向來甚少是非的無綫花旦楊思琦，上位方法與一般藝人截然不同，以「慳妹」見稱的她，不似傳聞般靠送手袋拉關係，又並非陳志雲的愛將，只是曾被對方公開盛讚是乖乖女，但最近竟牽涉入「威遠」行動，被廉署邀請助查！有傳無綫藝人接封嘴令，思琦甫聽到此話題，即時築起城牆：「喺呢個敏感嘅時候，我都係唔敢多講！講嘢要負好大責任，要三思而後行，好多嘢都唔適合講！」她多次強調「唔講」，不過最後還是不禁力撐陳志雲，並衷心祝福對方：「陳先生個人好好，好關心員工，希望呢件事可以早日平息，所有人都冇事！」
楊思琦外表嬌滴滴，但她無懼人善被人欺。
面對種種借物質博上位的傳聞，思琦再三否定，語氣堅定地說：「我係依正常途徑努力工作，冇行捷徑！只係當初參選港姐，改變咗我嘅人生。」港姐的確改變了她的人生，由老師身份躍進公仔箱，但她依然保持純潔心態，謝絕不踏實的上位招數：「我唔覺得娛樂圈係大染缸，因為我嘅性格冇大改變，只係接觸嘅人多咗，同之前嘅教書工作性質唔同，我知道乜嘢適合自己，乜嘢唔適合！」
外表嬌滴滴的思琦，令人覺得她常被欺壓，而她亦坦承真有其事：「有試過，經一事長一智！我份人容易相處，唔係畀人恰，用基本嘅禮貌待人，人哋就會用呢個態度去對你，大家為求工作愉快，唔擔心生事！同啲同事關係良好就得，我同某啲圈中人都熟，會分享工作同生活，唔係一般見面打招呼！」但她似乎甚少與圈中人交際應酬，連她亦坦言圈外朋友才是知己：「我同中學同學、老師熟啲，佢哋同我好好朋友，係知己！」
思琦自爆甚得前輩歡心，更從米雪、惠英紅及元秋身上偷師：「我長輩緣好，雖然佢哋年紀唔係大，不過同佢哋啱傾！喺新劇《鐵馬尋橋》度，元秋做我媽咪，佢好似我媽咪咁照顧我，開頭佢畀人嘅感覺好似電影《功夫》咁：電咗髮、食住煙，不過其實佢講嘢好斯文，又好關心每一個演員！喺劇入面有佢5個仔女，佢真係每個都會問候吓、傾吓偈，一啲都唔嚴肅！我哋唔係第一次合作，之前合作過拍戲，不過拍劇環境唔同，時間長啲，我哋會講美容同健康話題，仲好有口福，一齊食嘢添！至於同惠英紅拍戲，佢戲好就唔使講，而且有感染力，我哋產生到火花！」
楊思琦堅持不走捷徑，以努力及實力換取機會。
放大圖片
後記:未有嫁期
思琦曾被指掛住拍拖，但她其實不欲多談戀事：「催婚？都係傳媒逼我，屋企人冇！同事都有問過，不過我真係未有計劃，總之到時真係就通知大家。哥哥有一仔一女，我係鍾意小朋友，咁咪玩住佢個BB先囉！」提起男友李泳豪，她只拋下一句：「又講？好鬼悶呀！」看來她經一事、長一智。
