橫店開工,不過因撻 Q依然未動身。


鄭嘉穎跟胡杏兒齊齊獲獎後,二人均自爆會返內地掘金。

冇行縮沙

據了解,胡杏兒拍完《怒火 2》,在港休息數天後,便要在十二月中前飛上橫店開工兼過新年,不過上週出席活動的她,突然改口風要到一月先起程。
「個老闆好鍾意杏兒,但聽完佢講『互頂』宣言後,即刻冇晒心機,加上講到非黃宗澤不嫁,老闆知道自己冇行,咪索性搵藉口話未申請到批文,閂水喉唔開劇,無綫都好積極,即刻幫杏兒傾到另一部劇,但價錢去返三萬蚊一集,杏兒仲係心大心細,一來驚俾人知道撻 Q冇工開肉酸,二來做咗視后仲係收舊價,過唔到心理關口。其實內地有好多演員可以揀,如果杏兒响聖誕前唔肯答覆人哋,製作單位隨時搵過第二個。」知情者說。
求證《董小宛》臨門撻 Q,胡杏兒經理人支吾以對,回應未知開工日期:「可能一月先開拍,而家都唔知,要等劇組嗰邊通知我哋。」


謝天華因 Laughing哥爆紅,除跟陳法拉孖住出活動搵錢,又會拍住鄭嘉穎上內地拍劇賺人仔。


鄭嘉穎拍內地劇袋走接近千萬,又被指跟舊愛佘詩曼翻撻,胡杏兒則因愛的宣言而損失三百萬,冇得人財兼收。


胡杏兒去年跟黃宗澤情侶檔接拍內地劇《跑馬場》,只有三萬元一集。


鄭嘉穎憑內地劇《步步驚心》飾演八皇爺大爆而人氣急升,故近日再以廿六萬一集接拍新劇《英雄》。

愛你變成累你

在頒獎禮台上公開愛的宣言,另一半當下一刻又冧又開心,但激情過後卻演變成愛你變成累你,人氣冇得升之外,事業也大受影響。

許志安
廚房宣言

02年許志安奪得最受歡迎男歌手獎,經典一時的廚房宣言,將他與鄭秀文的親密關係公開;可惜往後兩人感情不但未有進一步昇華,還於 04年宣布分手,令許志安的人氣也大受影響。

陳偉霆
新城宣言

去年底的新城勁爆頒獎禮上,陳偉霆( William)大方在觀眾面前,向蔡卓妍(阿 Sa)講我愛你,但一番甜言蜜語外界反應一般, William繼續被指借女友搏宣傳。


本文鏈接:互頂宣言累事 胡杏兒300萬見財化水