郭可盈最近為丈夫林文龍誕下女兒「津津」（乳名），文龍表示湊女一點也不辛苦，無論換尿片還是餵奶也難不到他！

因擔心囡囡冷病，文龍與可盈不敢親自為她沖涼。

正陪可盈坐月的林文龍，昨日在電話中難掩喜悅之情，自言心情極度興奮，但仍在考慮囡囡的名字，問到湊女有否手忙腳亂，他說：「我哋都Pick Up得好好，餵奶、換片都冇問題，亦唔覺得辛苦，但沖涼就交畀陪月，因為我哋驚唔熟手，會凍親BB，只係喺旁邊協助。（幾時追個仔？）等可盈身體復原先，由天安排啦！我仔女都冇所謂，可盈就可能鍾意仔，湊成個『好』字！」問到可盈坐月期間有否嫌悶而扭計出街，他說：「咁又冇，佢都要休養吓。」

樂享三人世界今年大年初一適逢情人節，問文龍如何答謝太太，他說：「其實好少喺節日特別慶祝，我哋都覺得為節日慶祝冇意思，今年係三個人嘅情人節，多咗個小情人，可能會親自下廚煮牛扒畀老婆食！」他表示女兒太年幼，農曆新年會待在家中等親友上門拜年。

文龍與可盈錫到囡囡燶，並計劃為她添個弟妹。