唐詩詠:男人幾麻煩 認曾死心塌地愛邦邦

今年唐詩詠(Natalie)夠爆,不但在電視劇《真相》中表現突出,大有機會問鼎台慶「最佳女配角」;感情生活更爆,和崔建邦(Amigo)拖拖拉拉,藕斷絲連!今年九月突傳出男方帶備鮮花、戒指現身金鐘婚姻註冊處向Natalie求婚,聽到都嚇人一跳!唐詩詠死口唔認係崔建邦「未婚妻」,更口硬說:「我哋係乜都傾,好Close嘅朋友,連拖手仔簡單動作都冇!」採訪:方騫平 攝影:陳辰

唔做「情癡」,揚言要專注事業的唐詩詠繼去年勇奪「飛躍進步女藝員」後再下一城,今年升呢成為候選「最佳女配角」之一,跟陳敏之、陳茵媺、江美儀、陳曼娜鬥過你死我活!但講到得獎機會,她就有保留說:「個個都有爆點,曼娜姐同江美儀表現突出;陳敏之又因為拍《怒火街頭》博到受傷,真係強敵當前,我又唔可以話對自己冇信心,唯有用黑馬去形容啦,我反而希望試多啲唔同角色,好似《法證先鋒3》裏面的壞女人,有人話好想打我呀!迴響愈大我愈高興!」

作為朋友的崔建邦,有冇乘機鼓勵你呀?Natalie語帶肯定說:「肯定冇,在我嚟講,反而旁人或前輩級的鼓勵更加重要。」

認上邦邦屋企

經常影到做埋柴可夫司機,出入崔家的唐詩詠談到跟Amigo的關係說:「我同佢只係普通朋友咯,識咗咁多年,要認真分嘅話,係傾到偈,好Close嘅朋友,我哋乜都傾,但絕對唔係男朋友嗰種,連拖手仔都冇!不過,有單獨去佢屋企食飯。」明眼人見崔建邦黐得咁埋都有心想復合啦?Natalie即敏感避談:「佢應該專心做嘢,就算有心,都唔好呢刻,(有冇機會復合先?)感情要講緣份。」

Natalie又開出擇偶條件:「錫我啦,對我朋友好,有義氣,孝順!(忠誠呢?)都要!」以往崔建邦花心與忠誠距離頗遠,何解仲死心塌地愛他?Natalie表示:「件事唔係咁㗎,個世界咁大,我仲有人追㗎,只係唔啱;以前同佢拍拖時係(死心塌地),但都過咗去。如果話,男人唔壞,女人唔愛,在男人角度,女人唔壞,男人唔愛啫,男人有時都幾麻煩,主要睇吓兩個人夾唔夾。」不過,Natalie又忍不住替邦邦講好話:「外界標籤佢唔好,我都想佢好!而家只係靠佢自己努力洗底,我冇得幫!」

唐詩詠認曾死心塌地愛崔建邦,但這些已成過去。
唐詩詠認曾死心塌地愛崔建邦,但這些已成過去。
唐詩詠
Natalie今年十分爆,事業愛情皆多新聞。


本文鏈接:唐詩詠:男人幾麻煩 認曾死心塌地愛邦邦