唐詩詠（Natalie）在劇集《鐵馬尋橋》飾演的阿雁，劇情說她被人強姦已經夠慘，連帶心儀對象鄭嘉穎也被胡定欣搶走。

戲如人生，Natalie與崔建邦拍拖四年半，被o靓模鄺敏慧（中巴）介入導致分手。早前崔建邦被控涉嫌毆打中巴，原本事業如日方中，一下子事業連同聲譽盡毀，幸得Natalie公開力撐，患難見真情，有傳他在這失意時期翻追舊愛，Natalie雖然聲明「好馬不吃回頭草」，但卻留有餘地表示不會規限自己如何處理感情，因為理智與感情，從來都有衝突，但人的心靈卻是由理智與感情組合而來。

難怪Natalie在面對與崔建邦分手之事，卻能夠以理智與感情之間作出和諧的處理。

撰文：霍淇　　服裝：Guess

唐詩詠在《鐵馬尋橋》飾演的阿雁，身世可憐，自小被家人拋棄，幸被楊怡帶回顧家當養女，所以她把顧家視作救命恩人，對他們作完全奉獻，所有事情都是為了顧家。上星期，阿雁被李天翔飾演的譚忠強姦，雖然今次是Natalie首次拍被姦戲，但她卻說被姦得「好開心」！

爭得到未必好

這場強姦戲着重意識，沒有激烈搏鬥，反而令Natalie最難忘，是演繹被姦之後向大家說出這件事情。她說：「我俾人強姦之後自殺，入醫院時大家都唔知發生乜嘢事，最後我講咗出嚟，呢場戲難忘在可以有好多唔同演繹方法，其中一個係好竭斯底理，但我哋選擇咗用一個好安靜嘅態度，因為阿雁唔係一個好活潑嘅女仔，加上佢當時已經鍾意咗鄭嘉穎，講出嚟其實好辛苦，因為佢怕呢個男人可能因為佢唔乾淨而唔鍾意佢。」

劇情最終是鄭嘉穎被中途殺出的胡定欣搶走，問到Natalie遇到心儀對象被搶走，她會爭到底？還是選擇黯然離場？Natalie非常醒目笑了一笑，表示知道問題的來意（崔建邦移情中巴，與Natalie分手），然後說：「走囉，其實係一件好矛盾嘅事嚟，幸福係需要爭取，但我又唔相信爭贏咗會點樣，但其實唔應該用爭嚟形容，因為我唔會去做一啲嘢去趕走人哋，嗰啲先係爭，我覺得就算爭到，最後都唔會係一件光彩嘅事。」那是否靜待男方作出選擇？她想了一會說：「要睇下自己喺邊個位置。」

點解要返轉頭

現實中的Natalie，與崔建邦拍拖四年半以來，男方先後傳出多次緋聞，被指搭上宋熙年、甄詠珊、台灣模特兒Renee Li、袁彌明及徐淑敏，Natalie一直啞忍，直到崔建邦遇上了o靓模鄺敏慧，她與崔建邦的一段情終告完結。

問到Natalie忍耐男友去到哪個地步，她才會選擇放手？她說：「Feel（感覺）到對方個心唔喺我呢度，我就走！」自從崔建邦出事後，她多次公開力撐對方為人，難怪有傳聞二人舊情復熾，但她卻斷言：「好馬不吃回頭草！（咁你係咪好馬？）都幾好o架！哈哈！我又覺得我唔會限死自己，睇你鍾唔鍾意，可能去到某啲情況下，知道大家性格都唔啱，點解要返轉頭呢？」

既不吃回頭草，又不想限制自己，理智與感情如何抉擇？「我係一個感情用事嘅人，呢樣嘢似我媽咪，不過我認為自己比媽咪理智啲，我屋企人全部都係好感情用事，我覺得自己係受到佢哋影響！」那算是留一條後路給自己嗎？「又唔算，喺唔同時候會有唔同嘅決定同選擇，我只可以話你知呢一刻我會選擇理智。」

但明明是愛，卻被理智抑壓情感，豈不甘心？「冇得唔甘心，好鍾意唔代表可以一齊，我唔知將來會點，我只可以話o依家我好享受工作嘅生活。」