林峯咀千嬅唔怕丁生

林峯早排同楊千嬅拍戲，當中有唔少親熱鏡頭，因為林峯識得千嬅老公丁子高，所以問到同千嬅拍咀戲會唔會尷尬？林峯話：「咁又唔會，但好彩佢老公唔在場！」佢自爆每次拍接吻戲都係被動：「現實生活中都好想主動，但又唔可以亂主動，要睇定啲，因為有啲人諗嘢好複雜！（有唔好嘅經歷？）呢啲唔好講喇！」

楊思琦行善冇托手(月爭)

楊思琦慳家係人都知，不過慳還慳，講到做善事，思琦絕冇托手(月爭)！早排八太就喺中環見到思琦同黎芷珊，仲有幾個朋友一齊行街添。思琦同芷珊本來企定定等過馬路，話晒思琦係花旦，當然引人注目。等咗唔夠一分鐘，就有一位賣慈善獎券嘅女仔行去思琦同芷珊身邊，問佢哋買唔買獎券做善事，兩個問清楚善款會捐去邊個機構後，就拿拿聲攞個銀包出嚟畀錢買獎券，認真爽手。

楊思琦（右二起）與黎芷珊問明慈善機構後，即拿錢買獎券。