「佢咁性感當然行埋去」
馮仁昭四圍超：吳卓羲親近 Ella冷落江若琳

官恩娜穿着低胸露背裙，連過氣緋聞男友吳卓羲都話性感。

無綫一班藝人同歌手噚日喺尖東出席「壹電視大獎 2010頒獎典禮」，好多得獎藝人盛裝出席，包括黎耀祥、鄧萃雯、楊思琦、陳偉霆等，又有緋聞鐵三角官恩娜、吳卓羲、江若琳，同廖碧兒、陳豪，個個新舊緋聞男女，大方合照兼大方面對緋聞，相信坦誠面對，相比左閃右避，觀眾同 fans會更易接受。

同 Ella講悄悄話

多年前已經傳緋聞，後尾又傳不和嘅吳卓羲同官恩娜，噚日見面似乎大家都已經放下當年嘅成見，吳卓羲話同 Ella最少年幾冇見，大家見面唔會尷尬，吳卓羲又應記者要求主動走上前同 Ella合照，佢哋之後仲有細聲交談兩句，吳卓羲話：「我係男仔，佢又着得高貴性感，當然係我行埋去，男仔要有風度嘛！」性感低胸又露背嘅官恩娜，聽到吳卓羲喺雜誌訪問度話會祝福佢， Ella回應話：「最緊要開心，我都祝福所有人。」

影合照時，吳卓羲只顧同性感 Ella雞啄唔斷，江若琳甚為冇癮。

鄧萃雯同黎耀祥這對螢幕情侶，去到邊都係焦點。

江若琳讚有風度

廖碧兒講起狗狗病咗就忍唔住喊（小圖），陳豪話會安慰佢。

吳卓羲同 Ella合照嗰陣，江若琳應記者要求影相，初時未知要三個人一齊合照，江若琳企喺旁邊呆咗幾秒，猶豫又愕然，之後都有大方合照，事後江若琳話：「佢（吳卓羲）真係有風度，拍劇時教我好多嘢。」
另外兩個緋聞情侶廖碧兒同陳豪分開到場，廖碧兒講開佢隻 3歲小狗正接受手術治療背骨時，忍唔住喊出嚟，陳豪同佢影完合照之後都有細心慰問，陳豪話：「我都唔知佢乜事，不過會 sms問吓佢。」 Angelababy同黃曉明嘅感情越見穩定，身為前男友嘅陳偉霆話：「如果佢哋發展，會祝福佢哋。」

廖碧兒憂愛犬啜泣 陳豪送慰問

(星島日報報道)廖碧兒（Bernice）及陳豪昨日在頒獎活動碰頭，Bernice解釋剛由醫院趕來頒獎活動所以遲到，原來她的3歲愛犬（Kahlua）因脊椎問題正在醫院做手術，她擔心到一邊拭淚一邊說：「今次好突然，醫生為牠照X光及抽血，真係好擔心，牠是我的小朋友，每日一齊生活好Close，頒獎活動後會趕去醫院。」她稱不知道手術費多少錢，估計要數萬元。問她會否與陳豪分享？她相信傳媒會說給他知。

轉頭問陳豪知不知Bernice的愛犬入醫院做手術？他表示不知道，但稍後會致電慰問，同時希望她的愛犬無事。

文：余潤娟 圖：莫家聰

■陳豪十分緊張緋聞情人廖碧兒。