林保怡拍劇撞頭失憶 沈卓盈生日樂演歌女

林保怡拍劇撞頭失憶

資料圖片

資料圖片

林保怡大前晚為無綫新劇《讀心神探》拍攝一場向後仆嘅戲份,點知受傷撞親個頭,由於當時保怡突然冇咗一小時記憶,於是工作人員即時送佢去醫院做腦部掃描。噚日馮仁昭打電話畀保怡,佢話:「照過晒,冇事啦。我都已經開番工,部劇嘅戲份都喺我身上,唔冧得。」至於當晚嗰場戲,保怡話搵咗替身拍。

沈卓盈生日樂演歌女

沈卓盈噚日 26歲生日,唔使開工,可以同男友過二人世界,早幾日 fans已經幫佢開神秘生日會,仲送上親手製嘅蛋糕音樂盒同埋佢至愛嘅雜果蛋糕。講到生日願望,沈卓盈噚日喺電話度話:「我想健健康康同埋多啲工作。」佢月中就要同謝天華、徐子珊拍無綫新劇《鴻武三十二》,扮演一名歌女,佢話:「我好鍾意呢個角色,又可以同一班好戲前輩合作,我一定會學到好多嘢。」