佘詩曼跟「香港體檢」已經第三年合作，而且年年加薪，明顯合作愉快。噚日阿佘去到佐敦為香港體檢新商標同品牌形象做揭幕嘉賓，佢話：「最好係可以免費驗身，藝人工作日夜顛倒，我哋身體一般比其他人多問題，所以要一年一次驗身。阿佘做代言人，連屋企人同朋友都可以受惠，唔知阿佘有冇推薦畀緋聞男友鄭嘉穎同陳豪一齊做身體檢查？佢笑笑口話：「我諗佢哋年紀大過我，自己識得照顧自己，唔使我照顧！」

阿佘貴為最搵錢嘅當家花旦，工作一浪接一浪，當然要注意身體健康。

阿佘（左）當日拍《火舞黃沙》時就曾經親身企過喺懸崖邊演出，睇落都幾危險。
資料圖片

阿佘話體檢只預咗自己同屋企，兩位緋聞男友鄭嘉穎同陳豪就要自己顧自己。
資料圖片

未諗生育問題

阿佘做代言人可以免費全身檢查，唔知會唔會順便做埋婦檢，檢查吓自己生育能力呢？佢話：「我唔知喎！呢樣有得 check咩？不過，呢方面我唔係太重視，亦唔係呢個年紀諗！」
阿佘仲坦白承認自己年紀越大越細膽，佢話：「以前唔會咁錫身，動作戲就算幾危險乜都自己做，好似阿戚（戚其義）叫我企喺懸崖度，啲沙都就嚟冧，只要拍出嚟效果好我都會做。但家感覺唔同以前，知自己時間越來越少。」