只愛陌生人 田蕊妮

FACE週刊 第268期

面對面

只愛陌生人 田蕊妮

2012年07月11日

93年出道、 06年轉投無綫、 10年首次擔正、到新作《衝吧!瘦薪兵團》錄得32點最高收視成為劇集冠軍……對快將 35歲的田蕊妮來說,當家花旦和視后甚麼的雖然言之過早,但是成為網上熱話、民意高企終究是個好開始,大家都讚她在上週與劇中老公陳展鵬婚姻觸礁的一場哭戲演技到位、對白亦成為網上轉發熱帖:「我到o依家至發覺,原來我最愛嘅人,係我最陌生嘅人……」

回到現實,我們都知道,田蕊妮與杜汶澤結婚七年,丈夫剛剛從「米勒費雪綜合症」中死過翻生,本來就是恩愛夫妻,經過這一役,更成為共富貴共患難的典範:「好多人話我咁多年對佢不離不棄、終於守得雲開見月明,等到佢浪子回頭……其實我唔係你哋諗得咁好,兩個人一齊係互相影響,唔係得佢改變,我都改變緊……」事實上,哪一對模範夫妻都是從陌生人開始,任何一對壁人都遇過突然容不下對方的瓶頸,下一次再抱怨對方變成陌生人,先問問自己,是不是你變得容不下他了?

田蕊妮

緣未了

田蕊妮

今年三月,杜汶澤突然患上罕見疾病「米勒費雪症候群」,上位中並且正在浙江拍攝她第一部內地劇的田蕊妮,毅然向劇組請假,飛回香港,但求陪在丈夫身邊。三個月後,杜汶澤宣告完全康復,兩夫妻在西雅圖靈修兩週後齊齊回到工作崗位。

其實我唔係醫生、又唔係護士,明知自己喺佢身邊乜都做唔到,嗰刻,我淨係好想喺佢身邊,知道佢發生咩事、去到咩情況。嗰段日子,我真係唔知係佢陪緊我定係我陪緊佢,係佢安慰緊我定係我安慰緊佢。

佢唔可以講太多嘢,最興奮最多嘢講就係我返嚟嗰日,我最心痛亦都係嗰日,佢同我講:「老婆,我真係好攰……」醫生話佢頂唔順時就要入院,佢嗰日真係辛苦到話:「死啦,我係唔係應該要入醫院呢……」佢需要休息,大部分時間我就係拖住佢隻手,瞓喺張床、望住個天花板。嗰下我領悟到,人生根本唔到我哋去計劃,要嚟嘅嘢……話嚟就嚟……每個人最後嗰個畫面,都應該同我哋嗰刻一樣,望住個天花板,跟住合上眼。

見到佢咁,我真係好想幫佢、令佢舒服啲,但人就係咁,去到最尾,最親嘅人都幫唔到你。佢攰到瞓喺床,我就捉住佢隻手同佢講:「你得㗎……」佢睇嘢有叠影,我就講笑話氹佢:「你咁咪着數囉,人人得一個老婆,你望到兩個老婆喎!」佢話:「你話望到兩個老婆唔同樣就話啫……家吓我兩個老婆一樣樣喎,我接受唔到囉!」我哋兩公婆學佛,明白世事無常,但係始終諗唔到身邊嗰個人,三十幾歲人突然之間有病、嗰日可能係最後一日,真係會離開……

我以前好鍾意黐住佢,記得 2004年南亞海嘯, 26號發生海嘯,志偉叫咗我老公去斯里蘭卡。冇商量嘅餘地、冇機會送機道別,老公即刻返屋企執行李飛咗,嗰幾日完全打唔到電話畀佢,唔知佢咩情況……我仲記得除夕嗰晚,個個朋友叫我唔好一個人喺屋企、叫我出去一齊倒數,但係我唔想見人。一個人去超級市場買嘢返屋企,見到人哋個個都係雙雙對對、一大家人咁……嘩,難受到呢……

o依家,我識得喺佢工作或者出埠時享受一個人嘅時間,等到佢返嚟亦都享受與另一半二合為一。我有諗過最壞打算,如果我老公有一日真係要走,無論係因為感情有變定生老病死,我都唔會再留戀,因為我哋一齊嘅時候,雙方都享受到快樂,每一分鐘我都冇浪費,曾經真正擁有過,就夠喇。

田蕊妮在新劇《衝吧!瘦薪兵團》擔正與陳展鵬演一對,演技被網民激讚。
田蕊妮在新劇《衝吧!瘦薪兵團》擔正與陳展鵬演一對,演技被網民激讚。

田蕊妮
三個月前丈夫患病第一時間從內地回港:「都唔知係我安慰佢,定佢安慰緊我。」

一擔擔

杜汶澤最出名是小嘍囉泊到大碼頭,曾經是林建岳、劉德華身邊紅人,試過瞓醒就帶老婆過海食碗六百大元的福臨門翅,曾經儲車儲表儲 designer chair,稱呼人少得罪人多, 06年人脈爆煲跌入谷底;田蕊妮說,人人讚她捱足十幾年捱到老公信佛食齋變好人,其實自己也曾經好食懶飛打牌度日,無論變好定變壞,兩公婆一直步伐一致。

我真係冇大家認為咁好㗎……我從來冇等過佢浪子回頭,係,都係我哋一齊改變。我十五歲同佢一齊,佢一直當我女咁湊,好錫我、好保護我,成日驚我太蠢諗嘢太直,驚我受傷害、驚我俾人呃、俾人跣。我做亞視做得唔開心,佢話佢養我、叫我唔使做。去到無綫,我唔想俾人插,推咗唔做《超級巨聲》主持,係佢突然間推我出去:「你都成 33歲,唔可以再係覺得冇安全感就返去個窿度。你做咗,無論好定唔好,都係你嘅經驗。」……我以前好怕提老公,覺得咁樣冇鬼用、又影響前途,其實我咁細個識佢,我嘅世界係佢帶畀我,兩個人一齊十幾年,你等於佢、佢等於你,諗嘢一樣,想講嘅嘢亦都一樣,好似一個人咁分唔開。有時老公唔喺度,我冒出嚟一個念頭,我都分唔清係我嘅念頭、定還是覺得老公一定會咁諗。點解唔提佢?

田蕊妮 15歲參加亞視舉辦的《未來偶像爭霸戰》獲得冠軍入行,曾是亞視當家花旦。
田蕊妮 15歲參加亞視舉辦的《未來偶像爭霸戰》獲得冠軍入行,曾是亞視當家花旦。

田蕊妮09年若非阿澤鞭策,本來拒絕接劉美君棒做《超級巨聲》主持
09年若非阿澤鞭策,本來拒絕接劉美君棒做《超級巨聲》主持:「個節目好多人評論,我本來唔想做俾人插嗰個。」

田蕊妮拍拖六年, 05年杜汶澤在最風光時迎娶田蕊妮,劉德華做伴郎、黃秋生做兄弟。《忽然 1周》圖片
拍拖六年, 05年杜汶澤在最風光時迎娶田蕊妮,劉德華做伴郎、黃秋生做兄弟。《忽然 1周》圖片

初初出嚟拍電影時( 03年),我哋兩個關係好麻煩,完全溝通唔到,好唔明白第一日大家相識已經有嘅個性同習慣,點解去到嗰個階段係乜都睇唔順眼。我記得佢有一日講得好好:「你唔好淨係識得每日搵我缺點啦,最初我哋唔係咁㗎……」我聽到叮一聲,係喎,我真係每日都嫌棄緊佢,搵緊佢缺點。

講真,我有缺點,老公亦都唔完美,但係我覺得我老公好識得欣賞我嘅優點,亦都會喺我嘅缺點出嚟時,令我舒服啲。唔好覺得呢段感情全靠我一個人經營得咁辛苦啦,其實有陣時佢嘅一句說話同一個行為先至最大功勞,佢嘅付出唔比我少。我真心覺得佢好犀利、好有智慧!

女一號

田蕊妮

加入無綫六年, 10年第一次擔正電視劇《讀心神探》,論民望,今次《衝吧!瘦薪兵團》攀上高峰,又正值電視圈起風雲,還高調出席樂小姐壽宴,「升值」潛力極高……別怪我又要說到杜先生,是杜太太說,結婚了以後,覺得快樂最重要,再不會被「女主角」三個字綁手綁腳。

細個嗰陣真係會,拍每個鏡頭想人讚我靚、讚我好戲,覺得自己應該要畀人力捧。尤其係九八年拍完《縱橫四海》,好唔滿意點解自己咁好戲、個角色咁大回響,公司都唔識重用?我仲記得 99年我嫌棄亞視亂、又成日聽是是非非好多人背後話我寸,我一心想走,但就俾當年過檔嘅陳寶華(曾是無綫《真情》當紅編審)第一個召見。我嗰日攞住包檸檬茶, hea住咁坐低,陳寶華o依家都話我:「你個死妹,坐低仲問番我:『你搵我咩事呀……我諗住走喇喎……』」佢話一早聽人講我唔聽話。跟住佢揭我張約話:「唔怪得你咁嘅態度啦……你咁平……」嗰陣時我爆騷都係每個月得萬五,跟住佢加我 double人工。

o依家,我唔會覺得個世界我係中心、亦唔會覺得我哋兩公婆係中心,每個人同每個人之間緊緊相扣,互相關連互相影響。 o依家做戲我最想每場戲、每個人都開心,無論演員燈光服裝乜嘢崗位,開開心心工作、再帶住好心情返到屋企。我結婚以後,好隨緣,我唔抗拒你畀機會我,但我唔會搶,我亦唔識搶;我唔抗拒你重用我,我唔想俾咩女主角、女一號嘅框框住,做人有乜緊要得過開心?

田蕊妮曾經,做劉華鄰居,老公儲車儲表儲 designer chair,還揸住架 AE86帶田蕊妮在加多利山飄移
曾經,做劉華鄰居,老公儲車儲表儲 designer chair,還揸住架 AE86帶田蕊妮在加多利山飄移。《忽然 1周》圖片

田蕊妮現在,搬去元朗,信佛食齋,涼瓜莧菜也好好味。
現在,搬去元朗,信佛食齋,涼瓜莧菜也好好味。

一場夢

田蕊妮08年後杜氏伉儷齊齊學佛,假期全在印度、尼泊爾以及西雅圖靈修度過。
08年後杜氏伉儷齊齊學佛,假期全在印度、尼泊爾以及西雅圖靈修度過。

與丈夫一起信佛、一起吃素、一起每天打座,每年去印度靈修,田蕊妮的話有時候比杜汶澤更玄,有關生老病死,她開解記者:「我諗緊,其實回憶係唔係真係咁重要呢?回憶好似發咗一場夢咋嘛……等於我發夢夢見一碗叉燒飯,夢裏邊真係會聞到叉燒味、感受到嚿叉燒嘅口感一樣。我哋回憶,只不過同夢一樣,去選擇性記住想記住嘅嘢,從來唔會徹頭徹尾記住成個過程。生命中嘅好事壞事,同甜夢、惡夢一樣,既唔應該留戀、亦都唔好驚,因為始終都會有醒嘅一日。」我似懂非懂,但還是想跟阿田說聲謝謝。

撰文:朱小博
攝影:范仲良
化妝:小白
髮型: Minnie Cheung@Marek Art of Hair
形象: Bryan@the Flaming
服裝: Karen Millen


本文鏈接:只愛陌生人 田蕊妮