無綫為咗o氹謝天華忠心效力，連月來不斷發聲氣，猛話Laughing好大機會憑《潛行狙擊》奪視帝，繪聲繪影，講到真嘅一樣，搞到謝天華由半信半疑，變到鬆毛鬆翼，響頒獎禮前夕信心爆棚咁拖住老婆遊街「晒命」，仲搏晒老命咁拍無綫電影《LAUGHING GOR之潛罪犯》。唔係得個講字，真係有圖為證o架，本報記者往探班，直擊Laughing gor連場打鬥都親身上陣，仲畀對手杜汶澤打到飛埋牆，跌落地，拳拳到肉，最後頂唔住皮肉之苦，拿拿聲去休息室墊Pat，露出三角底褲，嚇親闖進嘅Janice Man（文詠珊），同場加演呢幕蝦碌戲，認真得來又添上幾分笑料喎！
「Laughing Sir」謝天華於無綫《萬千星輝頒獎典禮》大熱倒灶食白果，僅僅輸咗個馬鼻畀「Law霸」鄭嘉穎，希望愈大，失望愈大。鏡頭前所見，謝天華於落敗一刻，笑容繃緊，難掩失望神情，明顯焗住演埋場「好戲」。
失望梗有啦，事實上謝天華真係好落力效忠無綫，日前他跟Janice Man及杜汶澤在青衣一所空置學校取景拍無綫電影《LAUGHING GOR之潛罪犯》，為配合劇情，謝天華要殺入火場勇救Janice Man，在逃亡期間被死敵杜汶澤糾纏，兩人打到一仆一碌，謝天華慘遭毆打，畀杜汶澤拳打腳踢，打到碌地，並抽住件外套Fing埋牆角、再頭撼電箱，然後跌落地，唔單止謝天華痛到面容扭曲，連Janice Man都真情流露，掩面驚叫。
與JM被火燒搏到盡
堅打一輪，謝天華終於頂唔住，跑入休息室睇Play back，乘機唞唞氣，補補妝，印印汗，再墊Pat繼續捱打！此際Janice Man唔知謝天華除褲墊Pat，竟盲舂舂闖入，而且眼神第一時間游向天華的三角底褲，露底嘅天華唔怕蝕底，仲對住Janice Man笑騎騎，女兒家Janice Man就怕怕醜醜衝出房外迴避。
埋身肉搏一輪，謝天華同Janice Man一齊披住毛氈撲向火海，雖然爆破場面唔算太大，但都夠博，始終做演員的，須靠面口搵食，多少都擔心會受傷毁容。
