惠英紅激動封后
《第29屆香港電影金像獎》昨晚在尖沙咀文化中心舉行，多次提名影帝的任達華終於守得雲開，一嘗金像影帝滋味，第一屆影后惠英紅則再次登上影后寶座。至於最佳導演及最佳電影均落入《十月圍城》手中，掃走八個獎的《十》片，成為今屆大贏家。
惠英紅感激伯樂雪中送炭 惠英紅憑《心魔》奪得影后，是她事隔28年再次贏得最佳女主角殊榮，抱病的她得悉賽果後十分激動，她從頒獎嘉賓張家輝及劉青雲手中接過獎項時，激動得眼泛淚光，全場觀眾即拍掌以示支持，她致辭時說：「我頭先食咗藥，我好恨攞呢個獎，28年，攞完第一次，我風光咗十幾年，然後唔知點解冇人搵，好在有班好朋友，不離不棄，好似鍾慧冰、大姐明，多謝樂小姐，喺冇人要我時，叫我拍嘢，珍姐、添哥不斷畀戲我拍，佢話你根本係好演員，多謝志偉教我點做戲，多謝大會、評審、導演，對我好好，仲有《心魔》所有工作人員，好多都好似我咁，收好少，甚至冇收錢或者貼錢，好為電影。」大熱勝出的小紅亦承諾會繼續演好戲，不會令Fans失望，她說：「我試過自我放棄過四年，但我依家好有信心，我知我屬於電影、演戲，無論一日好、兩日好，我都會演好！」台下不少嘉賓均被她的舉止感動得眼濕濕，包括有份角逐影后的張靜初及頒獎嘉賓楊千嬅。
Profile
14歲已在夜總會表演的惠英紅，因獲導演張徹賞識而入行，於82年憑《長輩》獲得首屆香港電影金像獎影后，最近憑《心魔》狂掃獎，包括金馬獎及亞洲電影大獎女配角，以及香港電影評論學會大獎最佳女演員。
最佳女主角 惠英紅《心魔》
華哥破宿命稱帝
任達華自強不息夢想成真 多次獲影帝提名均失望而回的任達華，昨晚終於憑《歲月神偷》在金像獎中初嘗影帝滋味，力壓賽前大熱、《十月圍城》的王學圻，為港爭光。
當宣布華哥得獎時，全場掌聲雷動，鎮定的他上台前大方地與王學圻擁抱。從影34年的華哥在頒獎嘉賓舒淇及張震手中接過獎項，當時坐在台下的老婆琦琦已感動得眼濕濕，反觀華哥致辭時卻淡定得多：「多謝評審，多謝吳君如，係君如令我可以以親戚價拍呢部戲，多謝電影基金，多謝亞視，冇佢今晚冇得直播。一個菠蘿包可以發生一段感人故事，多謝羅啟銳畀我演呢個慈父角色，都多謝被人遺忘嘅《天水圍的夜與霧》，仲有由我出道到依家都好錫我嘅張同祖，多謝我嘅家人，我兩個女朋友，琦琦同我個女，多謝琦琦咁多年來對我嘅包容同支持。」
他又引用《歲》片金句：「考試唔合格唔緊要，正所謂『鞋字半邊難』，做人最緊要信，要自強不息，先可以夢想成真！」 Profile 現年55歲的任達華於70年代簽約TVB拍劇，85年在《新紥師兄續集》中飾演奸角韓彬而聲名大噪，87年投身大銀幕，曾參演電影《香港舞男》（90年）、《羔羊醫生》（92年）、《PTU》（03年），曾兩奪金紫荊影帝（04年及06年）。
最佳男主角 任達華《歲月神偷》
《十月圍城》掃8獎成大贏家
賽前獲18項提名的《十月圍城》最終掃走8獎，成為今屆大贏家，但未能打破歷屆紀錄。陳可辛以監製身份上台，代表《十月圍城》領取最佳電影獎，他說：「套戲係好多人嘅心血，呢套戲經歷咗好多嘢，甚至封廠，多謝好多演員肯放低身段參與呢部戲，呢個獎對我好重要，係我以純監製攞嘅第一個獎，當年有電影人問我想做咩，我話想做好導演，佢話好導演好多，香港冇好監製，我想講我係一個監製。」
至於《十》片導演陳德森領取最佳導演時，不忘多謝有份參與《十》片部分導演工作的劉偉強，他說：「劉偉強，個獎你拎多陣，你都有份！我想多謝好多人，舊年我登過鳴謝啟事，但依家都想再多謝一啲人，呢套戲係由一班人做出嚟，我要多謝投資者，陳可辛同已經唔喺人世嘅媽媽。」臨完場前，金像獎主席陳嘉上宣布：「頒獎禮完，但我哋會盡快籌辦一個活動，為內地地震災民做啲嘢！」
張經緯憑紀錄片《音樂人生》榮獲新進導演獎。
《歲月神偷》的羅啟銳上台領取最佳編劇。
陳可辛（左二）以監製身份上台，代表《十》片領取最佳電影獎。
男配角霆鋒多謝栢芝體諒
穿上紅噹噹裝束的謝霆鋒，憑《十月圍城》勇奪最佳男配角獎，並被選中成為全晚最佳衣着的男嘉賓，他進場時已自嘲似紅地氈，當他領獎時一度嗚咽，他感激陳可辛等幕後工作人員，並特別多謝太太張栢芝，他說：「好想多謝太太，尋晚拍完戲返屋企，係呢個月第一次，佢仲有兩個星期就要幫我生第二個BB，但我聽日又要飛，呢個月我只係陪咗佢一日，多謝冇嬲我！老婆！」這位好好先生亦順道多謝父母，頭側側、站立姿勢甚有四哥風範的霆鋒說：「仲要多謝Daddy媽咪，純粹因為好耐冇多謝佢哋，多謝大家。」
他在後台接受訪問時透露，頒獎禮後會立即回家與老婆慶祝，預計會將八萬元的玉墜送給栢芝：「老婆Send咗SMS畀我話：『吓？有首飾o架？好昂貴。』」他表示不會因為得獎而加片酬，並帶笑說：「加四個零啦！其實唔會，依家唔同以前，有好多演員，今日有謝霆鋒，聽日都會有，無論有冇獎，都會用心機去演。」
Profile
謝賢及狄波拉兒子謝霆鋒現年29歲，早於16歲入行時已一鳴驚人，99年憑《古惑仔之少年激鬥篇》勇奪金像獎最佳新演員，06年憑《新警察故事》奪得內地百花獎男配角獎，早前則憑《十月圍城》勇奪亞洲電影大獎最佳男配角。
葉璇奪女配角哭爆辛酸史
葉璇憑《意外》贏得最佳女配角獎，她未上台已忍不住落淚，並擁抱身邊的《意外》導演鄭保瑞，她領獎時憶述辛酸往事：「我有一個導演朋友曾經同我講：『葉璇，冇人會搵你做女主角！』令人好沮喪，但金像獎無論係主角、配角或者閒角，甚至要係一粒鈕、螺絲都好重要。」她除了多謝《意外》一班台前幕後人員及堅持起用她的監製杜琪峯外，還感激舊公司無綫的栽培，引來全場起哄拍掌，連負責頒獎的楊千嬅亦笑不停！
最後葉璇特別多謝影片的主角古天樂，她說：「我仲要多謝好朋友古天樂，佢精湛嘅演技令呢部戲多啲人關注，雖然佢冇嚟，But I see you。」
葉璇返後台時心情已平復，她表示未有計劃慶祝活動，但揚言得獎好「意外」：「最初拍戲，外間好多人懷疑我，最要多謝阿杜同古仔，可惜今日兩個都冇到，但永遠記得佢哋，攞獎對我嚟講係一個好大鼓勵，無論咩角色，有得演已經係幸福事。」
Profile
現年30歲的葉璇，於99年代表紐約參選華裔小姐奪冠及獲頒最具古典美態獎，參演多部電視劇後跳入影圈，在多部電影中飾演重要配角，於05年憑《情義我心知》提名香港電影金像獎最佳新人。
李治廷爆冷奪新人獎
今年新人獎競爭激烈，結果由《歲月神偷》的「哥哥」李治廷奪獎，他激動地說：「多謝羅啟銳同張婉婷，畀個不可思議嘅機會我，當初經理人叫我拍，話係好機會，我就戇居居咁拍，又戇居居咁嚟到台上。」片中飾演其弟弟的童星鍾紹圖，本來笑笑口與頒獎嘉賓曾志偉及錢嘉樂交談，但得知失落新人獎後即時扁嘴唔出聲，李治廷亦識做地拖實紹圖，並表示多謝，其後他說：「細佬冇事，好堅強，唔會喊。」他表示獎座會放在家中給父母觀賞，並多謝爸爸教他跨欄。
放大圖片
在揭曉結果前，志偉及嘉樂笑言未知無綫人陳法拉和朱璇亮相亞視節目時會否講廣東話，最後法拉以廣東話對答，並多謝無綫，鏡頭亦影着樂易玲開心拍掌，志偉即讚她醒目及指是創舉，至於朱璇亦笑言會試講廣東話，同時亦有多謝無綫。
另外，小紹圖行紅地氈時，被問到是否想打低李治廷？導演羅啟銳搶着說：「唔好話打低，同分啦！」令鍾紹圖一臉冇癮，再問到若得獎希望收到甚麼禮物？監製張婉婷搶答：「小提琴，上次都送小提…」鍾紹圖即搶答：「上次你係送結他！」張婉婷只好尷尬傻笑。
第29屆香港電影金像獎得獎名單
最佳電影 《十月圍城》
最佳導演 陳德森《十月圍城》
最佳編劇 羅啟銳《歲月神偷》
最佳男主角 任達華《歲月神偷》
最佳女主角 惠英紅《心魔》
最佳男配角 謝霆鋒 《十月圍城》
最佳女配角 葉 璇 《意外》
最佳新演員 李治廷 《歲月神偷》
最佳攝影 黃岳泰《十月圍城》
最佳剪接 鄺志良、陳志偉 《竊聽風雲》
最佳美術指導 麥國強《十月圍城》
最佳服裝造型設計 吳里璐《十月圍城》
最佳動作設計 董 瑋、李達超《十月圍城》
最佳音響效果 Steve Burgess、吳江《赤壁：決戰天下》
最佳視覺效果 吳炫輝、鄒志盛、譚啟昆 《風雲II》
最佳原創電影音樂 陳光榮、金培達《十月圍城》
最佳原創電影歌曲 《歲月輕狂》《歲月神偷》 唱：李治廷 曲：盧冠廷 詞：羅啟銳
新進導演 張經緯 《音樂人生》
最佳亞洲電影 《禮儀師の奏鳴曲》
終身成就獎 劉家良
專業精神獎 鄒 林（香港電影燈光協會主席）
黃子華片名棟篤騷
頒發最佳編劇的嘉賓黃子華以棟篤笑方式評論各片名，他指《竊聽風雲》夠出色：「偷聽係衰格，竊聽就合法！」又指《十月圍城》改得妙：「三月太濕濕立立，四月太想攞獎，五月太政治，六、七月就太敏感，十二月就聖誕節，唔通想保護聖誕老人？十月立秋夠穩陣！」博得全場掌聲。他除了笑指電影演員多到可以拍《72家租客》，又將《天水圍的夜與霧》比喻為樓名，笑指「夠晒法國味」！最後並說：「亞視對我好好，任我講，大家唔好淨係講無綫，即該多啲講吓亞視！」
謝安琪獻唱念狄娜
昨晚謝安琪身穿灰色晚裝，在頒獎禮上獻唱《星光伴我心》表揚已故多位電影工作者，並由司儀鄭丹瑞旁白及合唱最尾一段。期間台上銀幕播放已故影星的肖像及名字，當中包括尹志強、宮粉紅、陳鴻烈、石堅和狄娜，台下觀眾以熱烈掌聲致敬。
亞視旁述似評馬
亞視安排主持人在錄影廠坐定定評述頒獎禮，又請來堪輿學家鄺偉雄為候選者預測運程，網友批評多此一舉，網友poyeeshirley說：「睇咗一陣就忍嗰幾個主持唔住，講到好似講馬咁！」亦有網友批評亞視刪剪惠英紅的訪問片段。以往的金像獎經常被評唔足本，但今年亞視播放，廣告少之又少，更曾出現播足頒獎禮一小時「冇Cut過」。
法拉朱璇愈叫愈走
有份角逐最佳新演員的陳法拉及朱璇都是無綫藝人，兩人盛裝出席頒獎禮，當行紅地氈時，有線主持頻呼她們的名字，示意要求她們接受訪問，但兩人愈叫愈走，極速離開現場。另外，經常現身無綫的何韻詩及楊千嬅亦以普通話接受有線訪問。
陳法拉 Valentino晚裝逾$20萬 「雖然着得穩陣安全，但係太成熟，可以後生啲，條裙睇落太保守。」
志偉亮相冇有怕
曾志偉現身紅地氈時接受有線訪問，由於無綫昨晚播出《超級遊戲獎門人大爆發》，與亞視的金像獎直播打對台，他笑言因為觀眾喜歡他，又表示早在二十年前已向無綫備案，要亮相亞視，因他有演藝人協會會長、金像獎副會長及演員多重身份。對於有線記者暗寸他是否需要回將軍澳，他說：「駐守呢度（金像獎）！」
樂易玲大方踩場
亞視取得金像獎頒獎禮直播權，無綫高層樂易玲與導演楊凡結伴到達開騷前的紅地氈儀式時，記者即問樂易玲會否介意亮相亞視？她即尷尬笑而不語，迴避問題。另外，現場紅地氈部分由有線負責直播，無綫派出四位娛樂新聞主播到場採訪，卻遭場內工作人員阻止擺咪，一班無綫娛樂主播惟有「打游擊」捉藝人採訪，非常狼狽。
