今日是大年初七，人人都生日！李司棋相約呂慧儀、高海寧及馬賽等食飯慶祝，更準備了5位數字大利是，搞到一班80後未開餐已失控狂搶！
李司棋向來喜歡熱熱鬧鬧，趁大年初七人人生日，相約同組經理人的呂慧儀、高海寧、姚子羚、馬賽、梁烈唯（唯唯）及黎國輝（阿感）食飯，司棋姐叫了多款意頭菜式，包括發財好市瑤柱脯、湯圓、蝦多士伴棋子茄等。
司棋姐新春開飯局，與一班後輩齊齊「擦」番餐。
高海寧（前排左）、梁烈唯、馬賽（後排左）及黎國輝同組感情好，互相勉勵。
食粒瑤柱變台柱
唯唯笑說：「炸蝦多士最好味，食完個個大紅大紫！」司棋姐亦鬼馬玩「食字」：「咁個個都要食粒瑤柱，食咗人人變台柱！」一班後輩個個等上位，當然舉手讚好，高海寧先講新年願望：「想搵多啲錢，拍多啲廣告同演好啲戲！」呂慧儀笑說：「畀你講晒我哋想講嗰啲添！」
司棋姐透露每年派利是額屢創新高，今年已預備充足彈藥：「今年預咗六、七萬蚊，當然會有大封同細封，睇吓識咗幾耐啦！」說罷從腰包拿出大疊利是，一班未婚的80後個個伸手狂搶，馬賽及姚子羚坐正司棋姐隔籬，可以搶多幾封，馬賽打開後即雙眼發亮說：「司棋姐果然出手好重！其實我習慣初十後先拆利是，不過今日咁開心，忍唔住睇吓！」
至於未婚的呂慧儀亦有派利是習慣：「係一位前輩教我，每年初一返到公司會派利是畀幕後人員，大家開心，工作氣氛都好啲！」
生日開心自然要慶祝，未知藝人最想收到甚麼禮物呢？
李司棋 ： 「可以去加拿大同個女過新年，係最好嘅禮物！」
馬 賽 ： 「我第一次拍劇，希望《女王辦公室》收視創新高！」
呂慧儀 ： 「我想收到一大紮花，最好有齊唔同品種！」
高海寧 ： 「最好有人送架車畀我，其次係手做禮物！」
姚子羚 ： 「希望有一個假期，同朋友去旅行玩吓！」
