「人在做天在看」
劉綽琪鬧志雲累人冇飯開

劉綽琪昨日大鬧陳志雲時，一時氣憤，沒有顧慮儀態，露出「缽仔糕」。

【志雲難局之棄卒抽水】無綫業務總經理陳志雲涉貪污被捕，事件全城關注。而已離巢的劉綽琪前晚出席活動時，更直指陳志雲處事不公，處處偏袒愛將，劉綽琪說：「當年我離開 TVB一半原因都係因為佢（陳志雲）唔公平，所有工作都畀晒啲愛將。」並謂：「人在做天在看。」

已離開無綫的劉綽琪前晚於銅鑼灣出席時裝活動時，主動與記者談及陳志雲涉貪污事件，劉綽琪說：「我相信法律係公正嘅，我相信司法，當年我離開 TVB一半原因都係因為佢唔公平，所有工作都畀晒啲愛將，錫愛將都要公平啲，每個人都有長處同短處，人在做天在看。」
問劉綽琪可有不公平對待的實例？她即說：「我只係唔鍾意呢個 system，好似我以局外人睇鄧梓峰，佢做咗十幾年先做到台慶司儀， Amigo（崔建邦）唔係唔好，但咁新嘅人咁快做到，之後都好少見鄧梓峰做司儀，陳志雲做將軍要分配好啲囉，有人啲 show over晒，有啲人就 under，個個以前都有碗飯食，家就有欠公平，好戥公司嘅人唔抵。」

王賢誌拒評陳志雲是否高調出巡。

陳志雲昨午乘七人車經落馬洲往內地，全車拉上窗簾，狀甚神秘。

陳志雲離港避靜

同場的王賢誌被問可覺得陳志雲日日出巡高調時，他表示不想多談，但他隨後又謂：「佢冇理由唔出街，都要出街買餸 o架。」對於劉綽琪指陳志雲處事不公，王賢誌說：「我喺 TVB時唔係冇嘢做，係我對自己有要求，有啲大騷好想做，我要求過但唔係要求就得，我唔想等落去，咪改變吓環境，但啲嘢係咪某個人決定，正如劉綽琪所講嘅就唔知喇。」
此外，昨日下午 5時許，陳志雲乘坐一部有內地車牌的七人車離開亞皆老街寓所，全車拉上窗簾，之後其座駕直駛往落馬洲絕塵而去，估計陳志雲是離港往內地避靜。而另一涉貪污被捕的無綫藝員寧進，前晚透過短訊回覆記者說：「暫時我甚麼都唔想講住，遲一會我想講的時候會找你…… THX」。
採訪：王連連
攝影：黃文成、黃文偉

陳敏之約落難志雲飯局

陳敏之宣傳新劇時大方承認約陳志雲食飯傾偈。

陳志雲日前與鄧健泓、張繼聰、唐詩詠及陳敏之等愛將飯局。昨日陳敏之到尖沙嘴宣傳新劇時承認此事，她說：「見面嘅內容真係唔方便講，只可以話係同朋友食飯，我有問候陳生，見到佢精神好好，我都好開心同安樂。陳生同我嘅關係亦師亦友，佢一直都畀咗好多機會我，我知道佢有事都好唔安樂，案件嘅事唔方便講。」

鄧健泓拒睇詹瑞文

鄧健泓昨日到商台接受訪問，談及與志雲飯局，他說：「見到佢（陳志雲）精神幾好，冇問題，大家傾得好開心，佢仲取笑我俾女飛。」對於詹瑞文以陳志雲涉貪事件作題材開騷，鄧健泓覺得他一直愛以新聞時事作題材，每個人也值得尊重，自己不便多談，但承諾對此劇目話題絕無興趣不會入場觀看。
採訪、攝影：何慧斯、馬建華、仇志德

孫耀威飯局笑話志雲

孫耀威坦認日前和陳志雲食飯，並透露由對方請客。

孫耀威（ Eric）、郭穎橋及岑潔儀等昨日到中環出席「 YO-HK New Opening」活動， Eric透露日前與陳志雲飯敍，對方的心情沒有受影響，他說：「嗰日係陳生請我哋食飯，我哋冇問佢私人事，同埋我同佢講好鍾意迷雲黨呢個名，陳生聽到都笑。」
Eric又指早前將陳志雲所講的「真的假不了，假的真不了」寫於網上後被指是寸陳志雲，他解釋說：「我係想話佢呢句說話講得好啱，我好尊敬佢，因為真係冇做過嘅話，事實最後會畀人知道。」此外郭穎橋及岑潔儀均有聯絡錢國偉，岑潔儀曾約對方食飯但遭拒絕。
採訪、攝影：李珮洳