拍劇入屋為贏口碑 惠英紅讚向佐唔Cool好可愛

採訪：植毅儀　攝影：彭子文　場地：Stone Grill@海港城(電話：2721 9999)

一個是電影公司中國星老闆向華強的兒子向佐，一個是第一屆金像獎影后惠英紅，看似風馬牛不相及的二人，因為一套功夫劇《鐵馬尋橋》而相遇。正當大家看著向佐晚晚在公仔箱出現，把囂張跋扈、愛惹事生非的二世祖演繹得入型入格，令人咬牙切齒時，冷不防，身邊這個「哎呀阿媽」小紅姐卻大爆呢個阿仔在片場時好可愛。

向佐好Cool，這在訪問的頭20分鐘，記者已經見到了。在助手及經理人的陪同下，保持與記者一問一答的訪問方式，連向佐自己都話自己是慢熱的人，直到小紅姐到來。只見向佐見到呢個劇中的阿媽未入餐廳門口，已舉手打招呼：「阿媽！」剛才的Cool一掃而空。

「佢細細個時，我見過佢一次，以前我都有拍向生的電影。我第一次在片場見到佢，那天是呢套劇開鏡拜神，我見佢一個人站在最後，記者朋友又好似唔敢問佢嘢，咁我咪行埋去佢度，叫佢企我身邊囉，仲不斷同記者朋友話呢個是我個仔。」小紅姐坐下即說。

為追女仔而減肥

向佐唔笑的時候，個樣好惡，容易惹人誤會。「其實見過我、同我傾過計的人，就會知我份人一點都不寸。」此時在身邊的小紅姐答道：「佢份人何止唔寸呀，仲好小朋友。我開工頭幾日，見佢唔點出聱，睇佢樣又以為好惡，但又見佢日日都拿著一隻很大的旅行袋，咪忍不住問佢『其實你個袋放咗咩？」佢一打開，原來成袋朱古力。初時拍劇緊張，佢會把細細的朱古力放在手中，每次導演叫cut，佢就成個人放鬆，仲問我食唔食朱古力。我話『阿仔，你拿到朱古力溶了，仲畀我食！』佢份人就係咁，同你熟咗好玩得o架。」聽到小紅姐一番話，向佐笑道：「我戒食飯，但又要keep住身形同有體力去做運動，所以食朱古力。」向佐現在的身形好fit，好難想像他曾是體重達240磅的肥仔。「那時我在外國讀書，成240磅，自己鍾意了一個女生，向她表白，她嫌我肥。我咪的起心肝減肥，每日跑步四十五分鐘，戒澱粉質，2個月減40磅，半年減了70磅。後來清減了，有女仔主動埋身，但我又不喜歡她們了，肥時你唔吼我，現在又主動埋來，太睇外表，我唔鍾意。」

愛拍動作片不怕苦

不論在電影圈定電視圈，現在已好少新人願意拍打戲，點解？因為辛苦囉！但向佐呢個少爺仔，卻鍾情拍動作片，4、5歲就開始習武，每天都花三小時練武裝備自己，又在北京武術學院進修過。柔道、武術、散打乜都識。「以前拍《投名狀》，做土匪被人從樓梯拖下樓，自己親身上陣，樓梯又沒鋪墊，下臉都撞傷了，又如何？做得演員預咗 。」

向佐的一身好武功，連以往拍開武打片的惠英紅都大讚，更大爆劇中對手鄭嘉穎，一聽到要同向佐打就怕怕。「向佐第一次拍電視，初時不懂遷就力度，而且佢同嘉穎對打場面又多。有時嘉穎知道要埋身，會叫佢在沙包上試力度，見到沙包都踢穿，嘉穎都話個心有少許窒。」

■向佐同惠英紅一見如故，下套新劇又有合作機會。

拍劇三個月如家人 向佐珍惜首個有名的角色

原名向展平的向佐，加入演藝圈5年，以前拍的電影，多數是連名也沒有的路人甲乙。今次處男劇在《鐵馬尋橋》中飾演橫行霸道的大少爺榮萬鈞，姑且不論演技如何，但對向佐來說已是很大的突破。「2年前一個飯局，方姐（方逸華）問我想唔想拍電視劇，我話都想試下拍劇。事隔2年，某日陳志雲打電話畀我，話添哥新劇有個角色適合我做，叫我入TVB開會。我第一次個角色是有名，而且亦是第一次開拍前已經有劇本在手，比我好好咁去研究人物背景，那感覺好實在。好多人以為我是向華強個仔，會搵我工作。但我都聽過有導演兜口兜面同我講：『我點敢用你？點請得起你？你話我畀咩價你好？』大家一齊去試鏡，明明外形同個角色match，但最後都寧願揀第二個，唔揀我。所以每次有job我好珍惜，好多謝畀機會我的導演。」

提到今次拍劇，向佐變得滔滔不絕。「拍劇一拍三個月，好似一家人咁，日日一齊食飯，大家唔會你睇我唔起，我睇你唔起。拍電影就唔同，時間短，一埋位就拍，有時演員甲明明同演員乙有心病，戲中扮到好friend，不用埋位時卻零交流。阿爸講到明，唔會搵我拍中國星的戲，除非在外邊有口碑，證明自己在呢行有價值。今次拍完第一個劇已經有導演找我拍下一個劇，我只好一步一步自己做好些，口碑靠一個傳一個，做出成績。」

■好難想像向佐曾是體重達240磅的肥仔。

老豆訓話：做人一定要有禮貌

既然向佐主動講到家人，記者不禁要將心中的疑問一一提出。先是平時好似好嚴肅的向華強和太太陳嵐在家是否都如此嚴肅呢？「老豆細細個教我們兩兄弟一定要有禮貌，識分尊卑，勤奮上進。老豆好重視家庭，每個星期日一定是家庭日，車我同細佬去九龍仔公園游水。阿爺以前住九龍城，佢就帶我們去九龍城的大排檔食嘢，平時不用應酬，佢會放工立即返屋企，同我們傾偈，講人生道理，講佢以前拍電影的事給我們聽。佢成日都話做呢行，有些人就是因為做人態度差，少少紅就不可一世，由紅變到沒工作，那些人我都識，所以我出來工作都記住佢講的話，以禮待人。同埋阿爸最憎我們兩兄弟打交，見我們爭嘢會用木棍打，佢話無論如何，做兄弟一定要齊心。我好驕傲有個咁匯老豆，管得自己好嚴。我13、14歲好喜歡打籃球，曾經問過老豆如果我入到NBA，佢會唔會畀我打?老豆話『你喜歡做咩都得。』老豆真是好多優點，我有排學。」

講完阿爸，輪到阿媽。向佐反問記者：「咩你覺得我阿媽好惡咩？」、「我都是看傳媒對向太的報道，未正式接觸過，只是一次偶然機會擦身而過，但已經覺得佢好有霸氣。」記者小心翼翼回答。「這些就是你們的錯覺，可能有時對著外人要強些，但我阿媽其實好溫柔的。佢睇人最叻，我個個女朋友都會帶畀佢睇，佢會話我知邊個好、邊個唔好，一定沒錯。我細細個已經拍拖，老媽話最緊要戴套(避孕套)，做個負責任的男人，同埋唔理我女朋友是中國人定外國人，一定唔可以是男人。」

向太其實好溫柔

提到現任女友Race，向佐甜笑道：「Race好好，份人既孝順又沒架子，對我又好，好愛我。」但坊間傳聞佢主動追你喎？「這就是大家對佢的誤會，實情是安志杰介紹我倆識，跟住我追佢，安志杰追婷婷。佢份人係點我最清楚，唔需要同大家講。一開始拍拖，阿媽是有反對，話Race有些事未搞清楚就唔應該同我一齊。現在OK了，阿媽好錫佢，我眾多女朋友中，她是第一個阿媽會主動搵佢行街、傾電話的女仔。」

■女友Race(後)已被向華強夫婦(前)接受，相信最開心的是向佐。