小生靚車之冠林峯160萬馬莎拉蒂至豪

2010.04.30 3

藝人台

娛樂頂點

小生靚車之冠　林峯 160萬馬莎拉蒂至豪

770期忽然1周 2010年04月30日

林峯今年行運一條龍，年初攞完《亞太區最受歡迎男歌星》後，早前再攞埋《 IFPI男歌手銷量大獎》， 7月又再踏紅館開個唱，人氣爆燈！
年賺過千萬的林峯，騎住兩部電影《敗犬多情》、《翡翠明珠》，再孭多部電視劇《不速之約》，日日密做，搵埋好多錢。於是喺 3月豪擲二千萬購入縉城峰，今個月又花 160萬換新款馬莎拉蒂，迅速攀上無綫小生擁有最豪靚車的第一位。

第 1位林峯︰ 160萬馬莎拉蒂
林峯揸的馬莎拉蒂，是今年才推出的改進版 Gran Turismo S，動力系統由 Gran Turismo 4.2升提升為 4.7升，成為目前馬莎拉蒂跑車系的旗艦車款，亦係該車有史以來最強悍的車型。

林峯老竇乃「廈門李嘉誠」，坐擁廿億身家，背景顯赫，但林峯不愛靠屋企，一部平治跑車揸足十一年，直至今個月，終於憑自己努力，一炮過俾百六萬換新款馬莎拉蒂。「佢想換車好耐 o架嘞！雖然老竇有錢，但佢唔鍾意做伸手牌，反而每個月都有俾家用阿媽，所以換車一直得個『諗』字，不過呢兩年搏命做，搵埋唔少，咪買架靚車自己開心吓！」知情人士說。
愛低調的林峯，所選的馬莎拉蒂亦是唔多起眼的黑色，新車於今個月 9日先落地，他也錫住來揸，據知他平日將架車揸返公司後，每次出外景都坐番 crew車，收工才揸返屋企。
上周三（ 21日）下午三點，記者於中環擺花街發現林峯揸住新車，到街邊的櫃員機㩒錢。當日他一身黑衣人打扮，十分低調，但架靚車實在太搶，引來不少途人目光。林峯見被人眼望望，等候櫃員機時不時擰轉背住愛驅，並嗱嗱聲㩒完錢跑上車鬆人。

林峯等㩒錢時，亦不忘擰轉頭實愛驅。