「女王」跟「阿姐」這兩個名字總會讓人聯想到懾人的威嚴，尤其是套在一向敢做敢言的汪明荃（阿姐）身上。

縱橫演藝圈四十多年，阿姐演繹過無數角色，演技早被肯定，但最近她在處境劇《女王辦公室》的演出，卻受到網民批評，指她將角色演到「四不像」、「唔湯唔水」、不夠霸氣。對於批評，阿姐沒有大發雷霆，她冷笑一聲，耐心解釋角色性格，「女王」的本色只不過是辦公室裏一個「女人仔」，其實「女王」好愛錫同事，是個容易心軟的人。撰文：霍淇

在處境劇《女王辦公室》中，阿姐飾演的「Queen姐」，是一個以大家姐身份自居、愛面子、堅持原則，兼要求零瑕疵的萬能秘書王。

首次演處境劇，問阿姐事前可有作甚麼準備？阿姐輕鬆說：「冇乜嘢特別準備，因為都係講緊啲日常嘅嘢，我平日都會返Office（辦公室），因為我喺八和會館都係做行政方面嘅工作，所以對我嚟講，演呢類戲係冇乜難度。」

阿姐從60年代加入娛樂圈至今，超過40年的演藝經驗，年前她以「野蠻奶奶」身份出現，角色大受歡迎，做完古裝添食改做時裝，收視率與口碑同樣滿意，所以由她演繹一個秘書，對她來說又有何難度？

自認演出不夠完美

秘書角色對阿姐來說雖然難度不高，但向來要求非常嚴謹的她，仍對自己的表現有所不滿，她說：「我永遠唔會覺得滿意，應該一直都要有進步空間。（有邊方面可以再進步？）其實好多嘢可以改，可以再做得更加圓滑，更加細緻，你知有時拍一套劇嘅狀態，唔係一定日日都係最好，因為拍嘅時間太長，有時可能呢日好殘，又或者覺得場戲唔夠好。」

阿姐自認演出不夠完美，但她聽到朋友及觀眾對她的表現，全都是好評。她說：「佢睇完我演出之後，都話覺得我今次有別於過往的女強人角色，我覺得呢個可能係之前講嘅少少進步。」

然而，觀眾口味各有不同，當有部份觀眾認為阿姐做「女王」做得好的同時，網上卻另有聲音，指阿姐在劇中演繹得不夠霸氣、不夠八卦，更難聽點是說她演得「四不像」、「唔湯唔水」。聽到批評後，阿姐沒有大發雷霆，只冷冷地笑了一聲說：「哈！唔知佢（指網民）諗住我會做咩呢？呢個角色唔係一個女強人，佢只係Office入面一個女人仔，其實佢都係俾佢老闆點咋嘛，如果你以為佢好惡，就係你嘅錯覺。同埋佢都唔係一個八卦嘅人，佢只係一個主持公道嘅人，如果你有睇個劇嘅話，就會知道佢其實係好錫啲夥記。」

後記：年輕演員欣賞作風

可能阿姐一向的形象夠威嚴，再加上今次角色叫「女王」，因而令人誤會阿姐做「女王」，還不是最惡最霸道？阿姐沒好氣說：「我諗呢啲人諗得嘢太少囉！」

阿姐經常被形容到難以相處，但不少與阿姐合作過的藝人，即使是年輕一輩演員，也曾受惠過阿姐煲的湯水，他們都覺得阿姐只是工作態度嚴謹，並非無理取鬧的人。