Me!週刊 第167期
cover face
佘詩曼“拍拖阻住我”
2010年02月26日
這一日，佘詩曼一邊化妝一邊做訪問，中午時份，助手問：「想食乜？」
「呢度唔准叫外賣，靜靜雞叫唔係咁好。」表面證供，阿佘應該幾循規蹈矩。
小、中學就讀協恩女校，中六後，旋即前往瑞士修讀酒店管理，想當年，這一個國家這一科，又 hit又中產，是多少民間女子的夢想。回港後，目標為本，搵工只向五星級酒店埋手，「一係唔做，一做要做好啲。」最後，做唔成管理，當上了香港小姐。
Charmaine Sheh
白色 lazer-cut蛇皮紋羊皮中褸（未定價）
白色織紋透視上衣（未定價）
Both Salvatore Ferragamo
一份見得人的履歷。
拾級而上，未輸過，形成唔可以屈就的性格——包括感情。
入行至今，名字總離不開「男朋友」，幾乎合作過的對手都傳緋聞，最轟烈的鄭嘉穎，最新鮮的陳豪，最冇記憶的陳浩民都數埋……
「點解大家對我感情生活有興趣？可能我有神秘感。」
神秘感，潛台詞是賣座保證，阿佘唔止是大台「我最喜愛的電視女角色」和最具搵錢能力的電視藝人， 06年更被封「年度華人四大名旦」之一，跟林心如、劉亦菲和趙薇齊名。
三十有五，事業萬千星輝有名又有利，恨拍拖，但恨還恨，陳李張黃何任憑哪一位，女強人面前，只是 side dish。「我唔係聽晒男朋友話嗰種人。」
今時今日，得來不易，押上愛情也在所不計，「每個人有好多 stage，搏殺期，拍拖阻住我……
「依家都係，唔可以要一個影響我情緒嘅男朋友。」
事業與愛情，從來難雙贏，尤其是，當你死都唔肯讓步的時候，揀事業，明碼實價，最可靠。
小時候面圓圓，除咗塊面愈大愈尖，其他冇變過。《蘋果日報》圖片
少女時代，唔反叛，仲好識得照顧自己，睇埋細佬功課。《壹週刊》圖片
當選後，即被劇組招攬，但萬事起頭難，花瓶形象，經過一番努力才洗擦得甩。
Profile
Charmaine Sheh
出生日期： 1975年 5月 28日（雙子座）
出生地：香港
身高： 5呎 3吋
體重： 100磅
語言：廣東話、國語、英文及德文。
學歷：瑞士 International Hotel Management Institute Switzerland酒店管理文憑畢業
簡歷： 97年獲選香港小姐季軍，同年 12月簽約成為無綫藝員。 99年演出首部電視劇《雪山飛狐》。 00年憑《十月初五的月光》跟張智霖成為「本年度我最喜愛的拍檔（戲劇組）」。 01年拍罷《酒是故鄉醇》晉身一線花旦。 06年憑《鳳凰四重奏》連奪台慶「最佳女主角」和「我最喜愛的電視女角色」，成為雙料視后。
主要作品：電視劇《雪山飛狐》（ 99），《十月初五的月光》（ 00），《酒是故鄉醇》（ 01），《無頭東宮》（ 02），《金枝慾孽》（ 04），《火舞黃沙》（ 06），《歲月風雲》（ 07），《法證先鋒 II》（ 08），《宮心計》（ 09），《天與地》（ 10）。
電影《跑馬地的月光》（ 00），《月滿抱西環》（ 02），《美女廚神》（ 07），《 72家租客》（ 10）。
官方網址： http://www.shehsheh.com/
唔好迫我
做女人難，做名女人更難，難在搵對象。
佘詩曼 18歲初戀，維持年多，雖說深刻，但在她口中，完全感覺兩回事，「我去讀書，被迫分開，冇辦法。」
今日，她對愛情，仍然理性行先。要拍拖，就要懂得駕馭個人情緒，瘋戀二字，早已不存在於佘氏字典入面。
「可以話，工作上我已擁有滿足感，過咗搏殺期，有少少想拍拖，但份工靠情緒去表演，如果日常生活都被人搞到又喊又笑，我 handle唔到，會發癲。
「拍拖唔一定要發癲。」
談戀愛要保持冷靜，好難喎！
「點會呢？譬如話，有啲人性格唔鍾意將個心打開，係愛你，但永遠將自己收埋，咁樣我好難了解佢，呢種人，就會令人情緒好起伏；我個人唔係 o架，忍唔住要乜都講，講完冇事，呢種性格，咪冇咁容易令人牽動情緒囉！
「（靚仔另計？）我唔抗拒靚仔，嘻，以前男朋友冇一個係靚仔。（真嘅？）真嘅。」
屈指倒數，陳豪鄭嘉穎馬德鐘張智霖陳浩民連吳卓羲都高頭大馬有型有款，唔通現實不如做戲？
「我要一個心胸廣闊嘅男朋友。
「依家唔同十幾廿歲，拍拖唔會玩玩吓，希望一齊生活，唔同以前，鍾意就得。」
想搵同居密友，就要有為愛情犧牲事業的準備。
「為一個男人放棄事業？完全放棄呀？咁我做咩呀？咪好悶？點可以大家一齊，明知我鍾意做戲，偏偏迫我放棄呢？咁都唔係好鍾意我啫……唔……如果好鍾意呢個人，又知佢想我唔做，都會嘅……
「但唔可以迫我，唔可以 set死我。」
Charmaine Sheh
灰粉紅色 ruffles雪紡連身裙＄ 18,800 Fendi
Charmaine Sheh
白色針織綴 CC logo吊飾連身裙（未定價）
黑色皮高筒涼鞋$17,800
黑白閃石吊墜珍珠頸鏈（未定價）
白色綴金鈕粗手鈪（未定價）
All Chanel
我俾人出賣過
2000年起，阿佘成為最旺劇的女主角，拍乜紅乜，事業有成，人愈叻，姻緣愈淡泊，梗係，係男人都怕女人叻過自己。「叻定義好表面，可能男方係好叻烹飪哩，我又冇理由同大家分享，叻唔叻，係人哋睇啫。
「同一個人一齊，最緊要開心，其他唔重要。」
努力尋開心，講拍拖，也講工作。
當上港姐後，馬上被邀改簽藝員合約，首兩套劇《生命有 Take 2》及《雪山飛狐》均被人笑雞仔聲，搞到佢幾乎連工都唔想再返，「以前係咁叫我做柔弱、小家碧玉角色，都唔係我嚟嘅，初入行就要做一啲跟自己唔類近嘅角色，好難。
「係咁俾人踩，以為自己入錯行。」
接着拍《十月初五的月光》、《酒是故鄉醇》，終於開竅，「初五角色爽朗，跟自己相近，做得自然，別人覺得我有變化，《酒》在大陸實景拍攝，開工第一日我已經覺得自己係當地人，好投入。
「漸漸被認同，有咗自信，開始覺得自己有演戲天份。」
十年間，由「一嚿飯」躍升為視后，收拾回憶，最大教訓竟然是被朋友出賣。
「初入行，我信人，同一個朋友講知心話，第二日，所有內容上晒 C1，好明顯件事經過鋪排。好彩當時自己冇乜新聞價值，傷害冇咁大。
「依家，我只會搵圈外朋友傾偈，試過俾人出賣，唔再咁容易乜都講。」
最新緋聞男主角是陳豪，不過，今次阿佘話已越過底線，會發信告人，還自己清白。《壹週刊》圖片
《宮心計》將攻南韓市場，公司為她搵老師學定韓文，準備唱主題曲。
跟鄭嘉穎傳拍拖，算是她近年最爆的緋聞。《忽然 1周》圖片
Chanel新裝件件 slim cut，有錢都未必穿得起，但阿佘 fit size有餘，羨慕死人。