新片8男角排第尾 林峯一哥慘變奀星

FACE週刊 第241期

亞太區

新片8男角排第尾 林峯一哥慘變奀星

2012年01月04日

「楊家將」故事拍極都有,早輪先有成龍監製、張栢芝、周海媚、劉曉慶等主演嘅《楊門女將》,可惜十二女豪傑票房仆直。

女將唔掂,今年仲有一套《忠烈楊家將》等緊上,七個猛男包括吳尊、伊健、林峯擺明打餐死,不過仔多好難分得勻,其中亞太區男歌手林峯更加被貶為大配角,莫講戲分及唔上吳尊,甚至連內地二線演員都不如。人離鄉賤,林峯要反攻大陸,睇怕條路仲有排行。


我拍完好耐啦!真實對白
除夕夜(31日),問到林峯於《忠》片中變大配角兼導演加戲分時,林峯顯得十分不耐煩,只說:「我唔答你哋呢啲問題!」

於《忠》片中飾演楊五郎的「無綫之寶」林峯,原本以為抽到好籤做楊五郎,可以於片中孭重飛做主角,點知戲分除不及做六郎吳尊及大郎鄭伊健外,仲係八大男主角當中,戲分最少的一個,chok峯由一哥慘變大配角。


着住盔甲的林峯,拍埋三郎周渝民(右)和四郎李晨(左)身邊算唔輸蝕,但據知林峯飾演的楊五郎,連感情線都冇,女都冇條點搶鏡?


借合照避
之後林峯為迴避問題,見薛凱琪上台準備影相,林峯則借合照急閃。

靠《忠》食糊

其實一向恨打入內地市場的林峯,一心靠楊五郎一角掘到內地金礦,可惜事與願違,知情者透露:「阿峯開頭以為楊五郎好有發揮,會有好多戲分,點知原來吳尊先重戲,連做最細七郎嘅付辛博(內地演員)都多戲過佢,阿峯梗係好冇癮啦。不過冇法啦,佢喺內地嘅叫座力太低,前排佢試過向導演扭計,話想導演加多啲戲分畀佢,又話香港到無綫宣傳時,TVB咁睇佢實會出盡力宣傳,不過導演好似冇乜反應。」


企埋一邊
去年8月《忠》片於北京開記招時,除了四郎李晨沒有出席外,楊家六子加老豆全都到齊,而林峯則只企埋一邊陪笑,有點格格不入。


主角慶生
去年1月拍攝期間撞啱六郎吳尊生日,全套劇上下員工幫佢慶祝,林峯(箭嘴)則企埋一邊拍手助興!

迴避唔答

本刊於上週六(31日)的倒數活動中就此事問及林峯,他最初竟透過公關婉拒話冇拍過《忠烈楊家將》,直至本刊記者親問林峯時,林峯先話:「《忠烈楊家將》,黄百鳴嗰套嘛,有!我拍晒好耐啦(幾時上映呀?)唔知喎,等電影公司安排啦,(你個角色係點㗎?)轉頭先答!」事後當本刊再追問林峯時,佢先話:「我唔答你呢啲問題!」
而本刊於週一(2日)再問有份投資《忠》片的天馬電影公司公關Polly:「呢套戲係關於一個家庭嘅故事,除咗一眾男角,亦有女角,如徐帆、安以軒等,七個男角的戲分好平均,係講佢哋七個仔一齊去救父親鄭少秋(林峯角色係點㗎?)我唔講得住,我哋呢套戲係大製作,唔會淨係將焦點放晒一個人身上。」林峯要靠楊五郎突圍,真係有難度喎!


由林峯擔正、無綫跟中央台合作的《歲月風雲》,07年於香港播出時平均有32點算唔錯,不過在央視播出時,反應卻麻麻,收視不入當年五大。


《忠》片集合中港台巨星,其中香港代表係鄭少秋同林峯,去年8月於北京開記招時,鄭少秋更捉實林峯上台,算睇住後輩啦!《蘋果日報》圖片

舊版《楊家將》卡士超強

《忠》片卡士勁,原來85年無綫套《楊家將》卡士更加係神級,除咗有周潤發客串做呂洞賓、張曼玉做九天玄女外,其餘仲有梁朝偉、劉德華、黃日華做楊家各子,陣容強大,家陣好難搵囉。


飾演楊六郎嘅劉德華係當年主角,配埋劉嘉玲做老婆。


而飾演七郎嘅梁朝偉就搭曾華倩,郎才女貌呀!


85年無綫套《楊家將》,都係用六郎劉華同七郎梁朝偉做膽,五郎黃日華一樣要企後排。

電影唔收得

喺香港有無綫全台撐到出晒面嘅林峯,除咗有「亞太區」男歌手榮譽外,仲不斷嘗試進軍電影界,10年連接三部戲,實行歌影視三棲瓣瓣有,可惜電影暫時冇乜邊套票房理想。

《白蛇外傳》


算勁

由程小東執導,戲中同黄聖依有感情線,不過觀眾「十卜」嘅係有份拍兼好打得嘅李連杰only,香港雖然得350萬票房,但勝在李連杰個朵喺內地夠響,連電影海報都係用李連杰做主打,喺內地大收2.2億票房。

《抱抱俏佳人》


失威

搭楊千嬅及周秀娜外,仲有一眾無綫花旦客串,不過觀眾都係唔多buy,淨得188萬票房。

《翡翠明珠》


唔掂

林峯正式進軍電影第一擊,電影拍檔有蔡卓妍及容祖兒,更因呢套電影邂逅禍水潘霜霜,只得315萬票房。

’01《別戀》


仆直

林峯剛入行時第一套電影作品,亦因拍戲同拍檔李彩華傳緋聞,可惜慘得八十多萬票房。


本文鏈接:新片8男角排第尾 林峯一哥慘變奀星