爆炸堂：梁靖琪唔怕緋聞照攬吳卓羲

梁靖琪（Toby）出道以來成日同異性傳緋聞，當中包括吳卓羲（Ron）、黃宗澤，就連苗僑偉（三哥）都有傳過緋聞，但性格「鬼妹仔」嘅Toby一於少理，除咗繼續同一班「緋聞男友」搭晒膊玩埋之餘，仲鬼咁唔避忌開口埋口都提住啲「緋聞男友」，唔通Toby真係唔驚會緋聞纏身？

之前Toby出席無綫新劇《團圓》試造型活動，佢竟然同小小So講，話佢好想同同劇演員Ron演情侶，可惜今次Ron同徐子珊飾演一對，而佢就同羅仲謙、梁烈唯大玩三角戀，Toby話：「見到劇本以為同Ron做一對，點知今次係羅仲謙同唯唯，未試過同佢哋演過情侶，可能都會擦出火花呢！」小小So聽完之後忍唔住話：「你唔驚同Ron再傳緋聞咩？」Toby即刻擰頭話唔怕，之後Toby同Ron就嘻嘻哈哈一齊離開，Toby果然勇者無懼，認真令小小So佩服！