楊思琦:等咗好耐先有戲拍!

巴辣牛王妹討人歡喜 入行10年終極平反 楊思琦:等咗好耐先有戲拍!

我喜歡楊思琦,樣子清純、無機心,循規蹈矩,最重要是她性格率真可愛,相信大部份觀眾跟我一樣,愛她沒半點虛假。電視台姐仔個個爭出位,楊思琦卻默默耕耘,做自己,輸蝕嗎?總有點吧,路遙知馬力,吃盡10年苦頭,今天終於苦盡甘來,演牛王妹彈腳甲一樣能討你歡喜,證明付出必有回報,只要你EQ夠高、耐性夠足。主持:黃柏高

統籌:林永匡 協力:彭燕燕、袁東亮
場地提供:銀座梅林 髮型:Chris Cheng@IL COLPO 化妝:Synni Tam@Private i

楊思琦在剛播完的電視劇《巴不得爸爸》中突破形象,素顏爛撻撻,叉腰瞪眼追打吳卓羲,反傳統,五料港姐冠軍演得入神,真我性格,贏盡觀眾心。

「今次真係好好玩,外表樸素有樣好,可以唔使執到好靚,你知啦,做藝人,唔使開工都唔畫樣(化妝),我知好多觀眾鍾意芬女個角色,粗粗魯魯咁,演得好放,直頭唔使理靚唔靚,鏡頭前剪腳甲都得。同吳卓羲對手戲最多,大家合作過幾次,好有默契,埋位前都有溝通,佢好多鬼主意,令氣氛更好。」

期待演驚慄片

說到演戲,外表柔弱、演慣鄰家女孩的楊思琦雀躍表示想演驚慄片,這讓我感到詫異,要知道,愛情、笑片對我而言,手到拿來,驚慄片卻讓我有保留,一部成功的驚慄片,是要令全世界人從心底驚出來。

「盲嘅、啞嘅、跛嘅我都試過,係未做過鬼,想演好似《大鬧廣昌隆》嘅小芙蓉,又或者《胭脂扣》好懷舊又好有韻味那種,咁耐只係拍過一部電影《自摸三百番》,好短時間內完成,係幾好的經驗。做藝人好被動,唔係話你排隊就有,有時排到你又唔知點解無咗(機會),等好耐先有戲拍。講合作,我真係好恨同黃日華、羅嘉良合作,早前拍《翻叮一族》,娥姐都好肯教我,都期待再有機會合作。」

感激觀眾支持

據楊思琦所說,假若當日沒有當選港姐冠軍,讀師範出身的她,理應繼續當教師,過着平淡的生活,我敢說,假若上天真係有這種安排,對我對她對觀眾都很不公平。

「眨下眼10年,你問我有何轉變?打扮上自然有進步、思想變得成熟,以前好易喊,依家好啲,咁耐都無咩負面新聞,最多話我賣肉養家,算係唔差。唔入行的話,我就做教師,層面範疇完全唔同,以前對幾十個學生都驚,會擔心班學生會唔會搗蛋,要點應對好呢?做演員,人生閱歷多好多,每演一個角色都有得着,忽得妹、二奶、老婆,全部都係好新鮮自己又未試過的,發現自己還有進步空間。成日覺得,我只係一個普通女仔,在街上有人主動打招呼,講啲支持同鼓勵說話,那股力量好大,幸運地有觀眾支持我。」

盼望拍內地劇

要楊思琦展望未來,她顯得有點膽怯,細心一點,會發現她帶有半點疑慮,深入了解下,才知她對自己要求極高,主修普通話亦只會告訴你「發音幾好」,有料唔怕認,換轉是我,必理直氣壯說:「我普通話說得很流利!」

「最近忙接騷,會去加拿大登台、出活動搵錢,未來計劃都係拍好劇集,希望可以拍內地劇,以普通話演繹角色,好在以前選修普通話,發音標準算唔錯。你問我點解演繹角色多是鄰家女孩?我諗係咁�未分配到,記得初入行拍《Loving You 2》做King Sir二奶,接到劇本直頭手到震埋,要我坐大髀喎!好在係喜劇,King Sir又教我點做,唔係都唔知點算。小菁姐要求好高,佢搵我拍《突圍行動》要我做奸人,仲同我講『要奸就要奸得徹底!』,試過一口氣讀三頁紙對白,要中 point又要加埋眼神,那次讓我體會到做奸人的氣勢,亦明白工作態度好重要。」Paco 楊思琦


※港姐出身的楊思琦入行已經10年,憑着其默默耕耘,終於磨煉出演技,更成功得到觀眾支持。


※甚少負面新聞的思琦,笑言入行至今,最多只是被指賣肉養家;能夠從容面對負面報道,思琦的確擁有很高的EQ。


※思琦在《巴不得爸爸》中,飾演一名潑辣牛王妹,獲得一致好評;思琦更會在新戲中,與娥姐合作。