李思捷童年絕技派用場
自小愛扮嘢的李思捷,最近在無綫節目《荃加福祿壽》中盡情發揮,不過,他對一代「奇女子」狄娜相當尊敬,所以《荃》中將不會扮狄娜,看來思捷對前輩的敬意有另一番表達。
曾航生(右起)、李思捷和唐韋琪大讚時下的小朋友夠膽識。
日前思捷出席無綫兒童節目宣傳,活動中擔任評判,為一班小朋友扮歌星唱歌而評分。思捷自稱自小學時期已開始扮譚詠麟、張國榮、陳百強等歌手唱歌。他說:「我當然做好晒啲功課先玩啦,當年又冇卡拉OK,只係播帶聽歌,一邊聽一邊扮唱,已經好開心,童年就係咁過,估唔到依家可大派用場。」同場還有曾航生和唐韋琪,二人對小朋友扮偶像均大讚不已,指他們年紀小小膽識過人,還笑稱相對自己小時很呆,不及現今的小朋友精靈。
陳倩揚請家人遊日本
港姐出身的陳倩揚,早前難得放假,自掏腰包請家人去日本旅行,順便享受天倫之樂。倩揚表示在日本箱根喪食喪玩兼狂買手信,她說:「我用咗五位數字請佢哋玩,咁我依家做嘢搵錢,都要氹佢哋開心,嚟緊計劃去北海道同沖繩,因為爹哋媽咪好鍾意日本。」
陳倩揚不介意以素顏旅行。
陳倩揚在日本盡情吃喝玩樂,認真開心。
倩揚表示於當地浸了幾日溫泉,令她容光煥發,她笑稱:「起碼浸咗六次,皮膚靚咗好多,叉晒電,真係浸到唔捨得走。(買好多嘢?)係呀,我同媽咪去咗一個特賣場喪買,行咗幾個鐘頭都唔捨得走,因為啲嘢好平,買咗好多特色美食同埋衫褲鞋襪。」倩揚又稱旅行期間樂以素顏示人,她解釋:「又唔係返工,所以唔化妝,唔想為影相而化妝。」
美味天使虎年發威多得錢國偉
以「柑桔」陳蕊蕊為首的樂隊組合「美味天使」(Angel),誓要虎年發威,因為「柑桔」生肖屬虎,所以特別口響。而她們正在籌備出碟,更不忘多謝監製錢國偉,幫她們穿針引線。
Angel最近忙於籌備新碟,積極練歌及排舞。
樂隊Angel雖未成形,但隊長「柑桔」陳蕊蕊連日來都與隊員「香蕉」王淑玲、「藍莓」劉俐和「蜜瓜」關婉珊齊齊練歌和排舞,她們積極裝備,無非是想當《Angel》一出,予人一種專業感覺,絕非玩玩吓,柑桔說:「唔好以為我哋仲係跳緊《美女廚房》間場嗰啲歌舞,好認真o架,我哋依家隔一、兩日就練歌、排舞,都幾辛苦o架!」
錢國偉
新歌有快有慢
目前《Angel》正在揀歌階段,「柑桔」稱希望第一張碟可以有兩至三首歌,有快有慢,配合巿場需要,(邊間公司做老闆?)傾緊,未可以公布住,幫我哋做音樂嘅都係行內嘅音樂人,講真,我哋係『美味天使』出身,演出期間的確識唔少人,都要多得監製Wilson(錢國偉),今次我哋出碟,佢好支持,出唔少力幫我哋穿針引線。」
否認出席飯局
近期錢國偉捲入涉貪風波,不少人都跟他劃清界線,但蕊蕊很關心對方。問有否致電錢?她說:「冇,不過有SMS佢,佢都有覆我話OK,見佢話冇事我都安樂啲。(有指藍莓『落閘』話同錢國偉唔熟?)我估佢唔係咁嘅意思,佢有時要拍劇,少啲同我哋一齊食飯。」因有指錢國偉帶同一眾天使出席有酬勞的飯局,蕊蕊否認有其事,並說:「有人搵我做嘢嘅話,Wilson都會叫對方直接搵我,經佢嘅都係TVB工作。(出飯局有錢收?)冇,我地食飯都係同啲識嘅人,冇收過呢啲酬勞。」
陳蕊蕊(右)大騷琴技,劉俐細心欣賞。
王淑玲(左)獻歌喉,關婉珊為她伴奏。
文:影視組 攝:司徒國榮 場地:嘉里白鷺湖互動中心