嘻哈天使 歐陽靖

FACE週刊 第235期

面對面

嘻哈天使 歐陽靖

2011年11月23日
我與歐陽靖坐在尖沙咀鬧市商場中層的咖啡店做訪問,座位兩旁就是店鋪和行人道,男男女女老老少少,隔籬枱和路過的十之有九會對他指指點點,甚至還有自由行拍膊頭用普通話問:「你就是《潛行狙擊》裏的立青吧?」,他卻無視自己的超高回頭率和暴漲知名度,說到興起處手舞足蹈,甚至離開座位到行人道上,一會飾演一個對住奀星 hea爆的娛樂記者、一會裝成是拒人於千里之外的超級巨星、一會又站起來假裝老婆坐在身邊,搭住空氣老婆說:「她是我的天使。」

非常形象的角色扮演和身體語言,不斷提醒我, MC Jin果然是曾經在美國 rap贏黑人的嘻哈小子,也解釋了,他為甚麼會在電視台吃得開,演起臥底做小混混的立青似模似樣又搶眼。

MC Jin說最近很多人都恭喜他 2011年上晒位,在剛公布的「萬千星輝大獎」候選名單中,獲得「飛躍男藝員」、「我最喜愛的男角色」等四個提名,下個月又要舉行第一次賣票個人演唱會。

「黑人 hip hop音樂歌詞不外乎要錢、要威、要女人,我 15歲開始唱嘅、聽嘅同追求嘅都係呢啲……嗰日做完 gym,我坐喺大堂梳化,流住汗喺度諗,其實做人辛辛苦苦搏命追求嘅好多嘢,一啲都唔重要。真正重要嘅,一早已經喺身邊。」 29歲、今年 2月才結婚的 MC Jin說。

Not Really

美國邁阿密出世、 14歲接觸 hip hop文化, 19歲在美國成名, 25歲回流香港,首場個人演唱會將於下月 16日舉行, MC Jin說上週二( 15日)記招翌日報紙有驚喜:「出嘅位(版)比我想像中多喎……」邊說邊拼起餐桌上兩張方形餐紙:「呢個 size度啦,好新聞嚟講算多㗎啦!」

演唱會名為《 In My Dream,紅館見》,地點實情係九展,明玩嘢?「紅館係唔係我嘅夢? Not really……我 08年返香港,真正起過開紅館騷念頭係 2010年,見到農夫唱入紅館。唔係羨慕唔係妒忌,係見到同類原來都可以唱入紅館,佢哋都係捱出頭,第一次問經理人:『呀,到底喺紅館開演唱會係點嘅呢?』

「唱過細場、對過一百幾十個觀眾,做歌手一定會幻想,對住萬幾人唱唔知係點呢?香港歌手做活動,最興台下要有 fans舉牌,我試過好多 fans舉晒牌、亦試過同場個個有,得我一個冇,事實上,對我冇影響,都係咁唱。呢個就係有信仰嘅好處,拍到劇、有提名,或者係開演唱會,我都唔會過分擔心或者有壓力,更加唔會覺得自己上咗位、特別叻,我只會放心做自己想做嘅嘢,其他事,交畀主。」


上週二( 15日),為下月 16日舉行的個人演唱會《 In My Dream,紅館見》開記招, MC Jin說即使是自己做主角的活動,也不免因為新聞少而受氣。

09年開始為無綫主持《兄弟幫》,今年拍劇,更因《潛行狙擊》裏的角色立青大熱,台慶提名高達四個,連電影版和明年的節目巡禮都預他一份。

Its Interesting

有些事,不是交給主就能解決得了的,比如傳媒的關注。 MC Jin說,記招當天發生了一件「 interesting」的事:「記者朋友採訪我嘅活動,我好感激你嚟到,但有啲人態度可唔可以唔係咁呢?」說着,他走出行人路,叉開左腳隨意一站,假裝胸口有部相機,連鏡頭也不用看,右手食指放在快門處,用極藐和極老馮的語氣說:「呢邊呀!喂,呢邊呀……第一個反應有啲,跟住都係望佢鏡頭。咁多年喺香港娛樂圈見唔少啦,好多傳媒對我啲嘢唔係好有興趣,唔太想同我傾偈。」
我說,不被傳媒包圍是因為正派、少惹麻煩:「你試吓同 Cammi影張合照,包個個記者捉住你傾偈!」 MC Jin忙否認:「唔理我,我 ok喎! Why would i want it?」
講到 Cammi,他說又想起一件 interesting的事:「前排我同個朋友講起,點解香港仲有咁多地方揼邪骨?有啲人幫襯特別服務,仲係有妻有兒添。朋友話,有乜所謂,重點係嗰啲女仔都唔介意,呢個世界冇迫良為娼。我好感慨,點解有啲女仔會唔介意呢?講開 Edison同 Cammi嘅新聞,我覺得問題唔喺佢哋兩個度,係家嘅社會好有問題, 11、 2歲已經性觀念好開放,有啲細路女仲細細個已經援交,換錢、換名氣、換機會。學校教育仲有問題,性教育堂係有,但係佢唔話畀你聽點解會有性,乜唔係為咗愛咩?」


好多傳媒對我啲嘢唔係好有興趣,唔太想同我傾偈。

About Hip Hop


以非偶像歌手來說, MC Jin也算有電影市場,去年演出的《打擂台》更是電影金像獎最佳電影。《忽然 1周》圖片

與同聲同氣的陳奐仁一拍即合,去年合作推出專輯:「同佢做完音樂會,令我更加覺得想做一場自己嘅賣票演唱會。」《蘋果日報》圖片

My Angel

MC Jin說自己 19歲在美國成名,世界上就算不認識歐陽靖,很多人也都知道美國有個中國男孩 rap贏黑人。 Hip hop文化裏總唱到的女、錢、名和利,那時候要甚麼有甚麼:「所以我話我老婆真係好正。紅起上嚟個個跟住我吹捧我有咩咁出奇,我老婆偏偏就喺我事業走下坡時同我一齊,幫我改晒啲壞習慣。我成日覺得,佢係上帝派嚟畀我嘅天使。」
今年 2月 12日, MC Jin與拍拖 8年的圈外女友 Carol在波多黎各小島完婚,送給老婆的結婚戒指價值多少雖然不能透露,不過用了自己全副身家:「我從來冇儲錢冇身家,佢粒戒指就係我儲錢買,用咗我全副身家。」
一對不太富裕的夫妻該如何相處, MC Jin則是從父母身上學來:「爹哋媽咪開外賣餐館,開咗好多間。唔係連鎖分店喎,而係一間唔掂又換個鋪位開另外一間,有啲執咗有啲頂畀人。爹哋每日開 18個鐘頭工,屋企一樣唔夠使,我成日聽到佢同媽咪為錢嘈。不過講番轉頭,再難過佢哋都堅持到、再窮嘅日子佢哋都會有甜蜜耍花槍時候,堅持同埋夫妻兩個共同解決問題、一齊維持個家,就係我喺佢哋身上學到最重要嘅嘢。」


美國土生土長的 MC Jin,在美國權威 rapper比賽《 Freestyle Friday》擊敗六週黑人冠軍,雄霸冠軍寶座七週是 hip hop界的傳奇。

今年 2月,與拍拖 8年的女友 Carol結婚, MC Jin說下一步是在一兩年內做爸爸。

一日三支

在車來車往的馬路上拍照,一轉燈,我們就得站在一邊等車走光才能繼續。攝影師開玩笑說:「食支煙等吓啦!」 MC Jin一本正經回答:「我唔食煙、食大麻。」我 O嘴:「你講真?我寫㗎!」「係呀,一日食三支!」

最後澄清是玩笑話, MC Jin說香港人沒美國人有幽默感,我說,是娛樂圈認為這種笑話一點也不好笑,好多人等睇明星幾時出事、幾時被人撕掉面具。

話說回來,你猜真的有份抽的明星哪個夠膽講大麻笑話? MC Jin雖然說了,其實一張臉白裏透紅,一看就作息正常生活健康,還左一句交給主右一句感謝神,行得正企得正,怕甚麼?


MC Jin說 21歲那年,一朝得志,曾經壞過。

撰文:朱小博
攝影:范仲良
服裝: BSX


本文鏈接:嘻哈天使 歐陽靖