林峯　廖碧兒　陳山聰　祝人人豐衣足食

今日大年初三，亦是「赤口」，傳統習俗會避免四出拜年，怕有爭吵不如意。不過後生一輩一於少理，無綫四位小生、花旦，林峯、廖碧兒（Bernice）、苟芸慧（苟姑娘）及陳山聰齊齊相約食飯，一同品嘗米芝蓮星級美食，四個大細路亦順道跟《成報》讀者拜年，阿峯祝大家「虎年發財！龍精虎猛！」Bernice祝大家「身體健康！虎虎生威！」山聰祝大家「財源滾滾來！龍馬精神！」而苟姑娘祝大家「身體健康！笑口常開！」最重要當然如四位小生、花旦一樣大快朵頤，人人豐衣足食！

＜採訪＞慧芳 ＜攝影＞吳國明
＜場地提供＞海逸軒（灣仔）
＜服裝提供＞中藝（天工閣）

向來對美食十分講究的阿峯，每當他品嘗到佳品，一定會推介給朋友，面對滿桌美食，阿峯當然大快朵頤，至於同為華姐出身的兩位美女Bernice跟苟姑娘，為保健美身形，每樣食物她們均淺嘗即止，食得最多只是滋潤的糖水，女孩子貪靚護膚實屬正常。阿峯跟山聰兩位男士盡情地吃，令兩女非常羨慕。然而阿峯跟山聰卻說：「唔好羨慕我哋，其實我哋都怕肥，只係平時我哋有做運動，知道食到咩程度足夠，我哋都有付出努力。」忽然間，四人圍在一起大談健美心德。

鬼妹仔性格的Bernice，拿着豬頭到阿峯身邊笑說：「係啦！祝佢發到豬頭咁！哈哈！」去年阿峯大豐收，舉行首個個人演唱會，更拍了多個廣告，更被指是無綫的男金蛋，成為男藝人賺錢第一位，果真發到豬頭！阿峯當然樂意「萬歲」，請大家食這一餐「星級食譜」。

他鄉遇故知

談到何以四人如此老友，阿峯說：「我跟Bernice因為同倉（同經理人），大家好似一家人，常有合作機會。山聰跟我認識好耐，雖然我哋喺戲劇上少合作，不過私下我哋係好兄弟，山聰亦似一個大哥哥。苟姑娘係新相識嘅朋友，之前合作拍《談情說案》，覺得呢個女仔好勤力去學廣東話，其實苟姑娘跟山聰最熟，之前佢哋去新加坡拍婚紗照成為好友。」原來拍了一輯婚紗廣告，怪不得苟姑娘以「老公」稱呼山聰，而山聰則視苟姑娘是妹妹。至於Bernice可算是苟姑娘的師姐，同是華姐冠軍，加上又在加拿大回港，共同話題特別多，苟姑娘笑道：「我視Bernice及鍾嘉欣為學習對象，因為睇到佢哋兩個嘅成績都好好。」

新年新嘗試

去年Bernice有機會踏入大銀幕拍電影，除在港拍了兩三齣電影外，更有機會赴美拍攝荷里活電影，Bernice表示：「真係好開心，因為可以跟唔同嘅演員合作，雖然我拍嘅係打戲，好辛苦，但我覺得值得，因為喺外國拍戲可以學到佢哋嘅文化，舊年係少咗時間喺香港，希望今年會多番機會喺香港，我知道今年都有幾套電影傾緊，好開心，最開心係我做咗阿姨，姊姊在聖誕節前生咗BB，所以今年我會封大利是畀姨甥女，我一有時間就會去探佢。」

山聰憑《學警狙擊》的「左輪」一角而廣為人悉，及後拍了多套電視劇，其中有份主演的《女皇辦公室》將於本月22 日推出，在戲中山聰出動全部私伙拍攝，眾所周知山聰係時尚潮人，連阿峯也要問他的意見，山聰表示：「最開心係可以跟汪阿姐（汪明荃）合作，阿姐教咗我哋好多東西，喺佢身上學到好多嘢。而且我都要好多謝公司畀咗好多機會我，新一年希望可以嘗試更多唔同嘅角色。」

林峯&苟芸慧＜Make-up＞Raymond Yip
＜Hair＞DY@Hair Culture

廖碧兒＜Make-up＞Pauline
＜Hair＞Warden@II Couple

陳山聰＜Make-up＞Raymond Yip
＜Hair＞Geroge@Hair

「星級菜譜」

鴻運柚子千層乳豬件

蜜餞鴨胸伴鵝肝千絲蝦

生拆蟹皇燴生翅

二弄原條大東星

天白花菰扒津菜芯

鮮沙薑陳皮生煎雞

法國鵝肝醬和牛炒飯

蓮子雪梨紅棗茶

燕窩迷你蛋撻伴千層馬拉卷

園林鮮果拼盆

每席HK$5,280