闊別公仔箱4年的張可頤，在劇集《老公萬歲》中首次以「男人婆」姿態出現。

雖然港姐出身的可頤看似柔弱，但她卻將「男人婆」角色高勵心演得入型入格，相信全因她在柔情似水的外表下，擁有一副堅強個性。

正如愛情路上，當年的她寧要麵包捨掉愛情，但今日卻希望兩者能兼得。

可頤跟戲中的角色甚為相似，既對演戲有自己風格，個性執着又倔強，名副其實是個可硬可軟的女人。撰文：霍淇

劇集《老公萬歲》內，飾演高勵心的張可頤，因發現老公程琛（苗僑偉飾）在結婚當日行為有異，故7年來均以「奪命追魂Call」管住老公。

問到現實中的可頤，若遇上相似情況會如何處理時，她想也不用想便說：「我會坐低好理智咁同佢傾偈，我會尋根究柢，唔會收收埋埋，唔會好似個角色咁可以隱藏7年都唔爆發！有啲咩屈喺個心度要開心見誠講！我個角色係因為自己收埋秘密好耐，唔肯攞出嚟講先搞出好大誤會，令到原本可以過得好甜蜜嘅兩公婆俾呢條刺破壞咗一啲好美好嘅時候。（試過未？）我唔話畀你聽！哈哈！」

刻意選擇男人婆角色

2006年，因患上甲狀腺炎及抑鬱症而被迫停工的可頤，休息4年後，一向演開溫柔又食腦角色的她，轉型以來自果欄的「男人婆」姿態作回歸頭炮。可頤指今次是特意選擇這個角色，除了是想給觀眾新鮮感及驚喜外，更重要的，就是把今次的演出，當作是給自己的熱身。

「休息4年我係有啲緊張，所以角色上面都特意選啲輕鬆啲嘅劇本，亦希望可以拍啲比較輕鬆啲嘅畀大家歡樂。」可頤充滿期待。

寧要麵包捨愛情

張可頤的「硬」，除了在身體上，愛情上亦然，皆因正當大部份女士要在愛情跟事業兩者其一時，可頤就謂自己亦曾作出同樣的抉擇，而她選擇的是放棄愛情。「後生啱啱出嚟做嘢嘅時候，好多嘢都想靠自己實力去做啲嘢畀人睇，所以當時將感情放埋咗一邊。」

承受壓力比別人多

問可頤至今有否為當年的決定後悔，她堅定的說：「又唔會，因為當時我嘅環境、遭遇或者係機會，都係推使自己揀事業，今日我唔可以話自己當時啱定唔啱，不過我當期時嘅遭遇一定要咁做，嗰時又後生，未諗到咁快要組織家庭，好多精神都放咗喺工作上面。就好似而家好多職業女性，或者係廿零三十歲啱啱出嚟工作嘅女仔咁，想證明自己嘅實力，可能到有事業有地位之後，佢哋先會諗要組織家庭。所以每個女人唔同年齡有唔同選擇，或者係唔同環境！」

當年選擇麵包不要愛情，不過今日的可頤卻希望兩者能兼得，不過她知道要做到這點，做到的、承受的以及壓力方面亦要比別人多。

不追求激烈愛情

最近，有報道指可頤與相戀年多的富豪男友曾安邦分手，她聽罷即「高8度」地反問記者為何會覺得他們兩人分開？然後才婉轉地說：「o依家所有嘅朋友都係處於好穩定嘅狀態，唔係好似要如膠似漆咁，每樣嘢都平衡得好好，朋友圈子甚至乎異性朋友約會，我都處理得好平衡！」見可頤兜了一個大圈，記者忍不住問她是否代表跟男友感情沒變，她笑着說：「平穩過渡，每樣嘢都OK！」

愛情跟麵包外，可頤更希望好好分配給家人及朋友的時間，因為她覺得擁有愛情、事業、家人和朋友這4個因素，才能算得上美滿的人生。